Read Ngaju IBRANI 4 Bible Online

IBRANI 4 - Ngaju bible

IBRANI 4

¹Nah, janjin Hatalla magon injalan, tuntang itah kareh inenga andau malayan je injanji Awie te. Jadi, keleh itah barendeng mangat jaton oloh hong marak keton je ampie dia mangkeme andau malayan je injanji Awie te.

²Basa Barita Bahalap te jari imbarita akan itah sama kilau akan ewen. Tapi akan ewen, barita te jaton ganae. Basa katika ewen mahininge ewen dia percaya.

³ Tapi itah je percaya, manarima andau malayan je injanji Hatalla te. Jete hakabuah dengan auh je insanan Hatalla kalotoh, “Aku balait tuntang hasumpah, ‘Ewen kareh jaton tau tame mangat mandino andau malayan hinje Aku.’ ” Hatalla hamauh kalote aloh gawin Aie jari hapus hong katika Ie manjapa kalunen jetoh.

⁴ Basa tahiu andau kaujue, aton tarasurat huang Surat Barasih kalotoh. “Hong andau kauju Hatalla malayan bara kakare taloh gawin Aie.”

⁵ Tahiu hal te inyurat tinai kalotoh, “Ewen kareh jaton tau tame hong lewu te mangat mandino andau malayan hinje Aku.”

⁶Jadi ewen je sola-solake mahining kabar tahiu Barita Bahalap te, jaton manarima andau malayan te awi dia percaya. Amon kalote maka tarang batantu aton kare oloh beken je tau manarima andau malayan te.

⁷ Basa Hatalla jari manukas ije andau je beken tinai, je inyewut “Andau toh”. Banyelo-nyelo tinai limbah te Hatalla hakotak tahiu hal te mahalau Dawid, hong ayat je inyewut nah, “Amon hong andau toh keton mahining auh Hatalla, ela keton malawan.”

⁸ Jaka paribasae Yosua jari manenga akan kare oloh te andau malayan je injanji Hatalla, maka Hatalla dia handak hakotak tinai tahiu ije andau je beken.

⁹Jadi, akan ungkup Hatalla magon aton janji uka malayan sama kilau Hatalla kea malayan hong andau kaujue te.

¹⁰ Basa oloh je mandino andau malayan je injanji Hatalla akae te, kareh malayan kea bara kare taloh gawie, sama kilau Hatalla.

¹¹Tagal te, keleh itah toto-toto manggau jalan uka mandino andau malayan je injanji Hatalla te. Ela sampai aton ije biti bara itah gagal kilau ewen horan, awie dia percaya dengan Hatalla.

¹²Auh Hatalla jete auh je belom tuntang dehen; labih banyihi bara padang je hasansila isie. Auh te manusuk timben sampai akan helat hambaruan dengan roh; sampai akan helat kare sapan tulang tuntang ontek tulang, sampai olih mangatawan kakejau kandalem tirok tuntang kahandak atei olon.

¹³Ije mahin jaton taloh belom je basahokan bara tampayah Hatalla, kare taloh handiai uras bukei tuntang habangah intu taharep Ie. Tuntang itah musti mamparahan tanggong jawab itah intu taharep Ie.

¹⁴Jete sababe itah musti dehe-dehen mimbing kakun kapercayan itah. Basa ain itah aton Imam Hai je toto hai, je jari tame sampai intu taharep Hatalla — iete Yesus Anak Hatalla.

¹⁵Imam Hai ain itah te dia ie imam je dia olih omba mangkeme kare kalemon itah. Tapi Ie jari iningkes hong kakare hal, sama kilau itah kabuat; baya Ie jaton mawi dosa.

¹⁶Awi te, keleh itah hapan salepah kamenteng itah manaharep Hatalla je marentah hapan kahalap ateie. Hatalla kareh masi itah tuntang mamberkat itah mangat itah mandino pandohop hong katikae je buah.