Read Ngaju TITUS 2 Bible Online

TITUS 2 - Ngaju bible

TITUS 2

¹Tapi ikau, Titus, keleh ikau majar auh ajar je buah.

²Tenga nasehat akan kare oloh hatue je bakas, mangat ewen manahan arepe, pintar-harati tuntang belom kilau oloh je patut ihormat. Ewen musti kea mimbing ajar je bujur ain Hatalla, sinta oloh mahapan sinta je tinduh-barasih tuntang tahan manyarenan kapehe.

³Kalote kea keleh ikau manenga nasehat akan kare oloh bawi je bakas uka hadat dasar ewen badamai dengan taloh je patut akan oloh je belom akan Hatalla. Ewen dia tau mamapa oloh beken, tuntang dia tau bela-belai mihop sampai babusau. Ewen musti majar kare taloh je bahalap,

⁴mangat awi te ewen tau mandidik kare oloh bawi tabela uka tau sinta banae tuntang kare anake,

⁵manjadi pintar-harati, belom barasih tuntang manjadi kabalin oloh je bahalap je mamenda banae. Awi tagal jete maka oloh jaton tau mamapa barita bara Hatalla.

⁶Kalote kea, keleh ikau manasehat kare oloh tabela mangat ewen manjadi pintar-harati.

⁷Hong kakare hal, keleh ikau manjadi sonto akan hadat dasar oloh je bahalap. Amon ikau majar oloh, ikau musti bujur tuntang hapan toto-toto ateim.

⁸Keleh mahapan kare kotak je mangandung kapintar-kaharati, je dia tau oloh mamapae, mangat kare musohm mahamen awi jaton kare hal papa je tau ewen manahiue mawi itah.

⁹Kare jipen musti mamenda tempoe, tuntang manyanang ateie hong kare taloh handiai. Ewen dia tau malawan,

¹⁰atawa manakau. Keleh ewen mamparahan ampin ewen kilau oloh je bahalap tuntang baketep, mangat hapan gawin ewen kalote oloh manara ajar tahiu Hatalla, Panyalamat itah.

¹¹Basa Hatalla jari mamparahan asin Aie uka manyalamat hapus ungkup oloh kalunen.

¹²Asin Hatalla te majar itah uka terai belom hakalawan dengan kahandak Hatalla tuntang dia manumon kipen kalunen. Itah iajar uka belom hong kalunen toh hayak tau manyarenan arep, bujur tuntang baketep dengan Hatalla.

¹³Katika toh itah mentai Andau je iharap te; hong Andau te kalunen kareh mite kahain Yesus Kristus, iete Hatalla Pangkahai tuntang Raja Panyalamat ain itah. [2]

¹⁴ Ie jari manyarah Arepe kilau parapah tagal itah uka maliwus itah bara kare kapapa, tuntang manampa itah manjadi ungkup je lapas bara dosa tuntang je manjadi oloh Ayue, tuntang je rajin malalus kahalap.

¹⁵Keleh majar taloh handiai te, tuntang keleh maningak kare oloh je mahining auhm hapan salepah kataum. Ela sampai aton oloh je maanggap ikau randah.