Read Ngaju YAKOBUS 4 Bible Online

YAKOBUS 4 - Ngaju bible

YAKOBUS 4

¹Bara kueh tamparae kare kalahi kajama hong marak keton? En te dia manampara bara kare kipen keton je harajur hakalawan hong atei keton mangat mandino kamangat kalunen!

²Keton mipen, tapi jaton mandino, palus keton handak mampatei! Keton pahias, tapi jaton mandino taloh je inggau keton, palus keton hasoal tuntang hakalahi. Keton jaton mandino taloh en-en, awi keton dia balaku dengan Hatalla.

³Tuntang aloh keton jari balakue, dia baka keton mandinoe, awi kahimat palakun keton te sala; taloh je ilaku keton te baya akan kamangat arep keton kabuat.

⁴Keton oloh je dia baketep atei keton! En keton katawan amon keton hinje dengan kalunen, maka keton hamusoh dengan Hatalla?

⁵Ela tirok keton sala amon Surat Barasih mansanan, “Huang bitin itah Hatalla mingkes Roh je paham hai kahandak Aie.” [2]

⁶ Aloh kalote, sintan Hatalla je inengae akan itah labih hai hindai kaabase bara kahandak roh itah te. Jete bukue huang Surat Barasih inyurat kea, “Hatalla malawan oloh je gantong ateie, tapi sinta oloh je randah ateie.”

⁷Tagal te keleh mamenda Hatalla, tuntang buah malawan setan, maka setan kareh hadari bara keton.

⁸Keleh manokep Hatalla, tuntang Hatalla kea kareh manokep keton. Keleh marasih lengen keton, keton je badosa! Tuntang keleh mamparasih atei keton sampai hagining, keton je rambang ateie!

⁹Keleh keton toto-toto manyasal tuntang manangis hayak manatum; keleh tatawen keton manjadi tangis tuntang kahanjak keton manjadi kapehen atei!

¹⁰Keleh keton mamparandah arep keton intu taharep Tuhan, maka Tuhan kareh manggatang keton.

¹¹Pahari handiai, ela hatida atawa hakasalan sama arep keton. Oloh je manida atawa manyalan paharie je sama-sama Kristen, ie mamapa tuntang manyalan parentah Hatalla. Tuntang amon keton manyalan parentah Hatalla, jete rimae keton dia manumon kare parentah te, tapi keton manjadi hakim.

¹²Padahal baya aton ije je aton hak manenga parentah akan kalunen tuntang mahakim kalunen. Ie te Hatalla je kuasa manyalamat tuntang mambinasa. Jadi, eweh kea keton, sampai keton bahanyi manyalan sama arep keton oloh kalunen?

¹³ Kare Pahari je hamauh, “Andau toh atawa andau jewu ikei handak haguet akan lewu anu tuntang melai hete ije nyelo katahie mangat badagang tuntang manggau duit,” — keleh mahining auh nasehatku toh.

¹⁴Taloh je manjadi hong pambelom keton jewu, keton kabuat dia katawan! Keton baya kilau asep je gitan hanjulo, limbah te nihau lilap.

¹⁵Sapunae keleh keton hamauh kalotoh, “Amon Tuhan manyoho, ikei akan belom tuntang malalus taloh toh tuntang taloh te.”

¹⁶Tapi toh keton balecak tuntang tamam pander. Kakare kotak je tama-tamam kilau te uras sala.

¹⁷Tagal te, oloh je katawan taloh bahalap je musti ilaluse tapi dia ie malaluse, oloh te badosa.