Read Ngaju 1 PETRUS 3 Bible Online

1 PETRUS 3 - Ngaju bible

1 PETRUS 3

¹ Kalote kea keton, kare sawan oloh, musti mamenda banan keton mangat amon aton bara kare ewen te je dia percaya dengan barita bara Hatalla, maka ampin lagon keton tau mawi ewen manjadi oloh percaya. Tuntang dia usah keton mansanan taloh en-en akan ewen,

²awi ewen mite ampin hadat keton je tinduh tuntang barasih.

³ Ela kahalap keton baya gitan intu luar bewei, paribasa awi keton mampahalap balau atawa mahapan hiasan, atawa mahapan kare pakaian je hai regae.

⁴Tapi keleh kahalap keton te lembut bara huang atei keton, hadat dasar je balemo tuntang sanai; jete kahalap je bunggut tuntang paham barega manumon tampayah Hatalla.

⁵Hapan cara jete kare oloh bawi je baagama hong jaman horan, ewen je harap dengan Hatalla te mampahalap arepe awie mamenda banae.

⁶ Sarah mahin kalote kea, ie mamenda Abraham tuntang mantehau ie tuan. Wayah toh kare pahari toh uras anak Sarah, asal keton malalus kare taloh bahalap tuntang dia mikeh dengan eweh bewei.

⁷ Tuntang keton kare banan oloh kea, keleh keton belom hapan salepah kaharatin keton dengan sawan keton, tuntang hapan karendeng je ewen te jalahan oloh kalunen je balemo. Keleh manun ewen dengan hormat, basa ewen te kareh manarima asi je belom bara Hatalla kilau je inarima keton kea. Keleh malalus taloh te, mangat jaton oloh je mahambang lakudoan keton.

⁸Katatepae iete: Keleh kare pahari hapakat hinje auh tirok tuntang pangkeme. Keleh keton hasinta sama arep keton sama kilau kare oloh je hampahari. Tuntang keleh keton hasinta sama arep keton tuntang ampin dasar keton mamparahan karandah atei keton.

⁹Ela mambaleh kapapa hapan kapapa, atawa sapa hapan sapa; tapi keleh mambaleh jete dengan balaku berkat bara Hatalla. Basa Hatalla tantai matehau keton mangat keton manarima berkat bara ie.

¹⁰ Hong Surat Barasih tarasurat kalotoh, “Oloh je handak mangkeme kamangat pambelom tuntang handak mangkeme kare andau je bahalap, ie musti mahaga totoke mangat ela mangotak kare taloh je papa tuntang dia manyewut kare auh tanjaro.

¹¹Ie musti mangejau arep bara taloh je papa tapi malalus taloh je bahalap; keleh ie toto-toto manggau jalae mangat mandino kadamai.

¹²Basa Tuhan harajur manantuani kare oloh je manumon kahandak Ayue, tuntang Tuhan harajur mahining kare lakudoan ewen; tapi Tuhan malawan kare oloh je malalus kapapa.”

¹³Eweh kea je handak mawi kapapa dengan keton, amon keton rajin mawi taloh bahalap?

¹⁴ Tapi aloh keton musti buah kapehe awi keton malalus kare taloh bahalap, keton ontong! Ela mikeh dengan eweh bewei, tuntang ela atei keton meles.

¹⁵Tapi huang atei keton, keleh keton manenga hormat baya akan Kristus awi puna tagal pangkat ayue kilau Tuhan. Tuntang keleh keton harajur tatap sadia tombah kare auh paisek oloh tahiu kaharap je aton huang keton.

¹⁶Tapi keleh keton malalus taloh te hapan kalemo tuntang hormat. Tuntang keleh atei-huang keton barasih, mangat amon oloh mamapa keton awi keton belom bahalap kilau murid Kristus, maka oloh je mamapa keton te palus mahamen kabuat.

¹⁷Labih bahalap keton buah kapehe awi malalus taloh bahalap — amon jete puna kahandak Hatalla — bara keton buah kapehe awi malalus taloh papa.

¹⁸Basa Kristus kabuat matei[3] baya sinde bewei, palus akan katatahie tagal dosan kalunen — ije biti oloh jaton bara kasalan, matei akan oloh je sala. Kristus malalus jete mangat ie tau mangagalan keton manalih Hatalla. Ie matei secara biti-bereng, tapi imbelom tinai secara roh.

¹⁹Hapan roh ayue te kea ie mambarita kabar bara Hatalla akan roh je huang penjara:

²⁰ iete kare roh oloh je dia manumon kahandak Hatalla hong jaman Noah. Hong katika te Hatalla mentai dengan sabar katahin Noah manampa kapale. Baya kare oloh je aton intu kapal bewei — hanya biti samandiaie — je inyalamat bara danum soho te.

²¹Nah, taloh je manjadi te manjadi paribasa akan pampandoi je manyalamat keton katika toh. Pampandoi jetoh dia ie gawin sombayang hapan mamparasih biti bara kare kapapan like, tapi kilau janjin keton dengan Hatalla, lembut bara atei je bahalap. Pampandoi jete manyalamat keton karana Yesus Kristus jari belom haluli bara pampatei,

²²tuntang jari mandai’ akan sorga. Toh ie mimbing kuasa hinje dengan Hatalla tuntang marentah kakare malekat, kakare panguasa tuntang kakare taloh je kuasa.