Read Ngaju 1 TIMOTEUS 1 Bible Online

1 TIMOTEUS 1 - Ngaju bible

1 TIMOTEUS 1

¹ Timoteus, anakku je bujur huang Tuhan! Surat toh bara aku, Paulus, rasul Yesus Kristus tagal parentah Hatalla, Panyalamat itah tuntang tagal parentah Kristus Yesus, kaharap itah. Keleh Hatalla Bapa tuntang Tuhan itah Yesus Kristus manenga berkat, asi tuntang kasanang akam.

³Aku handak uka ikau tetep melai hong Epesus kilau je jari inukasku akam katika aku haguet akan Makedonia. Basa, intu Epesus aton pire-pire oloh je mambarita auh ajar je dia bujur, tuntang ikau musti mambalang kare gawin ewen.

⁴Sanan akan ewen uka ela tinai manantuani kare sarita horan tuntang kare kesah huroi-rinting kare dewa je jaton baratikas. Taloh handiai te baya mampalembut kalahi bewei, tuntang dia mampamaju rencana Hatalla je tau ingasene mahalau kapercaya Dengae.

⁵Tintun nasehat ayungku te iete uka oloh tau mandino atei je barasih tuntang tirok atei je tinduh hayak toto-toto percaya dengan Tuhan, tuntang tagal te ewen tau sinta sama arepe.

⁶Aton belahe oloh je jaton belom kalote hindai, tuntang layang hong kare auh soal-jawab je jaton gunae.

⁷Ewen handak manjadi kare guru agama padahal ewen kabuat dia harati kare auh je ingotak ewen atawa kare hal je insanan tuntang imercaya ewen.

⁸Itah katawan hukum agama te bahalap, amon ingguna tumon kapatute.

⁹Batantu oloh musti mingat iete hukum te inampa dia akan oloh bahalap, malengkan akan kare oloh je malanggar hukum, oloh papa, oloh badungil, akan oloh badosa, oloh je dia baagama, oloh ain kalunen, akan oloh je mamuno indu bapae, tuntang kakare oloh je rajin mamuno,

¹⁰akan kare oloh je harayap, homoseks, penculik, pananjaro; tuntang eweh bewei mawi taloh je hakalawan dengan auh ajar je bujur.

¹¹Auh ajar te aton huang Barita Bahalap je imercaya akangku mangat aku mangabare, iete Barita Bahalap bara Hatalla je pangkahai tuntang patut inara.

¹²Aku manyewut tarimakasih akan Kristus Yesus Tuhan itah. Ie jari manenga kaabas akangku mangat manyang Ie, tuntang Ie maanggap aku puna patut akan gawi te,

¹³ aloh bihin aku mandarhaka tuntang mangapehe tuntang mahina Ie. Tapi Hatalla masi aku awi hong katika te aku hindai percaya, jadi aku dia katawan taloh je iawiku.

¹⁴Tuntang Tuhan itah manenga haream akangku kutoh asi. Ie manenga akangku kataun uka percaya Dengae tuntang sinta dengan oloh samandiai. Kataun jete inenga akan itah samandiai je jari hinje dengan Yesus Kristus.

¹⁵Toto haliai auh toh — basa jete patut inarima tuntang imercaya sakalepahe — : “Kristus Yesus dumah akan kalunen toh uka manyalamat oloh badosa.” Tuntang aku toh oloh badosa je paling papa.

¹⁶Tapi malahan awi te Hatalla masi aku uka Kristus Yesus tau mamparahan salepah kasabare dengangku, oloh je paling badosa toh. Tuntang jetoh manjadi ije sonto akan oloh samandiai je kareh handak percaya Dengae tuntang mandino pambelom je bujur tuntang katatahie.

¹⁷Hatalla, Rajan kare jaman, patut ihormat tuntang inara harajur, basa Ie te katatahie, je dia gitan tuntang je Tunggal. Amen!

¹⁸Anakku Timoteus! Gawi toh imercayaku akam, awi mingat peteh Hatalla je inyampai awi kare nabi hong ungkup tahiu ikau. Keleh peteh te manjadi bahata akam hong perjuangan je bahalap.

¹⁹Keleh berjuang sambil mimbing kapercaya je bujur tuntang hapan pangingat atei je barasih. Aton oloh je dia paduli auh hong pangingat ateie, sampai kapercayan ewen te hancor.

²⁰Bara ewen te aton Himeneus tuntang Aleksander. Kadadue oloh te jari ihukumku awiku manyarah ewen akan setan, mangat ewen bajar uka terai mamapa Hatalla.