Read Ngaju YOSUA 9 Bible Online

YOSUA 9 - Ngaju bible

YOSUA 9

¹Barita tahiu kamanang Israel sampai akan uras kare raja intu silan hila barat Sungei Yordan — intu petak habukit, intu pain bukit, tuntang intu hapus saran Tasik Bentok sampai tikas bukit Libanon intu hila utara; iete kare raja Het, Amori, Kanaan, Feris, Hewi tuntang Yebusi.

²Uras kare raja te hapakat tuntang hinje uka mamarang Yosua tuntang ungkup Israel.

³Tapi kare oloh Gibeon bara bangsa Hewi jari mahining tahiu taloh je ilalus Yosua dengan Yerikho tuntang Ai.

⁴Palus ewen mamutus uka mamikir Yosua dengan mamuat akan hunjun kalidai ewen: kare kambut maram, tuntang kare kantong anggor je kupi-kupit je inampa bara upak meto. Tinai akan bahata, ewen manyadia baya rote je jari keang tuntang hakulat.

⁵Ewen mahapan pakaian je risai rewei hayak sarumpah je jari kupit tuntang tambal-tambala.

⁶Tumon te ewen haguet manyondau Yosua intu kemah hong Gilgal palus hamauh dengae tuntang dengan kare oloh Israel, “Ikei dumah bara lewu je kejau handak mawi janji dengan kare tuan.”

⁷ Tapi kare oloh Israel hamauh, “Kanduen ikei mawi janji dengan keton? Mikeh eka keton tokep lakau hetoh ih!”

⁸Ewen hamauh, “Ikei pahias malalus en bewei je irentah Tuan.” “Keton toh eweh! Tuntang bara tanah kueh?” paisek Yosua.

⁹Ewen tombah, “Ikei dumah bara tanah je kejau toto, Tuan, awi ikei mahining tahiu TUHAN, Hatalla je inyembah awi Tuan samandiai, Ikei jari mahining tahiu uras je ilalus Awie intu Misir,

¹⁰ tuntang tahiu taloh je ilalus Awie dengan kadadue biti raja Amori intu silan hila timor Yordan, iete Sihon raja Hesbon tuntang Og raja Basan je melai intu Astarot.

¹¹Kare pamimpin tuntang hapus oloh hong lewun ikei manyadia bahata uka haguet akan hetoh manyondau kare Tuan, tuntang mansanan je ikei manempo kare Tuan. Tagal te ikei balaku asi dengan kare Tuan uka mawi janji dengan ikei.

¹²Keleh kare Tuan mite rote bahatan ikei toh. Metoh ikei haguet rote toh magon balasut. Tapi toh, item! Jadi keang tuntang hakulat.

¹³Tuntang kare sarangan anggor toh magon taheta metoh ikei manyuange; tapi toh, tampayah! Jadi rabit-rabita. Pakaian ikei tuntang sarumpah ikei mahin jari rusak awi pangguet je kejau toh.”

¹⁴Palus kare oloh Israel manarima isut bara panginan kare oloh Gibeon te, tuntang dia misek dengan TUHAN tahiu taloh te.

¹⁵Yosua mawi janji hasobat dengan kare oloh Gibeon te, tuntang hajanji dia mampatei ewen. Kare pamimpin ungkup Israel kea, sumpah uka manumon janji te.

¹⁶Tapi ampie, hong andau katelo limbah janji je inampa, oloh Israel jari olih sampai lewu Gibeon, Kepira, Beerot tuntang Kiryat-Yearim intu tanah kare oloh te. Palus harue ingatawan eka ewen melai dia kejau bara Gilgal.

¹⁸Tapi oloh Israel dia tau mampatei ewen, awi kare pamimpin Israel jari sumpah dengan ewen hapan aran TUHAN, Hatallan Israel. Hapus ungkup Israel bakotok tahiu taloh te akan kare pamimpin ewen.

¹⁹Tapi kare pamimpin te tombah, “Kilen ampin itah dengae! Hajanji dengan ewen hapan sumpah dengan aran TUHAN, Hatallan Israel. Toh itah dia tau mawi kapapa mawi ewen.

²⁰Itah dia tau mampatei ewen awi itah jari hajanji; tuntang amon itah mungkir janji te Hatalla akan mahukum itah.

²¹Awi te, nauhe ewen belom, tapi uras itah mawi ewen tukang jadi tukang manyila kayu tuntang tukang masip danum akan uras itah.” Kalote je inyoho awi kare pamimpin te.

²²Palus kare oloh Gibeon te intehau manaharep Yosua. Yosua hamauh, “Mbuhen keton manipu ikei tuntang hamauh je lewun keton kejau toto, padahal baya intu hetoh?

²³Awi keton mawi kalote, Hatalla mahukum keton. Bangsa keton kareh harajur jadi rewar, tukang manyila kayu tuntang masip danum akan Human Hatallangku.”

²⁴Ewen tombah, “Ikei mawi kalote awi ikei mahining tahiu TUHAN, Hatalla je inyembah awi Tuan te jari manyoho Moses, rewar te, manenga akan Tuan hapus lewu toh tuntang mampatei uras oloh je melai hetoh metoh Tuan manduan tanah te. Ikei mikeh toto mikeh ikei impatei. Jete sababe ikei mawi taloh samandiai toh.

²⁵Toh ikei intu huang kuasam. Lalus akan ikei narai je bahalap manumon tirok Tuan.”

²⁶Palus toh je iawi Yosua: ie mangalindong kare oloh te tuntang dia manyoho oloh Israel mampatei ewen.

²⁷Tapi ewen iawi jadi rewar — iete tukang manyila kayu tuntang tukang masip danum akan oloh Israel tuntang akan mesbeh TUHAN. Sampai toh ewen magon malalus gawi te intu eka je intih TUHAN jadi eka sombayang akae.