Read Ngaju 2 PETRUS 1 Bible Online

2 PETRUS 1 - Ngaju bible

2 PETRUS 1

¹Pahari handiai je toto-toto percaya sama kilau ikei! Yesus Kristus, iete Hatalla tuntang Raja Panyalamat itah, jari manenga kapercaya te akan itah, awi Ie malalus taloh je buah. Surat toh bara Simon Petrus, ije biti rewar tuntang rasul ain Yesus Kristus.

²Keleh Hatalla manenga berkat tuntang kasanang je hakutoh akan keton, awi keton mangasene Hatalla tuntang Yesus, Tuhan itah.

³Hatalla jari mahapan kuasan kahatallan Aie uka manenga akan itah kare taloh handiai je inggau itah mangat belom manyembah Ie. Ie malalus jete mahalau taloh je ingatawan itah tahiu Yesus Kristus, je jari mantehau itah uka mangkeme[1] kahain Aie tuntang kahalap Aie.

⁴Hapan cara jete Hatalla manenga akan itah kare berkat barega tuntang je manangkalau kahalape je jari injanji Awie. Hapan kare berkat te keton tau lapas bara kare kipen papa je marusak kalunen jetoh, tuntang keton manarima sipat kahatalla.

⁵Tagal te, keleh manggau jalan toto-toto uka keton tetep percaya dengan Kristus tuntang kapercayan keton te indehen awi pambelom je bahalap. Hayak dengan pambelom je bahalap, keton perlu manjadi oloh je aton pangatawan,

⁶tuntang hayak dengan pangatawan, keton musti kea tau mahaga arep. Tuntang beken bara mahaga arep keleh keton kea mahaga arep mangat sabar manaharep taloh handiai. Hayak dengan kasabar manaharep taloh handiai, keton musti kea belom manumon kahandak Hatalla.

⁷Tuntang belom manumon kahandak Hatalla musti kea inyuang hapan sinta asi dengan kare pahari je sama hong kapercaya. Tuntang tinai keleh sinta asi ain keton dengan kare pahari je sama hong kapercaya te indahang hapan sinta dengan oloh handiai.

⁸Kare sipat je kilau te uras perlu akan keton. Amon kare sipat jete are intu keton, keton tau manjadi oloh je rajin tuntang bahasil, tuntang tau mangasene Yesus Kristus Tuhan itah dengan labih bahalap hindai.

⁹Tapi kare oloh je jaton tempon kare sipat jete, panampayahe simit; ie dia tau mite tuntang ie kalapean je kare dosae je jari halau te jari imparasih.

¹⁰Tagal te, pahari handiai, keleh keton labih pahias tinai manggau jalan uka Hatalla mandehen keton je jari intehau Awie tuntang iintih Awie. Amon keton malalus hal te, maka keton kareh dia mundur bara kapercayan keton.[2]

¹¹Awi kalote keton kareh inenga salepah hak uka tame Karajaan je katatahie ain Tuhan tuntang Raja Panyalamat itah Yesus Kristus.

¹²Tagal te, aku harajur mampingat keton tahiu hal te, aloh keton jari mangatawan tuntang percaya toto dengan auh ajar ain Hatalla je jari inarima keton te.

¹³Katahin aku magon belom, aku mangkeme patut mampingat keton tahiu hal te.

¹⁴Basa aku katawan dia tahi hindai aku malihi kalunen toh, awi Tuhan itah Yesus Kristus jari mansanan tarang akangku tahiu hal te.

¹⁵Maka aku kareh manggau jalan uka aloh limbah aku jari matei, keton harajur mingat haluli kakare taloh te.

¹⁶Hong katika ikei mansanan akan keton kapaham ampin kahain panumah Tuhan itah Yesus Kristus, ikei dia bahapang dengan kare sarita tampan oloh kalunen. Kahain Kristus te jari gitan ikei hapan matan ikei kabuat.

¹⁷ Ikei aton intu hete katika ie ihormat tuntang impahai awi Hatalla Bapa. Katika te tarahining auh bara Ie je Barasih Haliai, je hamauh dengae, “Ikau toh anak-Ku je inyinta-Ku. Ie manyanang atei-Ku!”

¹⁸Ikei kabuat mahining auh te lembut bara sorga katika ikei aton hayak dengae intu hunjun bukit je barasih te.

¹⁹Jete sababe ikei labih percaya tinai dengan peteh Hatalla je imbarita awi kare nabi. Keleh keton manantuani auh peteh toh, basa peteh te sama kilau sumbo je paha-pahai hong eka je kaput sampai andau tokep balawa, tuntang katarang bintang sawah hanyala huang atei keton.

²⁰Je mambatang haliai keleh keton mingat jetoh: Peteh Hatalla je inyampai awi kare nabi dia tau irima manumon tirok kabuat.

²¹Basa dia puji peteh ain Hatalla te imbarita baya awi kahandak oloh kalunen. Tapi Roh Hatalla manguasa oloh uka manyampai peteh bara Hatalla kabuat.