Read Ngaju HAKIM 11 Bible Online

HAKIM 11 - Ngaju bible

HAKIM 11

¹Yepta te ije biti tantara je menteng bahanyi. Ie melai intu Gilead. Bapae bagare Gilead tapi indue ije biti lontei.

²Bapae te aton kea kare anak hatue je beken bara sawae je sah. Limbah kare anake te jari bujang, ewen maharak Yepta bara huma. Koan ewen dengae, “Ikau dia akan dinon warisan en-en bara bapa ikei, awi ikau anak bara oloh bawi beken.”

³Awi te Yepta hapisah bara kare paharie te palus haguet tuntang melai intu tanah Tob. Intu hete ije baris oloh papa pakat dengae balalu ewen haguet marampok.

⁴Pire-pire katikae limbah te oloh Israel inyarang awi oloh Amon.

⁵Metoh taloh te manjadi, kare pamimpin oloh Israel intu Gilead haguet tuntang mamakat Yepta malihi tanah Tob.

⁶Ewen hamauh, “Keleh mamimpin ikei malawan oloh Amon.”

⁷Tapi Yepta tombah, “En keton dia paham manyingi aku? Keton jari maharak aku bara human bapaku. Mbuhen toh keton metoh huang kapehe, dumah talih aku?”

⁸Ewen tombah, “Ikei dumah, awi ikei nahuang ikau mamimpin hapus oloh lewu Gilead uka mamarang bangsa Amon toh kea.”

⁹Tombah Yepta, “Amon keton mamakat aku haluli akan Gilead akan mamarang bangsa Amon, tuntang TUHAN manenga kamanang akan itah, aku je akan manguasa keton.”

¹⁰Ewen tombah, “Ikei nahuang, TUHAN saksie.”

¹¹Palus Yepta haguet haya-hayak dengan kare pamimpin Gilead. Limbah te oloh lewu Gilead mangkat ie jadi panguasa tuntang pamimpin. Tinai intu taharep TUHAN hong Mispa, Yepta mansanan kare taloh je inuntute dengan oloh lewu Gilead.

¹²Limbah te Yepta manyoho oloh manalih raja Amon mangat mansanan kalotoh, “Narai kasalan ikei sampai keton mamarang lewun ikei?”

¹³Raja bangsa Amon tombah auh kare sarohan te, “Metoh ungkup Israel dumah bara Misir, ewen manduan tanah ain ikei, nampara bara Sungei Arnon sampai akan Sungei Yabok tuntang Sungei Yordan. Toh lian tanah te dia usah itah parang.”

¹⁴Palus Yepta manyoho tinai kare oloh manalih raja Amon,

¹⁵uka tombah kalotoh, “Ungkup Israel samasinde dia marampas tanah oloh Moab atawa tanah oloh Amon.

¹⁶Metoh oloh Israel malihi Misir, ewen manintu telok Akaba mahalau padang pasir palus sampai Kades.

¹⁷ Limbah te ewen manyoho oloh manalih raja Edom mangat balaku mahalau lewue. Tapi ie dia manyoho ewen. Limbah te balaku taloh je sama kilau te kea dengan raja Moab, tapi ie kea dia manyoho ewen mahalau tanahe. Awi te ungkup Israel melai intu Kades.

¹⁸ Limbah te ewen marajur jalanae mahalau padang pasir, tapi dia mahalau tanah Edom tuntang Moab, malengkan manduan jalan kaliling palus sampai intu dipah silan hila timor Moab, intu dipah Sungei Arnon. Ewen mampendeng kemah intu hete tapi dia dimpah sungei te, awi tanah te tame tanah Moab.

¹⁹ Limbah te ungkup Israel manyoho oloh akan Sihon, raja Amori intu Hesbon uka balaku mangat tau mahalau tanah Amori, awi ewen nahuang manalih tanah ewen kabuat.

²⁰Tapi Sihon dia manyoho ewen awi ie dia percaya je ewen baya handak mahalau bewei. Ie mairak hapus pasukan parange haream, palus manampa ekae manahan intu Yahas limbah te manyarang Israel.

²¹Tapi TUHAN, Hatallan Israel, manenga akan ungkup Israel kamanang bara Sihon dengan pasukan parange. Kalote oloh Israel mandino kare petak oloh Amori je melai intu lewu te,

²²Tanah Amori je induan ewen te nampara bara Arnon sampai silan hila utara Sungei Yabok, tuntang bara padang pasir intu hila timor, sampai Sungei Yordan silan hila barat.

²³Jadi, TUHAN, Hatallan Israel te je maharak kare oloh Amori tagal ungkup TUHAN.

²⁴Tuntang toh, en ikau handak manduae haluli? Tanah je inenga awi Kamos, dewam te, mangat tau tetep ayun keton. Tapi taloh je inenga TUHAN, Hatallan ikei akan ikei, akan ihaga ingalindong ikei.

²⁵ Ikau mangira ikau labih bahalap bara Balak anak Sipor raja Moab? Balak dia puji manyaing atawa parang dengan ikei.

²⁶Telo ratus nyelo katahie Israel manguasa Hesbon tuntang Aroër dengan kare lewu hakaliling, tuntang uras lewu intu saran Sungei Arnon. Tuntang mbuhen katahin te ikau dia manduae haluli?

²⁷Dia, ikei dia basala dengam. Ikau te je sala awi manyarang ikei. TUHAN te je hakim je andau toh mamutus perkaran bangsa Israel dengan bangsa Amon.”

²⁸Tapi raja Amon dia paduli auh peteh bara Yepta te.

²⁹Limbah te roh TUHAN manguasa Yepta. Palus Yepta haguet manalih tanah Gilead tuntang Manase limbah te haluli akan Mispa intu Gilead. Bara hete ie marajur pangguete akan tanah bangsa Amon.

³⁰Yepta mawi janji toh dengan TUHAN, “Amon TUHAN manyoho aku mampakalah oloh Amon,

³¹tuntang aku haluli dengan salamat, maka eweh bewei je sola-solake balua bara humangku akan manyambut aku, kareh iluputku kilau parapah je ingehu akan TUHAN.”

³²Palus Yepta dimpah Sungei Yordan akan mamarang oloh Amon, tuntang TUHAN manenga kamanang akae.

³³Yepta mamarang ewen sakalepahe bara Aroër sampai tanah tokep Minit, samandiaie due puluh kalewu, tuntang sampai tikas Abel-Keramim. Are toto oloh Amon je matei sampai ewen kalah malawan oloh Israel.

³⁴Metoh Yepta haluli akan Mispa, anake je bawi dumah manambang ie manari sambil mamantu tarabang. Jete anake je tunggal.

³⁵ Sana Yepta mitee, Yepta palus paham kapehe atei sampai ie marabit bajue, sambil hamauh, “Kayah anakku, hancor ateiku! Mbuhen balalu ikau je mawi ateiku susah? Aku jari sumpah dengan TUHAN, tuntang dia tau tinai aku mambalange.”

³⁶Palus koan anak bawi te dengan Yepta, “Bapa jari sumpah dengan TUHAN, tuntang TUHAN jari manyoho bapa mambaleh kapapan kare oloh Amon, musoh bapa te. Jadi, taloh je jari injanji bapa, keleh ilalus bapa.”

³⁷“Baya” koan oloh bawi te tinai, “aku aton ije palaku: Tenga akangku katika due bulan akan tanjo-tanjong[9] intu petak habukit haya-hayak dengan kare kawalku. Intu hete aku kareh manatum kajariangku, awi aku kareh matei metoh magon bujang.”

³⁸Bapae manumon kahandake tuntang manyoho ie haguet. Anak bawi te tuntang kare kawale haguet akan petak habukit mimbit kapehen atei intu hete, awi ie kareh matei sahelo bara ie kawin tuntang dinon anak.

³⁹Limbah halau due bulan, ie buli talih bapae, palus bapae malalus taloh je jari injanjie dengan TUHAN. Anak bawi te palus matei metoh ie magon bujang. Jete tamparae mbuhen intu marak oloh Israel, jadi kapatuh

⁴⁰kare anak bawi bujang haguet katahin epat andau genep nyelo omba pehe atei mingat anak Yepta intu Gilead.