Read Ngaju 2 PETRUS 2 Bible Online

2 PETRUS 2 - Ngaju bible

2 PETRUS 2

¹Hong katika je halau hong marak ungkup ain Hatalla jari lembut kare nabi pananjaro. Kalote kea intu marak keton kareh lembut kare guru pananjaro. Ewen kareh manamean kare auh ajar je dia bujur, je mawi oloh binasa. Tuntang ewen kareh milim Panguasa je jari mambebas ewen. Awi kalote ewen mampalembut kabinasa akan arep ewen kabuat, je akan bajeleng buah ewen.

²Aloh kalote, are oloh kareh omba manuntut cara belom ain guru pananjaro te je inguasa awi angat kipen ewen. Tuntang gawin kare guru te mawi are oloh mahina Jalan Bujur je manalih Hatalla.

³Awi ewen hasilo, maka kare guru pananjaro te kareh manyarita akan keton taloh je ingarang ewen kabuat mangat mandino ontong bara keton. Tapi hakim hapa mahukum ewen te jari tahi inatap, tuntang kabinasa je jari inukas akan ewen toh puna jari mentai ewen.

⁴Kare malekat je badosa mahin dia Hatalla malapas bara hukum, malengkan inganan akan huang naraka. Ewen inamean akan huang tiwing je kaput[3] uka inahan intu hete sampai Andau Pengadilan.

⁵ Kalote kea dengan kalunen hong jaman horan, Hatalla dia malapas ie bara hukuman. Hatalla mampadumah danum soho akan lewun kare oloh papa hong katika te. Baya Noah dengan uju biti oloh beken te ih je inyalamat, awi Noah mansanan barita tahiu pambelom je manyanang atei Hatalla.

⁶ Kalote kea tahiu lewu Sodom tuntang Gomora: Hatalla mambinasa kare lewu te hapan apui mangat manjadi sonto tahiu taloh je kareh manjadi mawi kare oloh papa.

⁷ Tapi Lot inyalamat, awi ie manumon kahandak Hatalla; ie buah kapehe paham ganan hadat dasar je dia sanonoh ain kare oloh papa.

⁸Hong marak kare oloh je kilau te Lot je oloh bahalap te belom manyarenan kapehen atei, basa genep andau ie mite tuntang mahining kare gawin ewen je papa.

⁹Jadi, Tuhan katawan kilen ampie manyalamat kare oloh je manumon kahandak Ayue katika ewen manaharep kare tingkes. Tuntang Tuhan katawan kilen ampie manahan kare oloh papa uka ingapehe hong Andau Pengadilan,

¹⁰je mambatang haliai kare oloh je manumon angat kare kipen ewen je papa tuntang je mahina kuasan Hatalla. Kakai ampie kahanyi tuntang kalecak kare guru pananjaro te sampai ewen dia mikeh mahina kare taloh belom je barasih hong sorga!

¹¹Aloh kare malekat je labih abas tuntang labih kuasa bara kare guru pananjaro te, jaton bahanyi mandawa kare taloh belom je paham ihormat te mahapan kare auh je mahina intu taharep Tuhan.

¹²Tapi kare guru te, dia lue-luen! Ewen sama kilau meto je inakan tantai akan indu impatei ih. Ewen jaton mahapan tirok, tapi bagawi mahapan pangkeme bewei, sampai kare hal je dia ewen haratie inyarang ewen hapan kare auh je mahina. Tagal te awi gawin ewen te kabuat, ewen kareh binasa sama kilau kare meto basiak.

¹³Kilau akan baleh kapehe je impalembut awi ewen te, ewen kareh buah kasusah kapehe je paham. Akan ewen, taloh je manyanang atei iete malalus taloh en bewei metoh andau balawa hapan maluput angat kipen isin ewen. Amon ewen mondok hinje keton hong pesta kuman, ampin tingkah ewen mawi itah bajilek awi ewen babusau awi angat kipee.

¹⁴Ewen jaton peda mawi dosa, tuntang je eka karajin ewen iete manampayah oloh bawi lontei. Tuntang je harue percaya tuntang magon tapas kadehen kapercayae, palus omba layau. Atei ewen jari patuh dengan kakoho. Ewen te oloh je tarasapa!

¹⁵ Awi ewen dia maku manumon jalan je bujur, maka ewen layang. Ewen manduan jalan je ihoroi awi Bileam anak Beor horan. Bileam toh mipen toto mandino duit bara gawie je papa.

¹⁶Tapi ie paham impingat tagal kapapae te, katika kalidai ayue hakotak hapan auh kalunen. Maka nabi te imaksa uka ie terai nguan gawie je gila te.

¹⁷Kare guru pananjaro te jete sama kilau tahasak danum je keang tuntang sama kilau asep je inamput riwut barat. Hatalla jari manatap akan ewen ije eka je kaput toto.

¹⁸Ewen manguan kare auh je tama-tamam tuntang hayang; angat kipen je harayap ihapan ewen uka mampalawo kare oloh je harue lapas bara marak oloh je belom layau.

¹⁹Kare guru pananjaro te manjanji kamardekaan akan kare oloh te, padahal ewen kabuat ihajipen awi kare hadat je marusak kalunen. Basa amon oloh impakalah awi ije taloh, maka ie te jipen taloh je mampakalah ie te.

²⁰Oloh je mangasene Tuhan tuntang Panyalamat itah Yesus Kristus jari lapas bara kare kuasan kalunen je marusak olon. Tapi amon rahian ie injarat tinai sampai impakalah awi kare kuasa te, maka kajariae ampin oloh te labih papa bara solake.

²¹Labih bahalap kare oloh je macam te dia puji mangasene jalan je bujur ain Hatalla, bara ewen mangasene jete, tapi limbah te dia maku manumon kare parentah je inenga Hatalla akan ewen.

²² Taloh je ilalus ewen te jete bukti akan katoton auh paribasa toh, “Aso te kareh kuman haluli taloh je jari iutae,” tuntang “Bawoi je jari impandoi, kareh haluli mambaring arepe intu kalabangan.”