Read Ngaju HAKIM 13 Bible Online

HAKIM 13 - Ngaju bible

HAKIM 13

¹Oloh Israel badosa tinai taharep TUHAN, palus TUHAN manalua oloh Pilistin manguasa ewen katahin epat puluh nyelo.

²Hong katika te aton ije biti oloh hatue intu lewu Sora. Arae Manoah, bara suku Dan. Sawae tamanang.

³Tapi hong sinde andau malekat TUHAN mamparahan arepe akae tuntang hamauh, “Katahin toh ikau dia tau dinon anak. Tapi dia tahi tinai ikau kareh batihi, tuntang mandino ije biti anak hatue.

⁴Awi te haga arepm bua-buah. Ela mihop anggor atawa mihop taloh ihop bahari, atawa kuman taloh je papa.

⁵ Limbah anakm te inakan, ela samasinde manggunting balaue, awi bara huang kanai ie jari inantu manjadi oloh nasir.[11] Ie te je kareh parang akan maliwus bangsa Israel bara kuasan oloh Pilistin.”

⁶Limbah te sawan Manoah haguet manalih banae hayak hamauh, “Aton sarohan Hatalla dumah talih aku; ampie kilau malekat Hatalla, sampai aku mikeh. Aku dia misek bara kueh ie dumah, tuntang ie kea dia mansanan arae akangku.

⁷Tapi ie hamauh aku kareh akan mandino ije biti anak hatue. Ie hamauh kea je aku dia tau mihop anggor tuntang taloh ihop bahari, atawa kuman taloh je pali, awi anak te akan inyarah akan Hatalla mangat jadi oloh nasir hapus pambelome.”

⁸Mahining auh te, Manoah palus balaku doa intu TUHAN, kalotoh, “TUHAN keleh Ikau manyoho rewarm tinai manalih ikei uka mansanan taloh je patut iawi ikei dengan anak te limbah ie inakan.”

⁹Hatalla mahining palakun Manoah. Malekat TUHAN te dumah tinai metoh sawan Manoah mondo-mondok intu tana. Metoh te banae jaton intu hete.

¹⁰Ie palus hadari mansanan taloh te akae, “Item, oloh je andau te dumah talih aku te, dumah tinai!”

¹¹Manoah balalu manuntut sawae. Ie manokep oloh te tuntang misek, “En tuan je mimbit barita akan sawangku?” “Toto,” koae.

¹²Palus Manoah misek, “Amon taloh je insanan Tuan te jadi tulus kareh, narai je patut ilalus awiku akan anak te? Kilen ampin pambelome kareh?”

¹³Tombah malekat TUHAN te, “Sawam dia tau mihop anggor atawa taloh ihop bahari, tuntang kea dia tau kuman taloh je bara batang anggor, atawa taloh je papa. Ie musti malalus uras taloh je jari insanangku akae. Haga uka jaton ije je dia ilalus awie.”

¹⁵Palus koan Manoah dengae, “Keleh tuan mentai hanjulo. Ikei kareh mampakasak helo kambing tabela akan tuan.”

¹⁶Tapi malekat TUHAN te hamauh, “Aloh aku mentai intu hetoh, aku dia akan kuman taloh je inyarongam te. Tapi amon ikau maku kea manyarongae, sarongan te kilau parapah je ingehu, tuntang luput jete akan TUHAN.” Manoah hindai kasene je hamauh dengae te iete malekat TUHAN. Jadi ie hamauh, “Amon kalote, keleh tuan mansuman aram, uka amon taloh je insanan tuan te tulus kareh, ikei tau manenga hormat ikei akan tuan.”

¹⁸Malekat TUHAN te misek, “Narai sababe ikau nahuang katawan arangku? Arangku te aran je eka kaheran.”

¹⁹Palus Manoah manduan ije kongan kambing tabela dengan isut gandom, balalu mandake intu hunjun batu tuntang malupute akan TUHAN, iete TUHAN je mawi kare taloh heran.[12]

²⁰Metoh apui hanyala akan hunjun mesbeh te, Manoah tuntang sawae mite malekat TUHAN te mandai akan hunjun huang nyalan apui te, manintu langit. Harue Manoah katawan je jete malekat TUHAN; maka ie dengan sawae sontop manyembah. Dia puji ewen mite malekat te tinai.

²²Koan Manoah dengan sawae, “Itah akan matei awi itah jari mite Hatalla!”

²³Sawae tombah, “Amon TUHAN handak mampatei itah, batantu Ie dia maku manarima parapah je iluput itah akae te. Ie kea dia mamparahan uras taloh toh akan itah atawa mansanan taloh je jari insanan Awie te akan itah.”

²⁴Pire-pire bulan limbah te sawan Manoah te manak ije biti anak hatue palus ie manggare arae Simson. Anak te sasar hai tuntang imberkat TUHAN.

²⁵Metoh ie melai intu kemah suku Dan, je aton intu helat Sora dengan Estaol, Roh TUHAN nampara manenga kaabas akae.