Read Ngaju IBRANI 8 Bible Online

IBRANI 8 - Ngaju bible

IBRANI 8

¹ Upon kare taloh je inyarita toh iete: Ain itah aton Imam Hai je sama kilau te, je mondok marentah hinje Hatalla je Pangkahai hong sorga.

²Ie malalus gawin Aie kilau Imam Hai huang Kamar Ije Barasih Haliai, iete hong Kemah Tuhan je toto, je imangun awi Tuhan, dia awi olon.

³Gagenep imam hai te iangkat uka maluput parapah atawa panenga akan Hatalla. Kalote kea Imam Hai ain itah; Ayue musti aton taloh je ilupute.

⁴Paribasae Ie aton hong kalunen toh, Ie dia akan manjadi imam, basa jari aton imam je jari maluput parapah je musti ilalus tumon hukum agama Yehudi.

⁵ Gawi je ilalus oloh je manjadi imam te sapunae baya ije gambaran tuntang bayangan bara taloh je aton hong sorga. Jete jari insanan awi Hatalla akan Moses horan, katika Moses handak mampendeng Kemah Tuhan. Hatalla hamauh kalotoh dengan Moses, “Ingat! Taloh handiai te musti ikau manampae manumon sonto je imparahan akam intu hunjun bukit.”

⁶Tapi toh Yesus mandino gawin imam je kejau katinduh-kahaie bara je ilalus awi kare imam te. Basa janji je inampa akan Hatalla dengan olon, jete janji je labih bahalap awi hagalang janji akan kare taloh je labih bahalap.

⁷Paribasae jaton taloh je tapas hong janji je solake, maka dia usah aton janji je kaduee.

⁸ Tapi Hatalla jari sondau kasalan intu ungkup Ayue, sampai Hatalla hamauh, “Ingat, katikae kareh dumah, Aku kareh manampa janji je taheta dengan bangsa Israel, tuntang dengan suku Yuda.

⁹Dia kilau janji je iawi-Ku dengan tato hiang ewen katika Aku magah ewen balua bara lewu Misir. Ewen jaton baketep dengan janji je iawi-Ku akan ewen; maka jete sababe Aku dia paduli ewen.

¹⁰Tapi toh, jetoh ie janji je handak iawiku dengan bangsa Israel hong kare andau je akan dumah rahian, koan Tuhan: Aku handak mingkes parentah-Ku intu huang tirok ewen, tuntang manyurat jete huang atei ewen. Aku handak manjadi Hatallan ewen, tuntang ewen kareh manjadi ungkup ayung-Ku.

¹¹Ewen dia perlu majar akan sama arep ewen, atawa mansanan akan paharie, ‘Keleh mangasene Tuhan.’ Basa ewen handiai, hai korik, kareh mangasene Aku.

¹²Aku kareh mampun kare kasalan ewen, tuntang dia mingat tinai kare dosan ewen.”

¹³Awi Ie mansanan ije janji je taheta, Hatalla manampa janji je solake te manjadi usang tuntang bakas; tuntang taloh je jari bakas, kareh bajeleng kea lilap.