Read Ngaju 1 TIMOTEUS 2 Bible Online

1 TIMOTEUS 2 - Ngaju bible

1 TIMOTEUS 2

¹Je mambatang, aku balaku toto-toto mangat auh palaku, sombayang tuntang lakudoan asi dengan auh tarimakasih inyampai manintu Hatalla akan oloh samandiai;

²akan kare raja tuntang oloh handiai je mimbing kuasa. Keleh balaku uka itah tau belom damai tuntang sanang dengan Hatalla hapan ampin hadat itah je patut.

³Jete je bahalap tuntang manyanang atei Hatalla, panyalamat itah.

⁴Ie handak uka oloh handiai inyalamat tuntang mangatawan taloh je bujur.

⁵Karana, baya aton ije Hatalla, tuntang baya aton ije oloh helat je manjadi tatean Hatalla dengan olon iete Yesus Kristus.

⁶Ie te ije biti oloh je jari manyarah bitin Aie uka maliwus oloh samandiai bara kare dosan ewen. Hapan jete Hatalla manunjok katika je buah, basa Ie handak uka kakare oloh uras inyalamat.

⁷ Tuntang jete sababe aku inyoho haguet manalih kare oloh je dia Yehudi uka mangabar akan ewen barita tahiu kapercaya je bujur. Taloh je insanangku toh puna toto, aku dia mananjaro.

⁸Aku balaku uka hong kueh bewei oloh hatue balakudoa dengan atei je barasih, ela hapan kalait atawa kalahi.

⁹ Keleh kare oloh bawi makaian arepe kilau oloh je naniha tuntang mahapan pakaian je bahadat. Ela mahapan tampan balau je malabien ampie atawa kare hiasan amas atawa mutiara, atawa pakaian je barega.

¹⁰Tapi keleh oloh bawi makaian arepe hapan kare gawi je bahalap sama kilau kapatut ain oloh bawi je manyembah Hatalla.

¹¹Oloh bawi musti bajar mambenyem arepe tuntang mantoh.

¹²Aku dia mambujur oloh bawi majar atawa marentah oloh hatue; ewen musti benyem.

¹³ Basa oloh je solake injapa iete Adam limbah te harue Hawa.

¹⁴ Tuntang oloh je buah tipu sampai malanggar parentah Hatalla, dia ie Adam, malengkan Hawa.

¹⁵Aloh kalote, oloh bawi akan salamat awie luas anake, hapan karandah ateie[1] tetep percaya dengan Kristus tuntang tetep sinta oloh beken hayak belom baya akan Hatalla bewei.