Read Ngaju IBRANI 3 Bible Online

IBRANI 3 - Ngaju bible

IBRANI 3

¹Pahari handiai oloh Kristen je jari intehau awi Hatalla! Coba inirok handale-ndalem tahiu Yesus toh! Hatalla manyoho Ie dumah uka tantai manjadi Imam Hai hong agaman itah.

² Ie baketep dengan Hatalla je jari mintih Ie akan gawi te, sama kea kilau Moses horan baketep malalus gawie intu Human Hatalla.

³Tapi Yesus patut mandino hormat je labih hai bara Moses. Basa oloh je mamangun huma musti mandino hormat labih hai bara huma te kabuat.

⁴Genep huma puna aton oloh je mamangue, tapi je mamangun taloh handiai jete Hatalla kabuat.

⁵Moses baketep kilau jipen intu huang Human Hatalla tuntang manyampai kare hal je akan insanan awi Hatalla hong wayah je akan dumah rahian.

⁶Tapi Kristus baketep kilau Anak je aton tanggong jawab dengan Human Hatalla. Tuntang itah toh Human Hatalla, asal atei itah tetep balasot tuntang tetep percaya uka mandino taloh je iharap itah.

⁷ Awi te, kilau koan Roh Hatalla, “Amon hong andau toh keton mahining auh Hatalla,

⁸ela keton badungil kilau tato hiang keton, katika ewen malawan Hatalla, tuntang maningkes Hatalla hong padang pasir.

⁹‘Intu hete tato hiang keton maningkes Aku, tuntang mauji Aku,’ koan Hatalla, ‘padahal ewen jari mite gawing-Ku epat puluh nyelo katahie.’

¹⁰Jete sababe Aku balait dengan ewen tuntang hamauh, ‘Harajur ewen dia baketep, tuntang bantus mamenda kare parentah-Ku.’

¹¹Aku balait tuntang hasumpah, ‘Ewen kareh jaton tau tame hong lewu te mangat mandino andau malayan hinje Aku.’ ”

¹²Pahari handiai, keleh bua-buah keton ela sampai aton oloh hong marak keton je ateie paham papa tuntang jaton percaya, sampai Ie manalikut tuntang mangejau arepe bara Hatalla je belom!

¹³Jadi, mangat ela sampai aton oloh je marak keton buah tipu awi dosa sampai malawan Hatalla, keleh keton manenga nasehat akan sama arep keton genep andau katahin itah belom hong jaman je inyewut “Andau toh” hong Surat Barasih.

¹⁴Itah handiai uras kawal ain Kristus hong ije perjuangan, asal itah sampai kalepahe mimbing dehe-dehen kapercaya je ain itah bara tamparae.

¹⁵ Jetoh ie auh je tarasurat hong Surat Barasih, “Amon hong andau toh keton mahining auh Hatalla, ela keton badungil kilau tato hiang keton, katika ewen malawan intu taharep Hatalla.”

¹⁶ Nah, eweh kea kare oloh te je mahining auh Hatalla palus malawan intu taharep Ie? Jete ie oloh handiai je imimpin awi Moses balua bara Misir.

¹⁷Tuntang dengan eweh Hatalla balait epat puluh nyelo katahie? En dia dengan ewen je badosa tuntang matei intu padang pasir?

¹⁸Katika Hatalla basumpah kalotoh, “Ewen kareh dia tau tame hong lewu te mangat mandino andau malayan hinje Aku” — eweh tinai jete je koan Hatalla te? Oloh je koan Hatalla te iete kare oloh je malawan intu taharep Hatalla, en dia kalote?

¹⁹Metoh toh itah harati je ewen te dia tau tame, awi ewen dia percaya dengan Hatalla.