Read Ngaju IBRANI 7 Bible Online

IBRANI 7 - Ngaju bible

IBRANI 7

¹ Melkisedek te, iete raja bara Salem tuntang imam hai ain Hatalla je gantong haliai. Katika Abraham buli limbah mamarang kare raja, Melkisedek dumah manambang ie tuntang mamberkat ie.

²Maka Abraham manenga akan Melkisedek ije per sapuluh bara kare taloh je imarange te. (Aran Melkisedek te rimae, je mambatang “Raja Kaadilan”; tuntang awi ie raja bara Salem, maka arae te irima kea “Rajan Kasanang”.)

³Tahiu Melkisedek toh, hong kueh bewei jaton katarangan je manyewut ie te aton bapae atawa indue atawa tato hiange; jaton kea katarangan tahiu ie inakan, atawa pampateie. Ie sama kilau Anak Hatalla; ie te imam je katatahie.

⁴Jadi, intu hetoh itah mitee kapaham kahain Melkisedek toh; ie kalote kahaie sampai Abraham, tato hiang bangsa itah, manenga akae ije per sapuluh bara kare taloh je dinoe hong parang te.

⁵ Hong hukum agama ain oloh Yehudi, aton inukas uka kare imam turonan Lewi musti mamupo ije per sapuluh bara hasil je dinon bangsa Israel, iete kare paharin ewen kabuat, aloh ewen te sama-sama turonan Abraham.

⁶Melkisedek te dia ie turonan oloh Lewi, tapi ie manarima kea ije per sepuluh bara kare taloh je dinon Abraham hong parang, tuntang kea mamberkat Abraham je puna jari manarima kare janjin Hatalla.

⁷Puna dia tau itah mambantahe, oloh je imberkat te labih randah bara oloh je mamberkat ie.

⁸Kare imam je manarima bagian ije per sapuluh te, jete oloh je tau matei. Tapi manumon Surat Barasih, Melkisedek je manarima panenga ije per sapuluh te, jete oloh je tetep belom.

⁹Tau inyewut, Lewi — je turonan ayue te mandino ije per sapuluh bagian bara ungkup oloh Israel — mambayar kea bagian te mahalau Abraham, metoh Abraham mambayare akan Melkisedek.

¹⁰Aloh Lewi hindai inakan, tapi tau inyewut ie jari aton intu huang bitin tato hiange Abraham, metoh Melkisedek hasondau dengan Abraham.

¹¹Penda pimpinan kare imam Lewi, hukum agama Yehudi inenga akan bangsa Israel. Basa kare imam Lewi horan te dia tau malalus dengan tinduh-barasih taloh je musti ie malaluse, maka musti aton imam beken, iete je sama kilau imam Melkisedek, tuntang beken bara golongan imam Harun tinai!

¹²Nah, amon pangkat kare imam te hobah, hukum agama Yehudi kea musti hobah.

¹³Je inahiu intu hetoh iete Tuhan itah: ie bara suku beken, tuntang ije biti mahin hindai puji oloh bara suku Ayue je bagawi kilau imam.

¹⁴Kakare oloh mangatawan Tuhan itah te asale bara suku Yuda; tuntang Moses dia puji manyewut suku jete metoh ie hakotak tahiu kare imam.

¹⁵Hal je inahiu hetoh labih tarang tinai, sana ije biti imam beken je sama kilau Melkisedek, lembut.

¹⁶Ie iangkat manjadi imam, dia hagalang kare atoran oloh kalunen, malengkan hagalang pambelom Ayue je mimbing kuasa tuntang je jaton baratikas.

¹⁷ Basa huang Surat Barasih insanan, “Ikau toh imam je katatahie, sama kilau imam Melkisedek.”

¹⁸Jadi toh, atoran je helo te jari inyare awi dia dehen tuntang dia baguna.

¹⁹Hukum agama ain oloh Yehudi jaton olih mawi taloh en-en manjadi buah tuntang barasih. Jete sababe itah hong katika toh inenga ije kaharap je labih bahalap; hapan jete itah tau manokep Hatalla.

²⁰Tuntang tinai, taloh samandiai te impahata hapan sumpah bara Hatalla. Jaton sumpah je sama kilau te hong katika kare imam awang beken te iangkat.

²¹ Tapi Yesus iangkat manjadi imam hapan sumpah, katika Hatalla hamauh dengae, “Tuhan jari sumpah, tuntang Ie dia handak mobah Auhe, ‘Ikau toh imam sampai katatahie.’ ”

²²Awi te kea Yesus manjadi jaminan akan janji je labih bahalap.

²³Aton ije hal: Kare imam awang beken te are bitie, basa genep bitin ewen te matei sampai dia tau manontong taloh gawie.

²⁴Tapi Yesus belom sampai katatahie, jadi pangkat Ayue kilau imam te jaton mindah akan oloh beken.

²⁵Tagal te sampai katatahie Yesus tau manyalamat kare oloh je dumah manalih Hatalla mahalau Ie, awi ie belom sampai katatahie uka manyampai auh laku dengan Hatalla akan kare oloh te.

²⁶Jadi, Yesus te Imam Hai je imerlu itah. Ie barasih; intu Ie jaton tarasondau kasalan atawa dosa en bewei. Ie imisah bara oloh beken je badosa, tuntang impandai sampai akan eka je labih gantong bara kakare langit.

²⁷ Ie dia sama kilau kakare imam hai awang beken te, je genep andau musti labih helo maluput parapah akan kare dosan ewen kabuat, limbah te harun akan kare dosan ungkup. Yesus maluput parapah baya sinde bewei sampai katatahie, katika Ie manyarah Arepe kabuat manjadi parapah.

²⁸Hukum agama ain oloh Yehudi mangkat oloh je dia barasih manjadi imam hai. Tapi rahian limbah hukum te Hatalla manampa janji hapan sumpah Ie mangkat Anak je manjadi Panyalamat te, kilau Imam Hai je tinduh-barasih sampai katatahie.