Read Ngaju IBRANI 1 Bible Online

IBRANI 1 - Ngaju bible

IBRANI 1

¹Hong jaman horan Hatalla kinjap hakotak dengan tato hiang itah mahalau kare nabi hapan are macam cara.

²Tapi hong jaman je rahian toh Ie hakotak dengan itah mahalau Anak Ayue. Mahalau Anak Ayue te Hatalla manjapa langit tuntang petak. Tuntang Hatalla jari manukas Anak Ayue te kea je aton hak Akae manjadi tempon kare taloh handiai.

³Ie te kea je mampamancar kahain Hatalla je paham katarange; Ie te kea gambar Hatalla kabuat je gitan batantu. Ie te kea je mahaga langit tuntang petak toh hapan auh Ayue je paham kuasae. Limbah Ie mawi oloh olih iampun bara kare dosae, Ie mondok hunjun padadosan pamarentah hong sorga hinje Hatalla, Tempon kuasa je pangkagantonge.

⁴Anak te mandino pangkat je kejau kagantonge bara malekat, tuntang aran je inenga Hatalla Akae mahin labih paham ihormat bara aran je inenga akan malekat.

⁵ Dia puji Hatalla hamauh dengan malekat je kalotoh auhe, “Ikau toh Anakku; hong andau toh Aku manak Ikau.” Tahiu malekat je kueh bewei, dia puji kea Hatalla hamauh kalotoh, “Aku kareh manjadi Bapae, tuntang Ie kareh manjadi Anak-Ku.”

⁶ Tapi katika Hatalla manyoho Anake je tambakase akan kalunen toh, Hatalla hamauh kalotoh, “Kakare malekat Hatalla musti manyembah Anak te.”

⁷ Tahiu kare malekat, Hatalla hamauh kalotoh, “Hatalla mawi kare malekat Ayue manjadi riwut, tuntang kare jipen Ayue manjadi nyalan apui.”

⁸ Tapi dengan Anak te Hatalla hamauh, “Padadusan Ayum, o Hatalla, bunggut sampai harajur[1] katatahie! Pamarentah Ayum[2] jete pamarentah je bujur.

⁹Ikau rajin dengan taloh je bujur tuntang basingi dengan je sala; jete sababe, Hatallam, mintih Ikau tuntang manenga Akam hormat je mimbit kahanjak, malabien bara kare kawal Ayum.”

¹⁰ Hatalla hamauh kea, “Ikau, Tuhan, bara tamparae manjapa petak, tuntang Ikau kabuat manampa langit.

¹¹Kare taloh handiai te kareh nihau, tuntang manjadi usang kilau pakaian; tapi Ikau dia tau hobah.

¹²Hapus langit tuntang petak toh kareh ilipet awim kilau baju, tuntang handak inggantim hapan je beken. Tapi Ikau dia tau hobah, tuntang pambelom Ayum dia tau lepah.”

¹³ Dengan ije biti malekat mahin jaton puji Hatalla hamauh kalotoh, “Mondok intu hila gantaung-Ku, sampai kare musoh Aim tundok intu taharep Aim.”

¹⁴Amon kalote, eweh sapunae kare malekat te? Ewen te kare roh je manempo Hatalla, tuntang inyoho Hatalla uka mandohop kare oloh je kareh manarima salamat.