Read Ngaju 1 PETRUS 5 Bible Online

1 PETRUS 5 - Ngaju bible

1 PETRUS 5

¹Aku balaku uka kare pamimpin ungkup keton pahias manantuani auhku. Aku manyurat jetoh kilau ije biti bara kare pamimpin tuntang kilau oloh je jari puji manyaksi kabuat kapehen Kristus tuntang je kareh omba kea impahai amon kahain Kristus impahai akan oloh kalunen. Aku balaku nyame-nyame

² uka keton manyakatik kawan tabiri je inyarah Hatalla akan keton. Keleh manyakatik ewen dengan sanang atei sama kilau je ingahandak awi Hatalla, tuntang ela mahapan kabehat atei. Ela kea malalus gawin keton hapan manggau ontong, malengkan awi keton toto-toto handak mahaga.

³Ela malalus taloh kilau oloh je mimbing kuasa taharep kare ewen je inyarah akan keton, tapi keleh keton manjadi sonto akan ewen.

⁴Tuntang hong katika Sakatik Hai te dumah kareh, keton kareh manarima makota je mahalendang je dia tau kusam pahalendange.

⁵ Kalote kea pahari, kare oloh tabela. Keleh mamenda kare oloh je bakas. Pahari handiai musti mamparandah arep tuntang mandohop sama arep keton hapan karandah atei. Basa huang Surat Barasih tarasurat kalotoh, “Hatalla malawan oloh je bajoho, tapi sinta oloh je randah atei.”

⁶ Tagal te, keleh mamparandah arep keton hong penda lengen Hatalla je kuasa, mangat ie manggatang keton amon sampai katikae.

⁷Keleh manyarah kakare kagogop-kakenang atei keton akan Hatalla, basa ie manantuani keton.

⁸Keleh keton barendeng tuntang bajaga! Basa setan te musoh keton. Ie sama kilau singa mananjong kanih-kate mangaruntong manggau taloh kinae.

⁹Keleh malawan ie hapan kapercaya je dehen, basa keton katawan kare paharin itah awang beken je sama-sama Kristen hong hapus kalunen kea buah kapehe kilau keton.

¹⁰Tapi limbah keton buah kapehe hanjulo, Hatalla kabuat kareh manjadian keton manjadi oloh je tinduh barasih. Ie kareh mampendeng hayak mampaabas keton palus mandehen keton. Awi ie te Hatalla je paham bahalap atei, je jari mantehau keton mangat omba mangkeme katinduh-kahain Aie je katatahie mahalau Kristus.

¹¹Ie te je kuasa sampai katatahie! Amen.

¹² Suratku je pandak toh inyuratku akan keton dengan pandohop Silas, je ianggapku ije biti pahari Kristen je baketep. Aku mipen manantiring keton tuntang mampalembut kapercaya intu keton tahiu taloh je inyuratku toh basa jetoh barita je toto tahiu asin Hatalla. Keleh keton mimbing asi te dehe-dehen.

¹³ Kare kawal itah ungkup hong Babilon[4] je iintih kea awi Hatalla, mampait tabe akan keton; kalote kea anakku Markus je inyinta.

¹⁴Kaleh keton hatabe sama arep keton hapan salepah sinta kilau pahari sama-sama oloh Kristen. Keleh Tuhan manenga kasanang akan pahari samandiai je manjadi oloh ain Kristus. Hormat ikei, Petrus