Read Ngaju 1 PETRUS 1 Bible Online

1 PETRUS 1 - Ngaju bible

1 PETRUS 1

¹Pahari handiai ungkup je iintih Hatalla, je manamuei kasaburan hong tanah Pontus, Galatia, Kapadokia, Asia, tuntang Bitinia! Aku, Petrus, rasul Yesus Kristus, maharap keleh Hatalla manenga berkat tuntang kasanang je hakutoh akan keton je. Keton iintih awi Hatalla, saroroi dengan rencana Hatalla Bapa. Tuntang Roh Hatalla jari manjadian keton manjadi ungkup je barasih, baya akan Hatalla, mangat keton mamenda Yesus Kristus tuntang imparasih awi dahae.

³Keleh itah manarimakasih akan Hatalla, Bapa Tuhan itah Yesus Kristus! Ie paham masi itah, jete sababe ie manenga akan itah pambelom je taheta, awie mambelom haluli Yesus Kristus bara pampatei. Jetoh manenga akan itah kaharap je dehen.

⁴Itah maharap mangat itah mandino kare berkat je inatap Hatalla akan ungkup ayue, iete kare berkat je iingkes hong sorga, sampai dia tau rusak, atawa luntur atawa maram.

⁵Taloh handiai te uras akan keton, awi keton percaya dengan Hatalla. Maka keton ihaga hapan kuasan Hatalla mangat keton manarima salamat je tantai imparahan hong wayah je pangkalepahe kareh.

⁶Tagal te keleh keton hanjak atei, aloh metoh toh hong katika je hanjulo keton musti mangkeme pehe atei awi keton buah are macam tingkes.

⁷Riman tingkes te iete uka mite buktie en keton toto-toto percaya dengan Tuhan atawa dia. Amas je tau rusak mahin iuji hapan apui. Nah, kapercayan keton te labih barega bara amas, jadi musti iuji kea mangat manjadi dehen. Tuntang tagal jete keton kareh inara tuntang ihormat palus impahai hong andau Yesus Kristus dumah tinai.

⁸Keton sinta ie aloh bihin keton dia mite ie. Tuntang keton percaya dengae aloh hong katika toh keton jaton mite ie. Jete sababe keton hanjak, tuntang mangkeme kahanjak je hai tuntang jaton tarasanan.

⁹Awi kahimat kapercayan keton sampai, iete salamat akan hambaruan keton.

¹⁰Salamat jetoh je iriksa tuntang inantuani awi kare nabi, tuntang ewen manujum tahiu berkat je inenga Hatalla akan keton.

¹¹Ewen manantuani kilen ampie tuntang hamparea taloh te kareh manjadi,[1] je ingahandak awi Roh Kristus je aton huang arep ewen. Hong katika te Roh ayue te manujum akan ewen tahiu kare kasusah-kajake je musti ingkeme awi Kristus tuntang tahiu kahaie je akan dumah limbah te.

¹²Akan kare nabi te Hatalla mansanan taloh je ilalus ewen te dia baya akan gunan ewen kabuat, tapi akan keton; iete kare taloh je tarang auhe ihining keton wayah toh bara pambarita Barita Bahalap tahiu Yesus Kristus. Ewen manyampai kare hal te akan keton mahapan kuasan Roh Hatalla je impait awie bara sorga. Kare malekat mahin mipen kea mangatawan kabar je imbarita ewen te.

¹³Tagal te, keleh keton tatap sadia. Keleh barendeng tuntang keleh lepa-lepah kaharap dengan berkat je handak inenga akan keton hong katika Yesus Kristus dumah kareh.

¹⁴Keleh mamenda Hatalla, tuntang ela belom manumon kahandak keton kilau horan, metoh keton magon hindai kasene Hatalla.

¹⁵Tapi keleh keton barasih intu huang kakare hal je ilalus keton sama kilau Hatalla je mantehau keton te barasih.

¹⁶ Hong Surat Barasih aton tarasurat, “Keleh keton barasih, basa aku toh barasih.”

¹⁷Keton manyewut Hatalla te Bapa katika keton balakudoa intu Ie. Nah, Hatalla te je mahakim kalunen sama kabehate dengan gawin genep bitin oloh dia mite ampin oloe. Tagal te katahin keton magon aton hong kalunen toh, keleh keton mampahai Hatalla hong pambelom keton.

¹⁸Keton katawan taloh je jari imbayar hapan mambebas keton bara pambelom je hayang je iwaris awi tato hiang keton. Tewuse te dia ie mahapan taloh je tau rusak kilau perak atawa amas,

¹⁹tapi mahapan taloh je paham barega; iete bitin Kristus kabuat, je jari iluput kilau parapah tabiri je tinduh akan Hatalla.

²⁰Kristus iintih awi Hatalla helo bara kalunen toh injapa. Tuntang hong kare andau je pangkarahiae hong jaman jetoh, ie dumah akan kalunen mangat keton inyalamat.

²¹Mahalau ie keton percaya dengan Hatalla je jari mambelom ie haluli bara pampatei tuntang mampahai ie. Jadi, Keleh Hatalla ih je imercaya keton tuntang Hatalla te kea eka keton mina kare kaharap keton.

²²Awi keton mamenda ajar ain Hatalla, maka keton mamparasih arep keton tuntang keton sinta kare oloh je sama kapercayae dengan keton secara bujur buah. Tagal te keleh keton hasinta sama arep keton salepah atei keton.[2]

²³Basa mahalau auh Hatalla je belom tuntang je katatahie te, keton inampa manjadi kalunen taheta je dia inakan bara olon, malengkan bara Bapa je katatahie.

²⁴ Hong Surat Barasih tarasurat kalotoh, “Salepah utus oloh kalunen kilau oru, tuntang kakare kahaie kilau kambang oru. Oru balayu, kambange mahin baduroh;

²⁵tapi auh Tuhan tetep sampai katatahie.” Auh te Barita Bahalap je jari imbarita akan keton.