Read Ngaju YOSUA 8 Bible Online

YOSUA 8 - Ngaju bible

YOSUA 8

¹TUHAN hamauh dengan Yosua, “Keleh mamumpong uras tantaram, tuntang haguet dengan ewen akan Ai. Ela nihau akal tuntang ela mikeh! Aku akan manenga akam kamanang bara raja Ai. Rayate, lewue tuntang tanahe akan irampas awim.

²Ai tuntang rajae iawim sama kilau ikau mawi Yerikho tuntang rajae bihin. Tapi sinde toh kare ramoe tuntang metoe tau keton manduae jadi ayun keton. Tata-tatap akan manyarang lewu te manantekas bara likut.”

³Palus Yosua tata-tatap handak haguet akan Ai haya-hayak dengan uras tantarae. Ie mintih 30.000 biti tantara je pangkahalape, palus manyoho ewen haguet hamalem,

⁴tuntang manenga parentah toh akan ewen, “Keleh manyahokan intu silan hila kanih lewu te, tapi ela lalau kejau; tuntang tatap-tatap uka manyarang.

⁵Aku tuntang oloh ayungku akan manokep lewu te. Amon kare oloh Ai balua uka malawan ikei, ikei akan mules tuntang hadari kilau bihin.

⁶Ewen akan manggoang ikei palus sampai kejau bara lewu te, tuntang manyangka ikei hadari kilau bihin,

⁷Metoh te keton balua bara eka keton manyahokan, tuntang marampas lewu te. TUHAN, Hatallan keton akan manyarahe akan keton.

⁸Limbah keton marampase, ngehu lewu te, tumon je irentah awi TUHAN. Jete gawin keton.”

⁹Limbah Yosua manyoho ewen, palus ewen haguet manyahokan arepe intu hila barat Ai helat Ai tuntang Betel; ewen mentai intu hete. Tapi Yosua bamalem intu kare kemah ungkup Israel.

¹⁰Susong hanjewu Yosua misik tuntang marentah pasukae uka hapumpong. Limbah te ie tuntang kare pamimpin ungkup Israel mimbit pasukan te akan Ai.

¹¹Pasukan te haya-hayak dengan Yosua miar akan hila lawang bentok lewu Ai, palus mampendeng kemah intu hila utara, eka ije janah helat ewen dengan lewu te.

¹²Aton kurang labih 5.000 biti jari inyoho manyahokan intu hila barat lewu te, helat Ai dengan Betel.

¹³Jadi, retei pasukan parang te iator kilau toh: eka tantara je mambatang iingkes intu hila utara lewu te; pasukan je beken aton hila barat, tapi Yosua haguet akan janah hong alem te.

¹⁴Sana raja Ai mite oloh ayun Yosua, kaje-kajeng ie manyadia arepe. Ie tuntang uras oloh ayue balua manintu janah Yordan uka manyarang oloh Israel intu eka je helo. Ie dia katawan je dia tahi tinai ie akan inyarang bara likut.

¹⁵Yosua tuntang oloh ayue mawie kilau-kilau jaka ewen magon undur; ewen hadari manintu janah keang.

¹⁶Uras oloh hatue intu lewu Ai iirak manggoang Yosua, kajariae ewen sasar kejau bara lewun ewen.

¹⁷Uras oloh intu Ai balua mangat manggoang oloh Israel, sampai lewu te inalua habangah kalote bewei, jaton jagae.

¹⁸Limbah te TUHAN hamauh dengan Yosua, “Gatang lunjum tuntang tajok manintu Ai; lewu te inyarah-Ku akam.” Yosua malalus parentah TUHAN te.

¹⁹Sana Yosua mantajok lengee, pasukan je manyahokan arepe te kaje-kajeng balua balalu miar tuntang manyarang lewu te, palus marampase. Balalu ewen mangehu lewu te.

²⁰Kare oloh Ai tampaliau, tuntang mite asep mangangkewul sampai akan langit. Yosua dengan pasukae mite kea asep te, tagal te ewen mangatawan pasukan je beken te jari marampas lewu te. Balalu Yosua mules haluli uka manyarang tuntang mampatei oloh Ai. Kare oloh Israel je intu lewu Ai te kea dumah tuntang omba manyarang, sampai oloh Ai takapong tuntang dia tau hadari. Ije mahin jaton bara ewen lapas, urase impatei iawi oloh Israel,

²³kacuali raja Ai. Ie inyingkap palus imbit manaharep Yosua.

²⁴Limbah pasukan Israel mampatei lepah tantara musoh je manggoang ewen intu janah keang, ewen haluli akan Ai, tuntang mampatei uras oloh intu hete.

²⁵Yosua harajur mantajok lunjue manintu Ai, tuntang dia mahalaliae sampai kare oloh Ai jari buah patei urase. Andau te kea matei oloh je melai lewu Ai — 12.000 biti karee, hatue tuntang bawi.

²⁷Meto tuntang kare ramo je irampas intu lewu te, induan awi kare oloh Israel akan ewen kabuat, tumon je insanan TUHAN akan Yosua.

²⁸Yosua mangehu Ai, tuntang naluae jadi karewo sampai katika toh.

²⁹Rajan lewu te ingkoake intu tihang, tuntang inaluae intu hete sampai halemei. Metoh mantanandau belep, Yosua manyoho oloh manduan hantu te tuntang manganae intu baun lawang lewu. Limbah te eka te inimbok hapan batu je are toto. Kare batu te magon aton intu hete sampai toh.

³⁰ Limbah te Yosua mamangun ije mesbeh intu bukit Ebal akan TUHAN, Hatallan Israel.

³¹ Mesbeh te inampae tumon kare atoh intu huang buku ain Moses, rewar TUHAN te, akan kare oloh Israel: “Ije mesbeh bara kare batu je hindai puji inampa bara kare pakakas sanaman.” Intu hunjun mesbeh te oloh Israel maluput akan TUHAN: parapah je ingehu tuntang kea parapah tarima kasih ewen.

³²Intu hete, hayak inampayah awi kare oloh Israel, Yosua manyurat intu kare batu mesbeh te salinan kare parentah TUHAN je aton intu buku ain Moses.

³³ Kare oloh Israel, kare perwira, kare hakim, tuntang kea kare oloh bangsa beken je melai marak ewen, mendeng intu hasansila Patin Janjin TUHAN manaharep kare imam Lewi je mamikul Patin Janji te. Saparo bara kare oloh te manaharep akan bukit Gerisim, tuntang saparoe tinai manaharep akan bukit Ebal. Moses, rewar TUHAN te jari marentah uka ewen malalus taloh te amon sampai katikae ewen manarima berkat je injanji TUHAN.

³⁴Limbah te Yosua mambasa hapan hai auhe hapus parentah tumon je tarasurat huang buku parentah, tatame kare berkat tuntang kare sapa.

³⁵Genep parentah Moses imbasa awi Yosua akan hapus ungkup Israel je hapumpong intu hete, tatame kea kare oloh bawi, anak oloh, tuntang kare oloh bangsa beken je melai marak ewen.