Read Ngaju IBRANI 10 Bible Online

IBRANI 10 - Ngaju bible

IBRANI 10

¹Hukum agama Yehudi baya mamparahan gambar je kabus tahiu kare taloh bahalap je kareh dumah rahian tuntang jete dia ie gambar taloh je bujur. Dia mungkin hukum te tau maninduh-mamparasih oloh je dumah manyembah Hatalla sambil manyarah panenga, aloh genep nyelo harajur inyarah panenga je sama kilau te.

²Paribasae kare oloh je manyembah Hatalla te toto-toto jari imparasih bara dosae, batantu ewen jaton tinai mangkeme arepe badosa, tuntang parapah dia usah inyarah tinai.

³Tapi gitan batantu kare parapah je inyarah genep nyelo te malahan mamparendeng oloh dengan kare dosae,

⁴basa dahan sapi tuntang dahan kambing hatuee puna dia tau mampuas dosa.

⁵ Jete sababe katika Yesus tame akan kalunen toh, Ie hamauh dengan Hatalla, “Ikau dia mangahandak parapah tuntang panenga; tapi Ikau jari manatap bitim akang-Ku.

⁶Ikau dia rajin dengan parapah je ingehu atawa parapah akan ampun dosa.

⁷Palus aku hamauh, ‘Hetoh Aku, o Hatalla! Aku dumah malalus kahandak Ayum, sama kilau je tarasurat tahiu arep-Ku hong Surat Barasih.’ ”

⁸Sola-solake Kristus hamauh, “Ikau dia mangahandak panenga atawa parapah; Ikau dia marajin meto je inyambalih je ingehu kilau parapah akan ampun dosa.” Kristus hamauh kalote, aloh kakare panenga te inyarah manumon hukum agama Yehudi.

⁹Limbah te Kristus hamauh, “O Hatalla! Toh aku dumah uka malalus kahandak Ayum.” Jadi Hatalla mampahapus kare parapah je usang te, tuntang manggantie hapan parapah Kristus.

¹⁰Yesus Kristus jari malalus kare taloh je ingahandak Hatalla tuntang manyarah Arepe kilau parapah. Hapan parapah te, je ilalus sinde bewei palus sampai katatahie, itah samandiai imparasih bara dosa.

¹¹ Genep imam Yehudi malalus gawie kilau imam genep andau, tuntang Ie lulang-luli maluput parapah jete kea. Tapi kare parapah panenga te jaton olih mampuas dosa.

¹² Tapi Kristus, baya manyarah ije parapah akan ampun dosa, tuntang parapah te tau ihapan akan sampai katatahie. Limbah manyarah parapah te, Kristus mondok hila gantaun Hatalla tuntang marentah haya-hayak Dengae.

¹³Tuntang toh Kristus mentai sampai Hatalla mawi kare musoh Ayue tundok Dengae.

¹⁴Jadi hapan ije parapah, Kristus maninduh kare oloh je jari imparasih bara dosa.

¹⁵Tahiu hal te Roh Hatalla manenga kea kasaksian akan itah. Roh Hatalla hamauh,

¹⁶ “ ‘Jetoh janji je handak inampa-Ku dengan ewen hong kare andau je rahian,’ koan Tuhan, ‘Aku kareh mingkes kare parentah-Ku huang atei ewen, tuntang manyurate hong tirok ewen.’ ”

¹⁷ Hatalla kea hamauh, “Aku kareh mangalapean kare dosa tuntang kare kapapan ewen.”

¹⁸Jadi, kare dosa tuntang kare kapapa te jari iampun, maka dia usah tinai inyarah parapah akan ampun dosa.

¹⁹Nah, Pahari handiai, tagal pampatei te toh itah bahanyi tame Kamar Ije Barasih Haliai.

²⁰Yesus jari manampa ije jalan taheta akan itah, iete jalan je manenga pambelom. Jalan te mahalau benang helat, iete bitin Kristus kabuat.

²¹Tuntang toh itah mandino ije biti imam je hai, je mimbing tanggong jawab dengan Human Hatalla.

²² Tagal te, keleh itah manokep Hatalla hapan atei je barasih tuntang kapercaya je dehen; hapan atei je jari imparasih bara angat basala, tuntang dengan biti je jari imparasih hapan danum je takining.

²³Keleh itah dehe-dehen mimbing kaharap je ingaku itah, basa Hatalla tau imercaya tuntang Ie kareh malalus janjin Aie.

²⁴Tuntang keleh itah manantuani sama arep itah, mangat itah tau hatantiring hasinta sama arep tuntang malalus kare taloh bahalap.

²⁵Keleh itah harajur haya-hayak pumpong, tuntang ela laya kilau oloh beken. Justru itah haream je musti labih baketep hakarasan, basa itah katawan dia tahi tinai Tuhan kareh dumah.

²⁶Basa amon barita je bujur ain Hatalla jari imbarita akan itah, tapi itah harajur tantai ihat itah mawi dosa, maka jaton tinai parapah hapan mampuas dosan itah.

²⁷ Maka taloh je inaharep itah iete tikas manaharep hakim ain Hatalla ih tuntang apui kalaite kareh mangehu lepah kare oloh je malawan Ie!

²⁸ Oloh je dia taat dengan parentah je inenga Moses, ihukum matei jaton ampun, limbah inyaksi awi due telo biti oloh, ie imbukti basala.

²⁹ Paham babehat parentah je kareh musti buah oloh je manandik Anak Hatalla, hukuman akae pasti labih babehat. Oloh te maanggap hina dahan janji ain Hatalla, iete pampatei Kristus je mamparasih ie bara dosa. Ie manenga Roh je manenga asi.

³⁰ Itah katawan eweh Ie je hamauh, “Aku kareh mambaleh! Aku kareh mahukum!” tuntang je hamauh, “Tuhan kareh mahakim ungkup Ayue.”

³¹Puna paham bakaike-ikeh amon itah manjato intu lengen Hatalla Ije Belom!

³²Keleh keton mingat pahari handiai ampin keadaan keton hong katika je jari mahalau. Hong katika te, limbah kalawan Hatalla mampalawa keton, keton manyarenan are kapehe; tapi keton tetep hakalahi hapan kamenteng keton.

³³Aton katikae keton ihina tuntang iawi oloh barangai ampie hong bentok oloh are. Aton kea katikae keton omba manyarenan kapehe hayak dengan ewen je iawi oloh kilau te,

³⁴tuntang keton omba mangkeme kapehen atei oloh je huang penjara. Tuntang katika kare taloh ain keton uras irampas oloh, keton manarima jete dengan sanang atei, awi keton katawan ain keton magon aton taloh je labih bahalap, je bunggut sampai katatahie.

³⁵Tagal te, ela bageto kaharap, basa amon keton tetep percaya, maka akan te aton upah je hai!

³⁶Keton patut sabar mangat keton tau malalus kahandak Hatalla tuntang tagal jete keton tau manarima taloh je injanji Awie.

³⁷ Basa hong Surat Barasih tarasurat, “Baya hanjulo bewei hindai, maka Ie je akan dumah te, kareh dumah bajeleng; Ie dia akan landa-landar dengan pandumah Aie.

³⁸Tuntang ungkup ayung-Ku je bujur kareh percaya tuntang belom; tapi amon aton bara marak ewen je undur, maka Aku dia tau sanang dengae.”

³⁹Itah toh dia ie ungkup je undur tuntang layang. Tapi itah toh ungkup je percaya dengan Hatalla tuntang je inyalamat.