Read Ngaju YAKOBUS 5 Bible Online

YAKOBUS 5 - Ngaju bible

YAKOBUS 5

¹Pahari handiai, keton je tatau! Hining nasehatku. Keleh keton manangis tuntang manatum basa keton kareh mangkeme kasusah-kapehe.

² Panatau keton kareh maram. Pakaian keton jari kinan buhei.

³Amas tuntang perak ain keton jari inumbo tagar; tagar te kareh manjadi saksi malawan keton tuntang kilau apui ie kareh kuman lepah bitin keton. Keton jari manawon panatau tokep wayah je pangkalepahe toh.

⁴ Keton dia mambayar upah akan kare oloh je bagawi hong tanan keton. Toh hining auh tarahing ewen! Kare oloh je mamumpong hasil tanan keton, mangkariak balaku dohop tuntang kariak ewen jari sampai akan pinding Hatalla, Tuhan je Pangkahai Kuasae.

⁵Keton jari belom tatau sanang tuntang mangkeme kamangat hong kalunen toh. Kila-kilau keton kanjeran mampaseput arep akan andau manyambalih.

⁶Keton mahukum tuntang mampatei kare oloh je jaton basala, tuntang ewen dia malawan keton. [3]

⁷Tagal te, keleh sabar pahari handiai, sampai Tuhan dumah. Keleh keton manampayah ampin kasabar ije biti oloh pamalan je mentai tanae sampai mampalembut hasil je barega akae. Hapan kasabare ie mentai ujan hong wayah dawen kayu baduroh tuntang ujan hong wayah dawen manyuloh.

⁸Keleh keton sabar kea tuntang hai atei, basa andau panumah Tuhan jari tokep.

⁹Ela bakotok tuntang ela manyalan sama arep keton, mangat keton dia ihukum awi Hatalla. Ingat! Hakim jari tokep, tatap handak dumah.

¹⁰Pahari handiai! Keleh mingat kare nabi je hakotak hong aran Tuhan. Ewen sabar tuntang tahan manyarenan kasusah kajake. Jadi, keleh manduan ewen te manjadi sonto.

¹¹ Ewen te inyewut oloh je sanang awi ewen segah ateie. Keton jari mahining kasabar Yob, tuntang keton katawan kilen ampie kajariae Tuhan mamberkat ie. Basa Tuhan te paham pamasi tuntang bahalap atei Aie.

¹² Je mambatang haliai iete: ela keton sumpah mahapan aran langit atawa petak atawa mahapan aran en bewei. Keleh keton hamauh “Iyoh” amon kahandak keton puna iyoh, tuntang “Dia” amon kahandak keton puna dia; mangat keton dia ihukum awi Hatalla.

¹³Amon aton oloh bara marak keton je metoh buah kasusah, keleh ie balakudoa. Amon aton je hanjak, keleh ie manyanyi manara Hatalla.

¹⁴ Amon aton je haban, keleh ie mantehau kare pamimpin ungkup. Tuntang keleh kare pamimpin te balakudoa akan oloh je haban te tuntang mohos undus intu oloh te hong aran Tuhan.

¹⁵Asal lakudoan ewen te toto-toto inyampai hapan kapercaya, Tuhan kareh mampakeleh oloh haban te, tuntang mampun kare dosa je jari iawie te.

¹⁶Tagal te, keleh keton sama mangaku kasalan tuntang balakudoa akan sama arep keton mangat keton impakeleh. Lakudoan oloh je manumon kahandak Hatalla, hai toto kuasae.

¹⁷ Elia te sama kalunen kea kilau itah. Ie balakudoa toto-toto mangat ujan dia dumah, maka ujan palus jaton dumah katahin telo satengah nyelo.

¹⁸ Limbah ie balakudoa tinai, palus langit mampamohon ujan sampai petak kea mampalembut hasil.

¹⁹Pahari handiai! Amon aton oloh bara marak keton je dia hindai manumon ajar ain Hatalla, palus aton ije oloh beken je olih mimbit oloh te haluli manalih Hatalla,

²⁰ keleh mingat auh ayat toh: Oloh je mimbit oloh badosa hobah bara jalae je sala, oloh te manyalamat hambaruan oloh je badosa te[4] bara pampatei tuntang mawi are dosa tau iampun. Hormat ikei, Yakobus