Read Ngaju IBRANI 9 Bible Online

IBRANI 9 - Ngaju bible

IBRANI 9

¹Hong janji ije solake aton kare atoran sombayang, tuntang aton kea eka sombayang tampan olon.

² Ije kemah impendeng je hong hila baue te inyewut Kamar Barasih. Intu hete aton tantahan akan sumbo, tuntang aton kea meja dengan rote je inyarah akan Hatalla.

³ Intu huange te tinai, iete intu hila likut dinding benang je kaduee, aton kamar je inyewut Kamar Ije Barasih Haliai.

⁴ Intu huang kamar te aton mesbeh je inampa bara amas akan hapa mamapui manyan, tuntang aton ije Patin Janji je lepah ingalukop hapan amas. Intu huang pati te aton mangkok amas je basuang manhu, sukah Harun je jari manyalundik, tuntang due bindang batu je basurat sapuluh parentah Hatalla intu hunjue.

⁵ Intu hunjun batu te aton due Kerub, taloh belom je mahapan palapas, jete kilau tanda Hatalla aton hete. Palapas kadadue taloh belom te hambirang intu hunjun tutup pati te, jete eka ampun dosa. Tapi taloh samandiai te dia olih inarang titip-tarah hong katika toh.

⁶ Kalote ampie taloh handiai te iator. Genep andau kare imam tame akan huang hila baun kemah te uka malalus gawin ewen.

⁷ Ije tame akan hila je pangkahuange haliai intu kemah te baya imam hai ih. Ie malalus jete baya sinde ije nyelo. Jete ilaluse hayak mimbit daha uka inyarah akan Hatalla tagal kare dosan ayue kabuat tuntang kare dosa je iawi kare ungkup ayue tapi jaton ingatawan awi ewen.

⁸Hapan atoran te, Roh Hatalla mamparahan batantu, iete katahin kemah hila baun te magon mendeng, maka jalan tame akan huang Kamar Ije Barasih Haliai te hindai buap.

⁹Jetoh tanda jaman wayah toh; rimae, kare parapah tuntang kare meto sambalih je iluput akan Hatalla, jaton olih mamparasih tirok atei oloh je mimbit parapah.

¹⁰Basa kare atoran sombayang te baya hatontong dengan taloh kinan, taloh ihop, tuntang are ampin macam gawi mamparasih. Kakare taloh te uras atoran je gitan hila luar bewei je ihapan pandehan sampai katikae Hatalla manahetae.

¹¹Tapi Kristus jari dumah kilau Imam Hai ain kare taloh je bahalap je jari aton.[7] Kemah Tuhan je ekae malalus gawie kilau Imam Hai jete kemah je labih hai tuntang labih barasih. Jete dia ie inampa awi olon; rimae asale dia bara kalunen je injapa toh.

¹²Kristus tame Kamar Ije Barasih Haliai huang Kemah te baya sinde bewei sampai katatahie. Hong katika te Ie dia mimbit dahan kambing hatuee atawa dahan anak sapi akan indu parapahe; Ie mimbit dahan Ayue kabuat, tuntang hapan jete Ie maliwus itah sampai katatahie.

¹³ Dahan kambing tuntang sapi hatuee dengan kawo bara parapah anak sapi, ihapan akan mambirik kare oloh je dia barasih manumon atoran agama mangat ewen manjadi barasih.

¹⁴Nah, amon daha tuntang kawo te tau mamparasih kare oloh je dia barasih te, mahin tinai dahan Kristus! Mahalau Roh je katatahie, Kristus manyarah Arepe kabuat akan Hatalla kilau parapah je tinduh-barasih. Dahan Aie te mamparasih pangingat atei itah bara gawin agama je dia baguna, mangat itah tau manyang Hatalla je belom.

¹⁵Jete sababe Kristus manjadi oloh helat akan janji je taheta, mangat oloh je jari intehau awi Hatalla tau manarima kare berkat katatahie je jari injanji awi Hatalla. Kakare taloh te tau manjadi awi jari aton je matei, iete Kristus; tuntang pampatei Ayue te maliwus oloh bara kasalan je ilalus ewen katika janji je solake magon ihapan.

¹⁶Amon aton surat warisan, musti aton kea buktie, iete oloh je manampa surat te jari matei.

¹⁷Basa surat warisan dia tau hapan amon oloh je manampae magon belom. Kareh surat te tau hapan limbah oloh te jari matei.

¹⁸Tagal te janji[8] je solake mahin musti indehen mahapan daha.

¹⁹ Sola-solake Moses manyampai kakare parentah Hatalla akan bangsa Israel. Limbah te Moses manduan dahan anak sapi tuntang dahan kambing hatuee, palus manyampure hapan danum, limbah te mambirike intu Surat Kare Parentah ain Hatalla tuntang intu hapus bangsa Israel mahapan tampong dawen hisop tuntang bulun tabiri je bahandang toto.

²⁰Sambil malalus jete Moses hamauh, “Jetoh ie daha je mandehen janjin Hatalla je musti imenda keton.”

²¹ Limbah te hapan cara jete kea, Moses mambirik kea daha te intu Kemah Tuhan tuntang intu kakare pakakas je ihapan hong sombayang.

²² Puna manumon hukum agama Yehudi, bilak uras kare taloh handiai te imparasih hapan daha; tuntang dosa baya tau iampun amon aton daha je inusoh.

²³Hapan cara je kilau te maka kare ramo je manamunan kare taloh hong sorga, patut imparasih. Tapi akan taloh je hong sorga te kabuat perlu pampatei je labih bahalap.

²⁴Basa Kristus dia tame akan Kamar Barasih tampan olon, je baya manamunan Kamar Barasih je toto. Kristus tame akan sorga kabuat; katika toh Ie intu hete manaharep Hatalla akan kepentingan itah.

²⁵Imam hai ain oloh Yehudi genep nyelo tame akan Kamar Ije Barasih Haliai intu huang Human Tuhan sambil mimbit daha bara ije kongan meto. Tapi Kristus dia usah lulang-luli tame uka manyarah Arepe.

²⁶Basa amon kalote, jete rimae Ie jari lulang-luli buah kapehe nampara bara kalunen toh injapa. Tapi je gitan batantu, hong jaman je rahian toh, Ie dumah baya sinde ih mangat mampuas dosa hapan pampatei Ayue kabuat.

²⁷Hatalla jari manukas kalunen musti matei sinde bewei tuntang limbah te iimbit manaharep hakim awi Hatalla.

²⁸ Kalote kea Kristus inyarah sinde bewei kilau parapah hapa mampuas dosan are oloh. Ie kareh dumah tinai akan je kadue tingkate, dia awi mangat mampalepah soal dosa, tapi uka manyalamat kare oloh je mentai panumah Ayue.