Read Ngaju 2 TIMOTEUS 2 Bible Online

2 TIMOTEUS 2 - Ngaju bible

2 TIMOTEUS 2

¹Timoteus anakku! Keleh ikau manjadi abas awi asi je inenga akan itah, awi itah hinje dengan Kristus Yesus.

²Auh ajar je bihin jari ihiningm bara aku hong bentok oloh are, keleh ikau manyarahe akan oloh beken je tau imercaya tuntang je tau majar oloh beken.

³Kilau prajurit ain Kristus je baketep, ikau musti omba mangkeme kapehe.

⁴Ije biti prajurit je magon malalus gawie, ie dia manderoh arepe kabuat dengan kare urusan ayue kabuat, basa ie mipen manyanang atei pangkalima ayue.

⁵Ije biti olahragawan dia olih manjadi juara huang ije pertandingan, amon dia mamenda kare peraturan.

⁶Oloh pamalan je jari bagawi paham, ie kea je pangkasolake mandino hak manduan hasil taloh imbule.

⁷Keleh ikau manirok taloh je insanangku te awi Tuhan akan manenga akam kaolih mangat harati kare taloh handiai.

⁸Keleh ikau mingat jetoh: Barita Bahalap je ingabarku jete barita tahiu Yesus Kristus, panakan Dawid; iete Kristus je jari belom haluli bara pampatei.

⁹Awi aku mangabar Barita Bahalap te, maka aku buah kapehe; malah sampai irantai kilau ije biti oloh papa. Tapi auh Hatalla dia tau irantai.

¹⁰Jete sababe aku sabar mananggong taloh handiai te akan kepentingan kare oloh je jari iintih Hatalla, mangat ewen kea mandino salamat je inenga mahalau Kristus Yesus, tuntang je mampahayak kahaie je katatahie.

¹¹Toto haliai auh toh, “Amon itah jari matei hayak Ie, itah akan belom kea hayak Ie.

¹² Amon itah tetep tahan manyarenan, itah akan marentah kea hayak Ie. Amon itah milim Ie, Ie kea kareh milim itah.

¹³Amon itah dia baketep, Ie harajur baketep basa Ie dia tau hakalawan dengan arepe kabuat.”

¹⁴Keleh ikau mampingat kare oloh handiai tahiu taloh handiai toh. Intu taharep Hatalla, tenga nasehat akan ewen uka ela hasoal-jawab tahiu kare istilah. Jete jaton gunae, malahan baya manderoh kare oloh je mahininge.

¹⁵Keleh ikau toto-toto manggau jalan mangat ingaku awi Hatalla kilau oloh je patut bagawi akae. Keleh manggau jalan uka ikau dia mahamen tahiu gawim, malengkan majar dengan buah kare auh ajar je puna toto bara Hatalla.

¹⁶Keleh mangejau arepm bara kare pander sarita je jaton gunae tuntang je mahina Hatalla. Kare pander sarita je kilau te baya mawi oloh sasar papa.

¹⁷Auh ajar kare oloh te manggayar kilau panyakit kangker je mamok. Bara ewen te aton Himeneus tuntang Piletus.

¹⁸Ewen jari mahiwang bara auh ajar je bujur, tuntang manderoh kapercayan oloh belahe. Ewen mansanan iete kamisik bara pampatei te jari manjadi.

¹⁹ Tapi galang je dehen je inampa awi Hatalla dia olih iongge. Intu hunjue te tarasurat, “Tuhan mangasene kare oloh Ayue”, tuntang “Oloh je manyewut arepe ain Tuhan, oloh te musti terai mawi kare gawi sala”.

²⁰Hong huma je hai aton are macam parabot. Aton je inampa bara perak atawa amas, tapi aton kea je bara kayu atawa petak. Aton je ihapan akan kaperluan istimewa, tuntang aton kea je ihapan akan kaperluan biasa.

²¹Oloh je mamparasih arepe bara taloh handiai je papa, oloh te kareh ihapan akan kaperluan je istimewa. Ie manjadi oloh je tantai tuntang baguna akan tempoe. Ie inatap akan ihapan huang gagenep gawi je bahalap.

²²Keleh mangejau arepm bara kare taloh je eka karajin oloh tabela. Keleh manggau jalan akan arepm uka belom manumon kahandak Hatalla, baketep dengan auh ajare tuntang sinta sama arep, tuntang mingkes kadamai hong atei. Keleh ikau belom kilau te hinje dengan ewen je mantehau balaku dohop dengan Tuhan hapan atei je barasih.

²³Ela omba huang soal-jawab kare oloh humong je jaton katawan taloh en-en. Ikau katawan je taloh handiai te baya mampalembut kalahi.

²⁴Oloh je bagawi akan Tuhan dia patut hakalahi; ie musti bajenta majar kare oloh hapan kahalap tuntang kasabar.

²⁵Ie musti mahapan kalemo majar kare oloh je rajin malawan; keleh Hatalla manenga katika akan kare oloh te mangat hobah bara kare dosan ewen tuntang mangasene auh ajar je bujur.

²⁶Awi kalote ewen manjadi barendeng haluli, tuntang lapas bara jarat setan je jari manawan ewen tuntang mamaksa ewen omba manumon kahandak ayue.