Read Ngaju HAKIM 12 Bible Online

HAKIM 12 - Ngaju bible

HAKIM 12

¹Hong katika te suku Epraim tata-tatap handak parang, palus haguet dimpah Sungei Yordan manintu Sapon. Ewen hamauh dengan Yepta, “Mbuhen ikau haguet mamarang bangsa Amon dia mimbit ikei? Ikei kareh mamapui ikau tuntang hapus humam.”

²Hamauh Yepta, “Marak oloh Amon tuntang ikei oloh Gilead aton kasuat je hai. Keton jari intehauku uka mandohop maliwus aku bara kare oloh Amon te, tapi keton dia dumah.

³Jadi, limbah aku katawan keton dia bakae dumah mandohop aku, aku selang haguet mamarang kare oloh Amon te, aloh aku manaharep pampatei. Palus TUHAN manenga akangku kamanang malawan ewen. Mbuhen toh keton dumah manyarang aku?”

⁴Limbah te Yepta mamumpong uras oloh Gilead, balalu ewen mamarang tuntang mampakalah oloh Epraim. (Oloh Gilead je melai intu Epraim tuntang Manase jari indawa awi oloh Epraim ewen jari mamisah arep bara Epraim, suku ayue).

⁵Kare oloh Gilead je metoh parang te, manguasa kare eka dimpah intu Sungei Yordan, mangat tau mimpa kare oloh Epraim je handak hadari. Amon ije biti oloh Epraim je handak hadari, tuntang balaku uka tau dimpah, te kare oloh Gilead misek ie, “En ikau oloh Epraim?” Amon ie tombah, “Dia”,

⁶ewen manyoho ie manyewut kotak “Shibolet”. Ie kareh manyewut “Sibolet” awi dia tau manyewut kotak te tumon puna sewute. Palus ewen manyingkape tuntang mampateie intu ije eka dimpah te. Maka oloh Epraim je buah patei metoh te aton 42.000 biti.

⁷Jahawen nyelo katahie Yepta mamimpin oloh Israel. Limbah te ie matei tuntang ingubur intu lewun ayue[10] iete Mispa hong Gilead.

⁸Limbah Yepta, ungkup Israel imimpin awi Ebsan bara Betlehem.

⁹Ebsan aton anak hatue telo puluh biti tuntang telo puluh biti anak bawi. Kare anake je bawi te ingawin dengan kare oloh bara suku beken. Ie manduan telo puluh oloh bawi bara suku beken akan kare anake je hatue. Uju nyelo Ebsan mamimpin ungkup Israel.

¹⁰Limbah te ie matei tuntang ingubur intu Betlehem.

¹¹Limbah Ebsan, ungkup Israel imimpin awi Elon bara suku Sebulon sapuluh nyelo katahie.

¹²Limbah te ie matei palus ingubur intu Ayalon hong tanah Sebulon.

¹³Limbah Elon ungkup Israel imimpin awi Abdon anak Hilel bara Piraton.

¹⁴Anake je hatue aton epat puluh biti, tuntang kare esoe je hatue aton telo puluh biti. Sining bitin ewen aton tempon ije kongan kalidai je tau inungkang. Hanya nyelo katahie ungkup Israel imimpin awi Abdon.

¹⁵Limbah ie matei palus ingubur intu Piraton hong tanah Epraim intu tanah habukit ain oloh Amalek.