Read Ngaju TITUS 3 Bible Online

TITUS 3 - Ngaju bible

TITUS 3

¹Keleh mingat kare anggota ungkup ayum mangat ewen mamenda kare pamimpin tuntang oloh je mimbing kuasa, hayak taat tuntang tatap sadia malalus gagenep hal je bahalap.

²Sanan akan ewen uka ela mamapa oloh atawa hasoal-jawab dengan eweh bewei, tapi keleh bajenta dengan oloh. Keleh ampin ewen harajur balemo lowah dengan oloh samandiai.

³Basa bihin itah kabuat kea mahin humong, layau tuntang jaton mamenda oloh. Itah ihajipen awi kare macam kipen tuntang kahandak; itah belom dengan kare kahandak papa tuntang kahiri, hayak hakasingi dengan sama arep.

⁴Tapi Hatalla, Panyalamat itah mamparahan sintan Aie tuntang kahalap atei Aie akan itah.

⁵Ie manyalamat itah, dia awi itah jari malalus taloh bahalap, tapi awi Ie kabuat masi itah. Ie manyalamat itah mahalau Roh Barasih, je manenga akan itah pambelom taheta tuntang inakan taheta awi Ie jari menyau-mamparasih itah.

⁶Hatalla manusoh Roh Ayue akan itah mahalau Yesus Kristus, Raja Panyalamat ain itah,

⁷mangat tagal asin Yesus, itah badamai tinai dengan Hatalla tuntang itah mandino pambelom je bujur tuntang katatahie je iharap itah te.

⁸Auh jetoh toto haliai. Kahandakku uka ikau mambehat kare hal jetoh, mangat kare oloh je percaya dengan Hatalla toto-toto manggau jalan uka malalus kare gawi je bahalap tuntang baguna akan oloh handiai.

⁹Keleh mangejau kare soal-jawab ije dia baguna, kare saritan horoi-rinting, kotak-pander je hakalawan tuntang kalahi tahiu hukum agama. Taloh handiai te jaton gunae tuntang jaton kaontonge.

¹⁰Oloh je mawi sabab kapusit huang ungkup, keleh iningak sinde atawa handue awim; limbah te ela tinai manggapi ie.

¹¹Ikau katawan oloh je macam te badungil tuntang kare dosae mambukti ie te oloh basala.

¹² Sana limbah aku manyoho Artemas atawa Tikhikus manalih ikau, keleh manggau jalan uka saoli-olih bajeleng dumah manalih aku hong Nikopolis, basa aku aton kanahuangku melai intu hete katahin wayah sadingen.

¹³ Keleh toto-toto manggau jalan uka mandohop Senas, ahli hukum te, tuntang Apolos, uka ewen tau haguet tuntang jaton tapas taloh en-en.

¹⁴Kare oloh ain itah musti bajar malalus kare hal je bahalap uka tau dinon kare taloh je paham inggau; ela sampai ewen belom jaton baguna.

¹⁵Kakare pahari je aton omba aku, mampait tabe akam. Keleh manyampai kea tabe toh akan kare kawal itah je sama hong kapercaya. Keleh Tuhan mamberkat Pahari handiai. Hormat ikei, Paulus