Read Ngaju 2 TIMOTEUS 1 Bible Online

2 TIMOTEUS 1 - Ngaju bible

2 TIMOTEUS 1

¹ Timoteus, anakku je inyinta! Aku, Paulus, manyurat surat toh akam, tuntang maharap keleh Hatalla Bapa tuntang Tuhan itah Kristus Yesus manenga berkat, asi tuntang kasanang akam. Tagal kahandak Hatalla, aku iangkat manjadi rasul Kristus Yesus tuntang inyoho uka mambarita tahiu pambelom je injanji Hatalla. Pambelom te inarima itah tagal kahinjen itah dengan Kristus Yesus.

³Aku manyewut tarimakasih akan Hatalla je jari iayangku hapan atei-huangku je barasih kilau je ilalus awi tato hiangku horan. Aku harajur manyewut tarimakasih genep katika aku mingat ikau hong lakudoangku, aloh handau atawa hamalem.

⁴Aku mingat tahiu kapehen ateim. Jete sababe aku mipen toto hasondau dengam mangat aku tau toto-toto hanjak.

⁵ Aku mingat tahiu kapercayam je toto-toto dengan Kristus, sama kilau kapercayan tambim Lois tuntang indum Eunike. Tuntang aku percaya ikau mahin percaya kilau te.

⁶Tagal te aku mampingat ikau uka mambelom panenga je inenga Hatalla akam hong katika aku mina lengengku hunjun ikau.

⁷Basa Roh je inenga Hatalla akan itah, dia ie Roh je mampikeh itah. Tapi Roh Hatalla te manjadian itah mangat abas, kontep asi tuntang olih manyarenan arep.

⁸Tagal te ela mahamen manenga kesaksian tahiu Tuhan itah, tuntang ela kea mahamen tahiu aku, je inamean akan huang penjara tagal Ie. Tapi keleh ikau hapan kaabas bara Hatalla, omba mangkeme kapehe tagal Barita Bahalap te.

⁹Hatalla manyalamat itah tuntang mantehau itah uka manjadi ungkup ayue bewei. Ie malalus jete dia hagalang gawi je jari iawi itah, malengkan hagalang rencana Ayue kabuat tuntang Asie. Ie manenga akan itah Asie mahalau Kristus Yesus helo bara kalunen toh injapa.

¹⁰Tuntang toh, Hatalla mamparahan Asie te akan itah hong panumah Raja Panyalamat itah Kristus Yesus. Yesus mampakalah kuasan pampatei tuntang mimbit pambelom je katatahie mahalau Barita Bahalap te.

¹¹ Maka uka mangabar Barita Bahalap te, Hatalla mangkat aku manjadi rasul tuntang guru.

¹²Jete sababe aku buah kare kapehe toh, tapi aku tetep percaya, basa aku katawan toto eweh je imercayaku te. Aku percaya dengan taloh je jari inyarah Awie akangku hong kapercaya,[1] Ie olih kea mahagae sampai hong Andau Kiamat.

¹³Keleh toto-toto manumon auh ajar je bujur je jari inengaku akam. Tuntang keleh ikau tetep mimbing kapercaya tuntang sinta je jari inenga akan itah tagal kahinjen itah dengan Kristus Yesus.

¹⁴Hapan pandohop bara Roh Hatalla je belom huang itah, keleh ikau mahaga bua-buah kare taloh barega je jari imercayaku akam.

¹⁵Ikau katawan je oloh handiai hong wilayah Asia jari malihi aku, tatame kea Pigelus tuntang Hermogenes.

¹⁶Tapi keluarga Onesiporus jari pire-pire tingkat mampahanjak ateiku. Keleh Tuhan pahias mamparahan sinta asi akan ewen. Aloh aku melai huang penjara, Onesiporus dia mahamen dengan ampin nasibku te.

¹⁷Sana sampai hong Roma, ie balalu miar manggau aku sampai ie hasondau dengangku.

¹⁸Tuntang ikau katawan hong Epesus ie are toto mandohop aku. Keleh Tuhan mamparahan sinta asi akae hong andau Tuhan mangadili salepah bangsa oloh kalunen.