Read Ngaju YAKOBUS 2 Bible Online

YAKOBUS 2 - Ngaju bible

YAKOBUS 2

¹Pahari handiai! Kilau oloh percaya dengan Tuhan Yesus Kristus, Tuhan Je Pangkahai, ela keton mangabeken ampin oloh tumon ampie je gitan hila luar.

²Basa amon aton oloh tatau je mahapan tisin amas tuntang pakaiae bahalap dumah manalih pumpong keton balalu dumah kea ije biti oloh susah je mahapan pakaian risai-rewei,

³maka keton labih mahormat oloh je hapakaian bahalap te. Keton hamauh dengae, “Keleh Tuan mondok hong karusi je bahalap toh.” Tapi dengan oloh je belom susah keton hamauh, “Kan kanih, mendeng hete,” atawa “Mondok hong laseh hetoh.”

⁴Awi keton kalote, keton mangabeken ampin oloh hong marak keton tuntang manilai oloh hapan tirok je papa.

⁵Ingat, pahari je inyinta! Oloh je ingira susah hong kalunen toh, iintih Hatalla mangat manjadi oloh je tatau hong kapercaya. Kare oloh te akan manjadi anggota ungkup Hatalla sama kilau je injanji Hatalla akan oloh je sinta Ie.

⁶Tapi keton toh malahan mahina oloh je belom susah, padahal oloh tatau te je mahenyek keton tuntang mihir keton akan pengadilan!

⁷Ewen te jari mahina aran je paham ihormat je dinon keton bara Hatalla!

⁸ Keton malalus taloh je bujur, amon keton malalus hukum Karajaan tumon auh je aton hong Surat Barasih toh, “Sinta sama arep keton sama kilau keton sinta arep keton kabuat.”

⁹Tapi amon keton mangabeken-mangabeken ampin oloh mahapan kare hal je gitan, keton mawi dosa, tuntang hukum Hatalla mansanan keton te oloh je malanggar hukum.

¹⁰Oloh je malanggar ije hukum bara kare hukum Hatalla, rimae ie malanggar salepah hukum te.

¹¹ Basa oloh je hamauh, “Ela habandong,” ie kea je hamauh, “Ela mampatei oloh.” Jadi, amon keton dia habandong, tapi mampatei oloh, maka keton malanggar hukum kea.

¹²Keleh keton hakotak tuntang malalus gawi sama kilau oloh je handak iimbit manaharep hakim manumon hukum Hatalla je mawi oloh kalunen manjadi mardeka.

¹³Basa Hatalla dia akan mamparahan asin Aie dengan oloh je dia mangasene asi. Tapi sinta asi labih dehen bara sinta hukum!

¹⁴Pahari handiai! En gunae oloh hamauh, “Aku oloh je percaya”, amon ie dia mambuktie hapan gawie? En tau kapercaya kilau te manyalamat ie?

¹⁵Paribasa aton ije pahari je perlu dengan pakaian tuntang dia sukup panginan akan kinae genep andau.

¹⁶En gunae keton hamauh dengae, “Salamat mahapan pakaian je balasot tuntang salamat kuman!” — amon keton dia manenga akae taloh je perlu hapae belom?

¹⁷Kalote kea dengan kapercaya, amon dia imbukti hapan gawi, maka kapercaya te jaton gunae.

¹⁸Mungkin aton oloh je hamauh, “Aton oloh je bahapang dengan kapercayae tuntang aton kea belahe je bahapang dengan gawie.” Aku akan tombah, “Parahan akangku kilen ampie oloh tau mingkes kapercaya sambil jaton gawie tuntang aku akan mamparahan hapan gawingku je aku toh aton kapercayangku.”

¹⁹En keton dia percaya je Hatalla te baya ije? Nah, kare setan mahin percaya tuntang ewen hagenjeh mikeh!

²⁰Keton humong toto! En perlu mambuktie akan keton je jaton baguna mimbing kapercaya tapi jaton gawie?[1]

²¹ Ite ih Abraham tato hiang itah. Ie inarima bahala-halap awi Hatalla tagal gawie, iete hong katika ie manyarah Isaak, anake te, akan Hatalla hunjun mesbeh.

²²Intu hetoh tarang batantu je percaya te musti imparahan hapan gawi mangat manjadi tinduh-barasih.

²³ Jete hakabuah dengan auh ayat Surat Barasih toh, “Abraham percaya dengan Hatalla, tuntang awi kapercayae te Hatalla manarima ie kilau oloh je malalus kahandak Hatalla.” Jete sababe Abraham inyewut, “Sobat Hatalla”.

²⁴Toh jadi tarang, oloh inarima dengan bahalap awi Hatalla tagal taloh je ilalus awi oloh te, tuntang dia baya awi kapercayae bewei.

²⁵ Ite kea intu Rahab, oloh bawi lontei te. Ie inarima awi Hatalla tagal gawie, iete katika ie manarima hong humae kare oloh pangalati bangsa Israel tuntang mandohop ewen mandari arep ewen mahalau jalan beken.

²⁶Nah, sama kilau biti je jaton roh, jete biti je matei, kalote kea kapercaya je jaton gawie, jete kapercaya je matei.