Read Ngaju 1 TIMOTEUS 5 Bible Online

1 TIMOTEUS 5 - Ngaju bible

1 TIMOTEUS 5

¹Ela ikau balait hapan auh karas dengan oloh je labih bakas bara ikau tapi keleh ikau mimbit ie mahining kare auhm kilau jaka ikau bapae. Keleh ikau mawi kare oloh tabela kilau paharim,

²tuntang kare oloh bawi awang bakas jete kilau indum. Kare oloh bawi awang tabela keleh ikau mawie kilau betaum hapan ampin hadat ije barasih.

³Keleh mahormat kare bawi balo ije toto-toto belom kabuate.

⁴Tapi amon ije biti oloh bawi balo aton anake atawa esoe, maka ewen te je musti inenga helo pengertian basa ewen patut manantuani kare kola jalahan ewen, tuntang mambaleh kataun oloh bakas tuntang tambi-bue ewen. Basa hal jete manyanang atei Hatalla.

⁵Oloh bawi balo je toto-toto mangabuat, tuntang jaton samasinde oloh je tau mahaga ie, oloh te baya harap dengan Hatalla. Handau hamalem ie harajur balakudoa dengan Hatalla mangat balaku pandohop bara Ie.

⁶Tapi balo je rajin belom rami-rami, ie te jari matei aloh ie magon belom.

⁷Keleh manyampai kare auh nasehat toh akan ewen, mangat ewen belom jaton bara kasalan.

⁸Tapi amon aton oloh je dia mahaga tundah paharie, mahin hindai keluarga ayue kabuat, oloh te hakalawan dengan kapercayae; ie labih papa bara oloh je dia percaya.

⁹Oloh bawi balo je olih manumon kare atoran hong hetoh, ie tau inamean intu daptar kare balo: umure musti dia kurang bara jahawen puluh nyelo, helo bara te ie baya sinde kawin,[7]

¹⁰ingatawan kilau oloh bawi je malalus kare taloh je bahalap, kilau paribasae: jari mahaga anake sampai hai dengan bahalap, rajin manarima kare oloh je baramalem intu humae, manyang kare oloh percaya, mandohop kare oloh je susah, tuntang toto-toto malalus sepsimpan kare gawi je bahalap.

¹¹Ela manamean kare oloh bawi balo je magon tabela akan hong daptar te. Basa amon kipen ewen manjadi paham, ewen mado handak kawin tinai, tuntang malihi Kristus.

¹²Maka ewen te basala awie mungkir janji je jari inenga ewen akae.

¹³Tuntang tinai ie haka-kanan katikae awie tame balua human oloh. Tuntang je labih papa tinai, iete ewen majar arepe mamapa aran oloh beken tuntang omba urusan oloh hayak mangotak kare taloh je dia patut ingotak.

¹⁴Jete bukue aku barakahandak mangat kare oloh bawi balo tabela kawin tinai, mandino anak tuntang mahaga huma-seroke, mangat kare musoh itah jaton mandino katika uka mamapa aran itah.

¹⁵Basa aton kare oloh bawi balo je jari layang omba dewa.

¹⁶Tapi amon ije biti oloh bawi Kristen aton hong keluargae je jari manjadi balo, ie musti mandohop kare balo te. Ela manalua sampai ungkup je mananggong ewen. Awi kalote maka ungkup tau mandohop kare balo je samasinde jaton kare tundah paharie.

¹⁷Pamimpin ungkup je malalus gawie dengan bahalap, patut inenga penghargaan due kali lipet, je mambatang toto ewen je rajin manarang auh Hatalla tuntang majar.

¹⁸ Basa hong Surat Barasih tarasurat, “Sapi je mihik gandom uka malapas bawak gandom bara tundoe, ela imbangus nyamae”, tuntang kea, “Oloh je bagawi, aton hak manarima upahe”.

¹⁹ Ela ih manarima auh dawa mawi ije biti pamimpin ungkup, kecuali amon indehen awi due saksi atawa labih.

²⁰Oloh je mawi dosa, keleh iningak impuji intu taharep hapus ungkup, mangat oloh beken manjadi mikeh.

²¹Hong taharep Hatalla, Yesus Kristus, tuntang kare malekat je iintih, aku balaku nyame-nyame uka ikau manumon kare nasehat toh hayak jaton angat dawa mawi eweh bewei, tuntang jaton mamihak-mihak.

²²Ela lalau bajeleng mandanan lenge hunjun ije biti oloh hapam maresmi mangkat ie manjadi rewar Tuhan. Amon oloh beken badosa, ela omba tame huang dosa te. Keleh mahaga arepm mangat tetep barasih.

²³Ela hindai baya mihop danum bewei; ihop kea anggor isut hapa mandohop gawin gambuhm, basa ikau kinjap haba-haban.

²⁴Dosan oloh belahe helo bara imbit akan perkara, jari gitan tarang batantu. Tapi dosan oloh beken harun tau ingatawan limbah te.

²⁵Kalote kea kare gawi bahalap langsung gitan. Tuntang je dia murah gitan, mahin dia tau harajur basahokan.