Read Ngaju 1 YOHANES 2 Bible Online

1 YOHANES 2 - Ngaju bible

1 YOHANES 2

¹O anakku samandiai! Aku manyurat jetoh akan keton mangat keton dia mawi dosa. Tapi amon aton oloh je mawi dosa, maka ain itah aton ije pandohop, iete Yesus Kristus je adil te; Ie kareh balaku akan itah intu taharep Bapa.

²Mahalau Yesus Kristus te ih kare dosan itah iampun. Tuntang dia ie dosan itah bewei, tapi dosan salepah kalunen kea.

³Amon itah rajin manumon kare parentah Hatalla, jete tandae itah mangasene Hatalla.

⁴Oloh je hamauh, “Aku mangasene Hatalla,” tapi dia manumon kare parentah Ayue, oloh te pananjaro, tuntang Hatalla jaton huang ateie.

⁵Tapi oloh je manumon auh Hatalla, oloh te sinta Hatalla dengan tinduh-barasih. Jete tandae itah belom hinje dengan Hatalla.

⁶Eweh je hamauh ie belom hinje dengan Hatalla, ie musti manuntut jalan ain Kristus.

⁷ Pahari handiai je inyinta! Taloh je inyuratku toh dia ie parentah je taheta. Jetoh parentah je jari tahi inyampai akan keton bara metoh keton manampara percaya dengan Kristus; iete barita bara Hatalla je jari ihining keton bihin.

⁸Aloh kalote, parentah je inyuratku toh taheta kea; awi kabujur tuntang katotoe Ie tau inampayah hong bitin Kristus tuntang huang arep keton. Basa kakaput sasar nihau tuntang kalawa je toto jari gitan kalawae.

⁹Oloh je hamauh ie aton hong kalawa tapi oloh te magon basingi paharie, sampai toh oloh te magon hong kakaput.

¹⁰Oloh je sinta paharie oloh te belom hong kalawa sampai jaton taloh en-en intu oloh te je tau mawi oloh beken[3] manjato hong dosa.

¹¹Tapi oloh je basingi dengan paharie, ie aton hong kakaput. Ie mananjong huang kakaput, tuntang jaton katawan akan kueh tintun tanjonge, basa kakaput te mawi ie dia tau mite.

¹²Aku manyurat akan keton, kare Anakku, awi dosan keton jari iampun tagal Kristus.

¹³Aku manyurat akan keton, kare bapa, basa keton mangasene Ie je jari aton bara tamparae. Aku manyurat akan keton, kare oloh tabela, awi keton jari mampakalah Taloh Papa.

¹⁴Aku manyurat akan keton, kare anak oloh, awi keton mangasene Hatalla Bapa. Aku manyurat akan keton, kare Bapa, awi keton mangasene Auh je jari aton bara tamparae. Aku manyurat akan keton, kare oloh tabela, awi keton abas. Auh bawak kotak ain Hatalla aton huang atei keton, tuntang keton jari mampakalah Taloh Papa.

¹⁵Ela sinta kalunen jetoh atawa en bewei je aton hong kalunen toh. Amon keton sinta kalunen keton dia sinta Bapa.

¹⁶Kare taloh samandiai je aton hong kalunen toh — je ingipen awi sipat olon je badosa, je inampayah balalu ingahandak tuntang je impatamam — kakare taloh te dia dumah bara Bapa tapi bara kalunen.

¹⁷Kalunen tuntang kare taloh awang huange je eka kipen oloh kalunen, sasar lilap. Tapi oloh je manumon kahandak Hatalla, tetep belom sampai katatahie.

¹⁸Anakku samandiai, kalepah kalunen jari tokep! Helo bihin jari insanan akan keton, iete, Musoh Kristus kareh dumah; tuntang toh jari lembut are oloh je malawan Kristus. Jete tandae wayah kalepahe jari tokep.

¹⁹Kare Musoh Kristus te iete kare oloh je jari malihi itah, awi ewen te sapunae dia ie oloh itah. Jaka ewen te oloh itah, batantu ewen tetep hinje itah. Tapi ewen malihi itah, mangat tarang batantu toto, ije mahin jaton bara ewen te je toto-toto tame baris itah.

²⁰Tapi keton jari manarima Roh Hatalla je impamohon awi Yesus Kristus tuntang jete sababe keton uras mangasene ajar je bujur.

²¹Jadi aku manyurat jetoh akan keton dia awi keton dia mangasene ajar je bujur, tapi awi keton katawan haream, tuntang keton kea katawan je huang ajar je bujur te jaton tanjaro.

²²Oloh je mananjaro jete oloh je hamauh koae, Yesus te dia ie Raja Panyalamat je injanji Hatalla. Oloh te Musoh Kristus; ie dia mangaku Bapa atawa Anak kea.

²³Oloh je dia mangaku Anak, rimae dia mangaku Bapa kea. Tuntang oloh je mangaku Anak, rimae manarima Bapa kea.

²⁴Tagal te barita je jari ihining keton bara metoh keton nampara percaya keleh keton mahagae bua-buah huang atei keton. Amon keton manantuani barita te bua-buah keton kareh belom hinje dengan Anak tuntang dengan Bapa.

²⁵Tuntang jetoh ie je injanji Kristus kabuat akan itah: pambelom je bujur tuntang katatahie.

²⁶Aku manyurat jetoh akan keton tahiu kare oloh je manggau jalan mananjaro keton.

²⁷Tapi tahiu keton kabuat, Kristus jari mampamohon Roh Ayue akan keton. Tuntang katahin Roh te aton intu keton, dia usah oloh beken majar keton. Basa Roh te majar keton tahiu taloh handiai; tuntang taloh je iajar Awie te bujur toto, dia tanjaro. Awi te, keleh keton manumon taloh je iajar awi Roh te, tuntang keleh keton tetep belom hinje dengan Kristus.

²⁸Jadi, anakku samandiai, keleh tetep belom hinje dengan Kristus, mangat kareh hong katika Ie dumah, itah manaharep Ie hapan salepah kamenteng, tuntang itah dia manyahokan arep itah awi itah mahamen.

²⁹Keton jari katawan Kristus te belom harajur manumon kahandak Hatalla. Awi te keton musti katawan kea je gagenep oloh je belom manumon kahandak Hatalla, ie te anak Hatalla.