Read Ngaju 1 YOHANES 3 Bible Online

1 YOHANES 3 - Ngaju bible

1 YOHANES 3

¹ Keleh mite kapaham Hatalla sinta itah, sampai itah inarima kilau anak Ayue. Tuntang puna kare itah toh uras anak Hatalla. Jete bukue kalunen je papa toh dia mangasene itah, awi kalunen dia mangasene Hatalla.

²Pahari handiai je inyinta! Wayah toh, itah toh anak Hatalla, tapi ampin itah rahian kareh dia lalau tarang. Tapi itah katawan amon Kristus dumah, itah kareh manjadi sama kilau Ie, awi itah kareh mite Ie tumon ampin Ayue je kapunae.

³Oloh handiai je aton mingkes kaharap jete intu taharep Kristus, mahaga arepe mangat toto-toto barasih, barasih bara dosa sama kilau Kristus kea barasih.

⁴Oloh je mawi dosa, malanggar parentah Hatalla; basa dosa te puna kalangkah taharep parentah Hatalla.

⁵ Keton katawan je Kristus dumah uka mampuas kare dosan olon,[4] tuntang intu Ie dia aton dosa.

⁶Kare oloh je belom hinje dengan Kristus, dia olih raju-rajur mawi dosa. Oloh je harajur mawi dosa, dia puji mite Kristus atawa mangasene Ie.

⁷Anakku samandiai, ela keton manalua oloh eweh bewei, mampalayang keton. Oloh je malalus kahandak Hatalla jete anak Hatalla sama kilau Kristus te Anak Hatalla.

⁸Tapi oloh je raju-rajur mawi dosa jete anak setan, basa setan te badosa bara tamparae. Akan jete Anak Hatalla dumah iete uka mampalomos gawin Setan.

⁹Oloh je jari manjadi Anak Hatalla, dia raju-rajur mawi dosa, awi sipat Hatalla kabuat aton intu ie. Tuntang awi Hatalla te Bapae, maka ie dia tau raju-rajur mawi dosa.

¹⁰Jetoh ie kabekee, anak Hatalla dengan anak setan: ewe-eweh je dia handak malalus kahandak Hatalla, atawa dia sinta paharie, ie te dia anak Hatalla.

¹¹ Bara tamparae barita jetoh jari inyampai akan keton: Itah musti hasinta sama arep itah.

¹² Ela itah kilau Kain, je manjadi anak setan tuntang mampatei paharie kabuat. En bukue Kain mampatei paharie? Awi kare taloh je ilaluse te sala, tapi kare taloh je ilalus paharie te bujur.

¹³Tagal te, Paharingku samandiai, ela heran amon kare oloh kalunen toh basingi dengan keton.

¹⁴ Itah katawan, itah jari balua bara pampatei, tuntang mindah akan pambelom. Itah katawan jete, awi itah sinta sama arep itah kilau oloh hampahari. Oloh je dia sinta, rimae oloh te magon inguasa awi pampatei.

¹⁵Oloh je basingi paharie ie te pamuno, tuntang keton katawan, oloh pamuno te jaton dinon pambelom je bujur tuntang katatahie.

¹⁶Hapan jalan jetoh itah mangatawan kilen ampie itah hasinta sama arep itah: Kristus jari manyarah pambelom Ayue akan itah. Tagal te, itah kea musti manyarah pambelom itah akan kare paharin itah!

¹⁷Amon oloh je are ramoe mite paharie huang katapas, tapi dia maku mandohop paharie te, kilen ampie oloh te tau manyewut arepe sinta Hatalla?

¹⁸O kare anakku! Ela keton sinta baya huang totok biwih atawa baya kotak bewei. Keleh itah sinta hapan sinta je bujur, je imbukti hapan gawin itah.

¹⁹Hapan cara kalote itah katawan itah toh puna bujur anak Hatalla, tuntang atei itah tau sanang intu taharep Hatalla.

²⁰Itah katawan amon atei itah mandawa itah, pangatawan Hatalla te labih hai bara pangatawan atei itah, tuntang Ie katawan taloh handiai.

²¹Jadi, o Paharingku je inyinta, amon atei itah dia manyalan itah, itah tau manaharep Hatalla hayak dia mikeh.

²²Tuntang taloh je ilaku itah intu Ie, itah tau mandinoe, awi itah manumon kare parentah Ayue tuntang manyanang atei Aie.

²³ Taloh je irentah Awie akan itah iete: Itah musti percaya dengan Anak Ayue, iete Yesus Kristus, tuntang itah musti hasinta sama arep itah, kilau je jari inyoho Kristus akan itah.

²⁴Oloh handiai je manumon kare parentah Hatalla, belom hinje dengan Hatalla, tuntang Hatalla hinje dengan ewen. Tuntang itah katawan je Hatalla belom hinje dengan itah, awi ie jari manenga Roh Ayue akan itah.