Read Ngaju 2 TIMOTEUS 4 Bible Online

2 TIMOTEUS 4 - Ngaju bible

2 TIMOTEUS 4

¹Kristus Yesus kareh dumah tinai akan kalunen toh uka manyidang kare oloh je belom tuntang je matei; tuntang Ie kareh dumah uka marentah kilau Raja. Tagal te aku balaku nyame-nyame dengam intu taharep Hatalla tuntang Kristus Yesus:

²Keleh ikau mambarita kabar bara Hatalla te, keleh ikau harajur impahata sukup mangat oloh mahininge, en ewen handak mahininge atawa dia. Keleh ikau manggau akal mangat oloh percaya, mamparahan kasalan oloh, tuntang manantiring ewen. Keleh majar oloh hapan salepah kasabarm.

³Basa katikae kareh sampai oloh dia handak hindai manarima auh ajar je bujur. Tapi ewen kareh manumon kahandak ewen kabuat, tuntang mamumpong kare guru uka iajar hapan kare hal je mangat auhe amon ihining awi pinding ewen.

⁴Ewen kareh matep pinding ewen taharep taloh je bujur tuntang ewen manenan pindinge akan kare saritan oloh bakas helo.

⁵Aloh kalote, ikau musti manahan arepm hong kare perkara en bewei. Keleh sabar manyarenan kapehe, keleh lalus gawim kilau pangabar Barita Bahalap te tuntang lalus kapatut gawim hapan salepah kataum kilau pandohop ain Hatalla.

⁶Tahiu bitin aingku, jari sampai katikae aku handak matei kilau parapah je iluput akan Hatalla. Hanjulo hindai aku kareh malihi kalunen toh.

⁷Aku jari omba oloh hasalanja hapan salepah kataungku, tuntang jari sampai tapakan garis. Aku harajur baketep[3] dengan Kristus sampai kalepahe.

⁸Tuntang toh hadiah kamanang mentai aku. Hong andau kiamat, Tuhan, Hakim je bujur te kareh manyarah hadiah te akangku, basa aku belom huang Hatalla. Tuntang dia ie aku bewei je manarima hadiah te, tapi oloh handiai kea je mentai panumah Tuhan dengan kataharo je paham.

⁹Keleh manggau jalan uka sapire kaolihm bajeleng dumah manalih aku,

¹⁰ basa Demas jari malihi aku awi sintae dengan kalunen jetoh. Ie jari haguet akan Tesalonika. Kreskes jari haguet akan Galatia, tuntang Titus akan Dalmatia.

¹¹ Baya Lukas ih je melai dengangku. Keleh manambang Markus tuntang imbit ie omba hayak dengam, awi ie jari mandohop hong gawingku.

¹² Aku jari manyoho Tikhikus haguet akan Epesus.

¹³ Amon ikau dumah, imbit mantel je impelaiku hong Troas intu human Karpus. Imbit kea kare buku ayungku, je mambatang kare buku je inampa bara karatas upak meto.

¹⁴ Aleksander, tukang tambaga te, jari mawi kare gawi je papa toto akangku. Tuhan kareh mambaleh mawi ie manumon gawie.

¹⁵Ikau kabuat musti bua-buah taharep ie basa ie paham malawan barita ain itah.

¹⁶Katika pangkasolake haliai aku maju mawi pambelaan ayungku, ije biti mahin jaton oloh je mampahayak aku; ewen uras malihi aku. Keleh jaka Hatalla dia manyalan ewen hong hal jetoh!

¹⁷Tapi Tuhan mampahayak aku. Ie manenga kaabas sampai aku olih mangabar salepah Barita Bahalap te, uka ihining awi oloh handiai je dia Yehudi. Tuntang aku lapas bara bahaya pampatei.

¹⁸Puna Tuhan kareh maliwus aku bara gagenep gawi je papa mawi aku. Ie kareh mimbit aku dengan salamat akan huang karajaan Ayue hong sorga. Keleh Pe impahai sampai katatahie! Amen.

¹⁹ Tabengku akan Priskila tuntang Akwila tuntang akan keluarga Onesiporus.

²⁰ Erastus melai intu Korintus, tuntang Tropimus jari ilihiku metoh ie haban hong Miletus.

²¹Saoli-olih ikau manggau jalan uka dumah helo bara wayah sadingen. Ebulus, Pudes, Linus, tuntang Klaudia mampait taben ewen akam; kalote kea kakare pahari beken je sama kapercayae dengan itah.

²²Keleh Tuhan mampahayak ikau. Keleh Tuhan mamberkat kare Pahari! Hormat ikei, Paulus