Read Ngaju HAKIM 14 Bible Online

HAKIM 14 - Ngaju bible

HAKIM 14

¹Sinde andau Simson haguet akan Timna. Ie mite ije biti oloh bawi intu hete.

²Palus ie buli tuntang hamauh dengan oloh bakase, “Aku handak dengan ije bawin oloh Pilistin intu Timna. Aku balaku bapa tuntang umai haguet misek ie.”

³Tapi oloh bakase hamauh, “Mbuhen ikau haguet akan eka oloh Pilistin uka mandino sawam, padahal ewen dia tame ungkup TUHAN? En huang jalahan itah kabuat atawa marak hapus suku itah jaton ije biti oloh bawi je eka huangm?” Tombah Simson dengan bapae, “Tapi bawin oloh Pilistin te eka karajingku. Aku harap bapa maku misek ie akangku.”

⁴Oloh bakas Simson dia katawan je kahandak TUHAN mawi Simson malalus taloh te. Awi TUHAN metoh manggau hila akan mamarang oloh Pilistin. Metoh te oloh Pilistin manguasa oloh Israel.

⁵Maka Simson haguet akan Timna haya-hayak dengan oloh bakase. Metoh ewen mahalau ije kabon anggor, Simson hasondau dengan ije kongan singa tabela.

⁶Singa te manyakungkong, palus nyalenga Simson abas awi kuasan TUHAN. Balalu ie mamisak singa te hapan lengee, kila-kilau meto te baya ije kongan kambing. Taloh te dia ie mansanae akan oloh bakase.

⁷Limbah te Simson manalih oloh bawi te hayak bapande-pander dengae, tuntang Simson rajin dengae.

⁸Limbah pire-pire katahie Simson haguet tinai uka kawin dengan oloh bawi te. Intu huang pangguete ie mahiwang handak mite hantun singa je jari impateie te. Metoh sampai intu hete ie mite are toto bajanyi intu hantun singa te, tuntang aton kea mado.

⁹Ie mangaraut mado te akan huang lengee, palus mananjong sambil kuman mado te. Limbah te ie haguet manalih akan oloh bakase hayak manenga kea belahe mado te akan ewen, tuntang ewen kumae. Tapi Simson dia mansanan je mado te induae bara hantun singa.

¹⁰Limbah bapa Simson haguet akan human oloh bawi te, Simson mawi pesta intu hete, awi tumon te hadat kare oloh tabela.

¹¹Katika oloh Pilistin mite ie, ewen mintih telo biti oloh tabela hapa mangawal ie.

¹²Palus Simson hamauh dengan ewen, “Aku aton lelei. Amon keton tau manarang rimae, sining bitin keton kareh inengaku ije katetek benang lena je lamos tuntang ije stel pakaian je bahalap. Keton inengaku uju andau katahin pesta kawin toh, uka manarang rimae.

¹³Tapi amon keton dia tau manarange, sining bitin keton manenga akangku benang lena lamos tuntang ije stel pakaian je bahalap.” Kare oloh Pilistin te hamauh, “Tau. Toh sewut lelei te!”

¹⁴Simson hamauh, “Bara je kuman, balua je kinan; bara je abas, balua je manis,” Limbah halau telo andau, ewen hindai tau kea manarang riman lelei te.

¹⁵Jadi hong andau je kaepat ewen hamauh dengan sawan Simson, “Ikau ngantau banam mangat ie maku mansanan akan ikei riman lelei te. Amon dia ikei kareh mamapui ikau dengan hapus human bapam. Ampie ikau narawei ikei mangat mampalepah panatau ikei!”

¹⁶Awi te, sawan Simson haguet talih Simson sambil manangis, palus hamauh, “Aku katawan ikau dia sinta aku, mbuhen ikau manenga lelei akan kare kawalku? Tantu ikau manyingi aku!” Koan Simson, “Entai helo! Akan oloh bakasku kabuat mahin dia aku mansanae, mbuhen akam salenga insanan?”

¹⁷Katahin uju andau pesta te, sawan Simson harajur manangis. Awi ie harajur musok, maka hong andau je kauju Simson mansanan riman lelei te akae. Palus sawan Simson te mansanae akan kare oloh Pilistin.

¹⁸Jadi, hong andau je kauju sahindai matanandau belep, kare oloh lewu te hamauh dengan Simson, “Narai taloh je labih manis bara mado? tuntang narai kea je labih abas bara singa?” Simson tombah, “Amon keton dia manyoho sawangku, keton dia baka tau marima lelei te!”

¹⁹Salenga Simson abas awi kuasan TUHAN, palus haguet akan Askelon. Intu hete ie mampatei telo biti oloh hatue je hapakaian bahala-halap. Ie manduan pakaian ewen te tuntang manengae akan telo biti oloh je jari manarima lelei te. Limbah te ie buli akan humae marak ateie nyasa-nyasal.

²⁰Balalu empoe manenga sawan Simson te akan oloh je jari mandengan Simson intu katika pangawie.