Read Ngaju YAKOBUS 1 Bible Online

YAKOBUS 1 - Ngaju bible

YAKOBUS 1

¹ Pahari handiai ungkup Hatalla je kasaburan hong hapus kalunen! Tabe bara aku, Yakobus, rewar Hatalla tuntang rewar Tuhan Yesus Kristus.

²Pahari handiai! Amon keton mangkeme kare macam tingkes, keleh keton mangkeme ontong.

³Basa keton katawan, amon keton tetep percaya dengan Tuhan hong katika keton buah tingkes, kajariae iete: keton manjadi oloh je tanggar atei.

⁴Keleh manjaga mangat atei keton sasar tanggar sampai keton toto-toto manjadi tinduh-barasih tuntang jaton tapas taloh en-en.

⁵Amon aton ije biti bara keton je tapas kapintar-kaharatie, keleh ie balaku jete dengan Hatalla, maka Hatalla kareh manenga kapintar-kaharati akae; basa akan gagenep biti, Hatalla manenga hapan kahias ateie tuntang hapan sintan Aie tuntang asin Aie.

⁶Tapi oloh je balaku, musti percaya; ie dia tau bembang ateie. Basa oloh je bembang ateie sama kilau riak intu tasik je inamput riwut kanih kate.

⁷Oloh je kilau te dia tetep tiroke; ie dia tau manduan kaputusan hong kare taloh je iawie. Tagal te, dia usah kea ie maharap uka mandino taloh en-en bara Tuhan.

⁹Oloh Kristen je belom susah keleh mangkeme hanjak amon Hatalla manggatang ie.

¹⁰ Tuntang oloh Kristen je tatau keleh mangkeme hanjak kea, amon Hatalla mamparandah ie. Basa oloh tatau akan lilap kilau kambang oru.

¹¹Katika matanandau lembut hayak kalasot pandange, maka oru te akan manjadi balayu sampai kambange te baduroh tuntang kahalape palus nihau. Kalote kea dengan oloh tatau; ie akan hancor benteng katika ie malalus usahae.

¹²Salamat oloh je tanggar ateie hong katika ie buah tingkes. Basa limbah ie bahasil manyarenan huang tingkes te, ie kareh manarima upahe, iete pambelom je injanji Hatalla akan kare oloh je sinta Hatalla.

¹³Amon aton oloh je iningkes awi tingkes je kilau te, ela ih ie hamauh, “Tingkes toh dumah bara Hatalla,” basa Hatalla dia tau inggoda awi taloh papa tuntang dia kea manggoda eweh bewei.

¹⁴Tapi oloh tau buah tingkes amon ie injijit tuntang injarat awi kipee kabuat je papa.

¹⁵Limbah te, amon kipen je papa te inumon, maka dosa lembut; tuntang amon dosa jari masak, kajariae oloh buah pampatei.

¹⁶Ela keton buah tanjaro, o kare pahari je inyinta!

¹⁷Gagenep panenga je bahalap tuntang berkat je tinduh-barasih jete dumah bara sorga, impamohon awi Hatalla, je manjapa salepah kalawa intu langit. Iete Hatalla je dia hobah, tuntang dia kea mampalembut kakaput en bewei.

¹⁸Awi kanahuang Ayue kabuat Ie mawi itah manjadi anak Ayue mahalau kare auh Ayue je bujur. Ie malalus jete mangat itah mandino eka je mambatang hong marak kare taloh belom je injapae.

¹⁹Pahari handiai je inyinta, keleh manantuani hal toh bua-buah! Buah gagenep oloh bajeleng mahining tapi barangkah hakotak tuntang barangkah balait.

²⁰Oloh je balait dia tau malalus taloh bahalap je manyanang atei Hatalla.

²¹Tagal te, kanan kare hadat je papa tuntang dia bahalap. Keleh manarima hapan karandah atei auh je inawor awi Hatalla hong atei keton, basa auh te aton bara kaabas hapa manyalamat keton.

²²Keleh keton malalus taloh je insanan awi Hatalla, ela baya mahining bewei, sampai awi te keton mananjaro arep keton kabuat.

²³Oloh je mahining auh Hatalla, tapi dia malaluse jete sama kilau oloh je manaharep saramin manampayah baun ayue kabuat.

²⁴Limbah ie manantuanie bua-buah, ie palus haguet hayak kalapean kilen ampin baue te.

²⁵Auh hukum ain Hatalla te tinduh-barasih tuntang bara kaabas akan mawi oloh kalunen mardeka. Tuntang oloh je rajin manyalidik tuntang manantuani hukum te bua-buah hayak malalus kare hukum te, oloh te kareh imberkat Hatalla huang kare hal je ilaluse.

²⁶Amon aton oloh je mangkeme arepe baketep huang agama, tapi ie dia mahaga nyamae, maka ie mananjaro arepe kabuat: gawie akan sombayang mahin jaton gunae.

²⁷Kaheret je tinduh-barasih dengan agama manumon tampayah Hatalla Bapa iete: mandohop kare anak nole tuntang kare balo je buah kasusah, tuntang mahaga arepe kabuat mangat dia irusak awi kalunen jetoh.