Read Ngaju HAKIM 15 Bible Online

HAKIM 15 - Ngaju bible

HAKIM 15

¹Pire-pire katahie limbah te, metoh wayah getem gandom, Simson haguet manalih sawae. Ie mimbit ije kongan kambing tabela akan sawae te. Palus Simson hamauh dengan empoe, “Aku handak akan kamar mangat hasondau dengan sawangku.” Tapi empoe je hatue dia manyohoe.

²Koae dengan Simson, “Nyangkaku ikau toto-toto basingi dengae, maka jari inengaku ie akan kawalm. Tapi ikau tau manduan andie. Ie labih bahalap.”

³Simson hamauh, “Taloh je ilalusku dengan oloh Pilistin sinde toh dia kasalangku!”

⁴Palus ie haguet manyingkap telo ratus sarigala. Ikoh sarigala te imetenge badue-badue. Intu bohol petenge te ingkese ije obor.

⁵Limbah te ie manotong kare obor te palus malapas kare sarigala te akan kare tanan oloh Pilistin. Uras gandom je jari inggetem intu hete balalu bakeho. Gandom je imbul tuntang kare kabon anggor mahin tamput bakeho kea.

⁶Kare oloh Pilistin haguet mariksa eweh je mawi taloh te. Balalu oloh mansanan akan ewen iete Simson je mawi taloh te, awi empoe intu Timna jari manenga sawan Simson akan ije biti kawal Simson. Awi te kare oloh Pilistin mamapui oloh bawi te tuntang dengan human bapae sampai lepah.

⁷Palus koan Simson dengan kare oloh Pilistin te, “Dia patut gawin keton te. Aku sumpah dia maku melai suni bewei amon aku hindai mambaleh taloh toh dengan keton!”

⁸Limbah te ie manyarang ewen dengan kakarase tuntang mampatei are biti oloh bara marak ewen. Limbah te ie haguet palus melai intu huang goha intu ije bukit batu intu Etam.

⁹Oloh Pilistin dumah akan tanah Yuda palus mampendeng kemah intu hete, limbah te manyarang lewu Lehi.

¹⁰Oloh Yuda misek dengan oloh Pilistin, “Mbuhen keton manyarang ikei?” Ewen tombah, “Ikei dumah handak manyingkap Simson mangat ikei tau mawi ie kilau ie mawi ikei.”

¹¹Mahining auh te, balalu haguet 3.000 biti oloh Yuda akan goha hong bukit batu intu Etam. Intu hete ewen hamauh, “Simson en ikau dia katawan je oloh Pilistin manguasa itah? En toh je jari iawim dengan ikei?” Simson tombah, “Aku baya mambaleh taloh je iawi ewen dengangku.”

¹²Koan ewen, “Ikei dumah uka mamasong tuntang manyarah ikau akan oloh Pilistin.” Simson hamauh, “Keleh bajanji helo tahiu keton kabuat dia akan mampatei aku.”

¹³“Yoh,” koan ewen, “toto ikei handak mamasong tuntang manyarah ikau akan oloh Palistin. Ikei dia handak mampatei ikau.” Palus ewen mamasong ie mahapan due tali je magon taheta, tuntang mimbit ie bara goha te.

¹⁴Metoh Simson imbit sampai Lehi, kare oloh Pilistin hadari manalih ie sambil manyorake. Salenga ie abas awi kuasan TUHAN. Kare tali je mamasong lengee te inggetoe kakai bewei kila-kilau jaka tali te tali je bakehu.

¹⁵Limbah te ie sondau tulang ijang ije kongan kalidai je magon taheta. Ie manduan tulang te, palus mahapae hapa mamukul sakoyan biti sampai matei.

¹⁶Palus Simson manyanyi, “Hapan ijang kalidai, injeraku sakoyan biti; hapan ijang kalidai, inuyokku[13] kare hantun ewen.”

¹⁷Limbah te, ie manganan tulang ijang te. Jete sababe eka te inyewut Ramat-Lehi.[14]

¹⁸Limbah te Simson mangkeme paham teah belaie, sampai ie mangkariak intu TUHAN. Ie hamauh, “TUHAN, harun ih Ikau manenga kamanang je hai toh akangku. Toh, en aku patut matei awi kateah belai sampai kare oloh Pilistin je dia kasene Ikau toh manyingkap aku?”

¹⁹Balalu Hatalla muap rombak intu batu Lehi te, palus danum balua bara hete. Simson mihop, limbah te mangkeme barigas haluli. Jete bukue tahasak te inyewut Tahasak Danum Hakor.[15] Tahasak toh magon aton intu Lehi.

²⁰Due puluh nyelo katahie Simson mamimpin oloh Israel metoh ewen inguasa oloh Pilistin.