Read Ngaju 2 TESALONIKA 3 Bible Online

2 TESALONIKA 3 - Ngaju bible

2 TESALONIKA 3

¹Kajariae, pahari handiai, keleh balakudoa akan ikei. Keleh balakudoa mangat barita ain Tuhan tau harajur ingabar bajeleng akan hete-hete tuntang inarima dengan bahalap, sama kilau je jari manjadi intu keton bihin.

²Keleh balakudoa kea uka Hatalla manyalamat ikei bara kare oloh je haliau tuntang papa. Basa dia urase oloh kareh percaya dengan barita ain Tuhan te.

³Tapi Tuhan te baketep. Ie kareh mampaabas keton tuntang mangalindong keton bara Taloh Papa.

⁴Tuntang ikei percaya lepah dengan Tuhan tahiu keton, je keton wayah toh malalus tuntang harajur malalus tinai taloh je inyoho ikei keton.

⁵Keleh Tuhan mangagalan keton mangat labih harati, je Hatalla sinta keton tuntang manenga atei je sabar akan keton.

⁶Pahari handiai, tagal kuasan Tuhan Yesus Kristus, ikei manyoho keton uka mangejau arep keton bara kare pahari je belom kadian, tuntang je dia manumon kare ajar je inenga ikei akan ewen.

⁷Keton kabuat katawan je keton harajur manumon sonto bara pambelom ikei. Ikei dia kadian katika ikei aton hong marak keton.

⁸Ikei jaton kuman panginan oloh je dia ikei mambayare. Tapi handau hamalem ikei bagawi mahampas uhat-tolang ikei mangat ikei dia manyusah eweh bewei bara keton.

⁹Ikei malalus jete dia awi ikei jaton hak manuntut uka keton mandohop ikei, tapi awi ikei handak manjadi sonto akan keton.

¹⁰Katika ikei magon aton hong bentok keton, ikei manenga kare atoran toh, “Oloh je dia handak bagawi, dia tau kuman.”

¹¹Ikei mansanan hal toh awi ikei mahining aton kare oloh hong marak keton je belom huang kakulas. Ewen jaton malalus taloh en-en, baya rajin omba campur huang urusan oloh beken.

¹²Huang aran Tuhan Yesus Kristus ikei manyoho oloh te tuntang mampingat, uka ewen bagawi bujur-buah tuntang manggau balanjan ewen kabuat.

¹³Tapi keton ela peda malalus taloh bahalap.

¹⁴Tau kea kareh aton oloh je dia maku manumon taloh je insanan ikei huang surat toh. Keleh batawat manaharep oloh je kilau te tuntang ela bergaul dengae mangat ie mahamen.

¹⁵Tapi ela mawi ie kilau musoh, keleh manasehat ie ih kilau ije biti pahari.

¹⁶Tuhan te upon kasanang-kamangat itah. Keleh Ie harajur manenga akan keton kasanang-kamangat huang kakare hal. Keleh Tuhan mampahayak Pahari samandiai.

¹⁷Tabe bara aku, Paulus. Aku kabuat je manyurat bagian jetoh. Jetoh ie tanda je inampaku hong kakare suratku.

¹⁸Keleh Tuhan itah Yesus Kristus mamberkat pahari samandiai. Hormat ikei, Paulus