Read Ngaju 1 TIMOTEUS 3 Bible Online

1 TIMOTEUS 3 - Ngaju bible

1 TIMOTEUS 3

¹Puna buah toto auh toh, “Oloh je handak manjadi paling bakas huang ungkup, oloh te mipen dengan gawi je paham barega.”

² Ije biti tambakas ungkup musti oloh je jaton kasalae, sawae baya ije,[2] tau manahan arepe, pintar-harati, tuntang baatoran; ie rajin manarima oloh intu humae, tuntang tau majar oloh;

³ie dia oloh pambusau, atawa je rajin hakalahi. Tapi ie oloh je balemo lowah tuntang rajin badamai. Dia tau ie lalau rajin dengan duit.

⁴Ie musti tau mator huma seroke dengan bahalap, tuntang mandidik kare anak jariae uka ewen taat tuntang hormat dengae.

⁵Basa amon oloh dia tau mator huma seroke kabuat, kilen ampie ie tau mator ungkup Hatalla?

⁶Oloh je harue Kristen, dia tau manjadi tambakas ungkup, basa kareh ie manjadi balecak palus tarasapa kilau setan horan.

⁷Ie musti oloh je bahalap arae hong masarakat; basa amon dia kalote, maka ie akan ihina oloh, sampai ie tau buah jabak setan.

⁸Diakon ain ungkup te keleh oloh je bahalap tuntang bujur ateie; dia ie oloh je bakoho dengan duit atawa lalau are mihop anggor.

⁹Ewen musti mimbing dehe-dehen hapan atei je barasih kare auh ajar kapercayan oloh Kristen je jari ingarinah awi Hatalla.

¹⁰Keleh ewen te iuji helo, tuntang amon taragitan ewen te jaton kasalae, harue ewen tau mandohop hong ungkup.

¹¹Sawan ewen[3] kea musti oloh je bahalap, dia tau ewen te rajin mamander manahiu taloh je baya auh pahining bewei. Ewen musti tau manyarenan arepe tuntang bujur ateie hong taloh handiai.

¹²Diakon ain ungkup te musti baya aton ije ih sawae.[4] Ie musti mator kare anak jariae tuntang huma seroke dengan bahalap.

¹³Kare oloh je mandohop dengan bahalap huang ungkup, akan ihormat tuntang ewen manjadi sasar bahanyi hakotak tahiu kapercayan ewen dengan Kristus.

¹⁴Aku maharap dia tahi tinai aku akan maja manalih keton. Aloh kalote, surat toh inyuratku kea akan keton,

¹⁵mangat amon aku liwat dumah, ikau jari katawan kilen ampie itah patut belom kilau jalahan ain Hatalla, iete ungkup Hatalla je belom. Ungkup jetoh je kilau tihang je mandehen tuntang manahan kare ajar je bujur bara Hatalla.

¹⁶Ije biti mahin jaton oloh je tau malawan, kapaham kahain rahasia ain agaman itah: Ie mamparahan bitin Aie hong ampin olon, tuntang insanan bujur awi Roh Hatalla,[5] hayak inampayah awi kare malekat. Barita Ayue te habambalang intu marak kare utus oloh. tuntang Ie manjadi eka kapercayan oloh hapus kalunen tuntang impandai akan sorga.