Read Ngaju 2 TESALONIKA 2 Bible Online

2 TESALONIKA 2 - Ngaju bible

2 TESALONIKA 2

¹ Tahiu panumah Tuhan itah Yesus Kristus, tuntang tahiu Ie mamumpong itah uka melai hinje Ie, jetoh ih je ilakuku toto-toto dengan keton:

²Ela murah bingung atawa gogop tagal barita tahiu andau Tuhan Yesus dumah haluli jari sampai. Mungkin barita te asale bara ije tujum, atawa bara auh ajar oloh; atawa tau kea aton oloh je hamauh je ikei puji manyurat kilau te hong ije bara kare surat ikei.

³Tapi aloh kilen-kilen kea, ela manalua oloh mananjaro keton. Basa helo bara andau te sampai, hal jetoh labih helo musti manjadi: Are oloh kareh mundur bara kapercayae, milim Kristus; tuntang oloh papa je jari inukas akan tame naraka, kareh mamparahan arepe.

⁴ Hayak dengan kajohoe ie kareh malawan tuntang mampagantong arepe mahunjun kakare taloh je inyembah oloh kalunen, atawa kakare dewa je inyewut Hatalla awi oloh kalunen. Ie kea kareh mahin mondok intu Human Hatalla tuntang mansanan je ie te Hatalla.

⁵Keleh mingat je aku puji mansanan taloh samandiai te metoh aku aton hinje keton.

⁶Tuntang keton katawan taloh je wayah toh magon mahambang mangat taloh handiai te ela manjadi. Kareh hong andau je jari inukas awi Hatalla, Oloh Papa te akan lembut.

⁷Kaabas je malalus kapapa te benye-benyem jari nampara bagawi, tapi magon inaha-nahan. Kareh amon taloh je manahan te jadi inyare,

⁸ harue Oloh Papa te gitan. Maka amon Tuhan Yesus dumah, Ie kareh mampatei Oloh Papa te mahapan tahaseng bara nyaman Aie, tuntang mambinasa ie hapan kamanang panumah Ayue.

⁹ Oloh Papa te kareh lembut dengan kuasa je hai bara setan. Ie kareh mawi sepsimpan ampin taloh heran tuntang kare hal je dia puji helo hapan salepah tanjaroe.

¹⁰Ie kareh mahapan kare tipu tuntang tirok je papa uka mampalayang kare oloh je akan manalih kabinasa. Ewen kareh imbinasa awi ewen manolak tuntang dia rajin dengan barita je bujur bara Hatalla je tau manyalamat ewen.

¹¹Jete bukue Hatalla mampadumah akan ewen taloh kuasa je mampalayang, sampai ewen percaya dengan taloh je dia bujur.

¹²Kajariae, kakare oloh je rajin dengan dosa tuntang dia percaya dengan taloh je bujur te, kareh ihukum.

¹³Pahari handiai je inyinta Tuhan! Ikei musti harajur manyewut tarimakasih akan Hatalla tahiu keton, awi bara tamparae Hatalla jari mintih keton uka inyalamat.[2] Hal te manjadi awi taloh je ilalus Roh Hatalla akan keton uka keton manjadi ungkup ain Hatalla je barasih tuntang awi keton percaya dengan barita je bujur bara Hatalla.

¹⁴Tagal jete Hatalla mantehau keton akan Barita Bahalap je imbarita ikei akan keton. Hatalla mantehau keton, awi Ie handak uka keton omba mangkeme kahain Tuhan itah Yesus Kristus.

¹⁵Awi jete, pahari handiai, keleh mendeng segah tuntang imbing harajur kare ajar je jari inenga ikei akan keton, kilau je insanan ikei hapan nyaman ikei tuntang surat ikei.

¹⁶Keleh Tuhan itah Yesus Kristus kabuat, tuntang Hatalla Bapa itah mampong tuntang mampaabas atei keton, mangat keton tau malalus tuntang mambarita taloh je bahalap. Basa Hatalla sinta itah, tuntang tagal kahalap atei Aie Ie manenga akan itah kamenteng je toto, hayak maharap taloh je bahalap.