Read Ngaju 1 PETRUS 4 Bible Online

1 PETRUS 4 - Ngaju bible

1 PETRUS 4

¹Awi Kristus jari buah kapehe secara biti bereng, keton kea musti mampaabas arep keton hapan tirok je sama kilau te. Basa oloh je buah kapehe secara biti bereng, dia hindai mawi dosa.

²Tagal te, keleh keton belom katahin tisan andau pambelom keton hong kalunen toh manumon kahandak Hatalla, tuntang dia manumon kipen kalunen.

³Hong katika je mahalau, keton jari sukup katahie malalus taloh je eka karajin kare oloh je dia mangasene Tuhan. Keton belom dia bahalap. Keton manumon angat kipen keton, mambusau arep, pesta-barami, mihop tuntang manyembah dewa je bakajile-jilek.

⁴Toh oloh je dia mangasene Tuhan, heran awi keton dia omba belom kilau ewen, je mangkeme kamangat dosa jaton bara tikas. Jete sababe ewen te mahina keton.

⁵Tapi kareh ewen musti meton tanggung jawab manaharep Hatalla je jari tatap uka mahakim oloh belom tuntang oloh matei.

⁶Jete sababe Barita Bahalap jari insanan kea akan kare oloh matei. Rimae, iete uka ewen je jari ihakim tumon ampin biti-bereng — sama kilau kare oloh je ihakim — tau belom tumon ampin roh, iete manumon kahandak Hatalla.

⁷Taloh handiai jari tokep wayah kahapuse, tagal te keleh keton mahaga arep keton tuntang barendeng, mangat keton tau balakudoa.

⁸ Je paham mambatang haliai, iete keleh keton toto-toto hasinta sama arep keton, basa awi malalus sinta, keton mampun are dosa.

⁹Keleh keton hasambut sama arep keton huang gagenep human keton, hapan kahias atei.

¹⁰Genep bitin keton jari manarima kare panenga je hakabeken ampie bara Hatalla. Tagal te kilau oloh bahalap je halaluan kare panengan Hatalla te, keleh keton mangguna kataun keton te akan gunan arep keton samandiai.

¹¹Oloh je manyampai barita, keleh ie manyampai barita bara Hatalla; oloh je manyang oloh beken, keleh ie manyang hapan kaabas bara Hatalla, uka huang kakare hal Hatalla tau imapahai mahalau Yesus Kristus. Ie te je kuasa tuntang patut impahai sampai katatahie. Amen.

¹²Pahari handiai je inyinta! Katika toh keton paham manyarenan kapehe awi keton buah tingkes. Tapi ela keton heran, kila-kilau aton taloh je dia puji bahut buah keton.

¹³Tapi keleh keton sanang haream awi keton omba manyarenan kapehe hayak dengan Kristus. Maka kareh amon kahain Kristus imparahan, keton tau hanjak rantang.

¹⁴Ontong keton amon keton ihina oloh awi keton murid Kristus. Rimae, intu keton te aton Roh je tinduh barasih, iete Roh Hatalla.

¹⁵Ije mahin ela aton bara keton je buah kapehe awi ie oloh pamuno, atawa panakau, atawa oloh papa, atawa awi ie omba campur urusan oloh beken.

¹⁶Tapi amon keton buah kapehe awi keton oloh Kristen, ela mahamen tagal hal te. Keleh manarimakasih akan Hatalla, awi keton mimbit aran Kristus.

¹⁷Katikae jari sampai, Hatalla mahakim kalunen. Tuntang ungkup ain Hatalla kabuat je kareh ihakim labih helo. Nah, amon Hatalla kareh manampara dengan itah, kilen ampie kajariae kareh dengan kare oloh je dia percaya dengan Barita Bahalap bara Hatalla te?

¹⁸ Huang Surat Barasih inyurat kalotoh, “Amon kare oloh bahalap mahin jari bahali inyalamat, kilen hindai taloh je manjadi akan kare oloh badosa je dia mangasene Tuhan!”

¹⁹Awi te, amon aton kare oloh je manyarenan kapehe tagal Hatalla, tuntang ie mangahandak kalote, keleh kare oloh te belom bujur tuntang manenga lepah kaharape tuntang kapercayae dengan Je Manjapa ie. Hatalla kareh harajur malalus kare janjin Aie.