Read Ngaju HAKIM 16 Bible Online

HAKIM 16 - Ngaju bible

HAKIM 16

¹Sinde andau Simson haguet akan Gasa. Intu hete ie hasondau dengan ije biti lontei palus ie haguet batiroh dengan oloh bawi te.

²Oloh Gasa mahining Simson aton intu hete. Ewen mangapong eka te tuntang mentai ie hapus alem intu lawang lewu. Tapi ewen dia mawi taloh en-en hong alem te awi ewen manirok, “Kareh, amon matanandau lembut harun itah mampatei ie.”

³Tapi Simson dia batiroh intu hete sampai hanjewu. Bentok alem ie misik palus haguet akan lawang lewu. Ie manjawut bauntonggang te dengan kare jihie tuntang dengan kare huite sama sinde. Limbah te ie metoe balalu mimbite akan puncak bukit intu dipah Hebron.

⁴Limbah te Simson sinta ije oloh bawi bara Sorek. Aran oloh bawi te Delila.

⁵Maka aton lime biti oloh je manguasa Pilistin manalih oloh bawi te tuntang hamauh, “Ngatau Simson mangat ie mansanan akam narai rahasia kaabase. Tuntang kilen ampin carae uka manganan kaabase te. Kalote ikei tau dumah tuntang mamasong ie uka mampakalah ie. Kareh genep bitin ikei manenga akam sakoyan saratus duit perak.”

⁶Koan Delila dengan Simson, “Mbuhen ikau paham abas? Hapan narai ikau imasong mangat nihau kaabasm te? Coba sanan rahasiae!”

⁷Simson tombah, “Amon aku imasong dengan uju tali taheta je hindai lalau keang, aku akan balemo tuntang jadi sama kilau oloh are ih.”

⁸Palus kare panguasa Pilistin te manenga akan Delila uju tali taheta je hindai keang toto. Limbah te, metoh oloh Pilistin mentai intu kamar je beken, Delila mameteng Simson hapan kare tali te sambil hamauh, “Simson! oloh Pilistin dumah!” Palus Simson manggeto kare tali te. Kare tali te bageto kilau lawai je bageto buah apui. Jadi narai je mawi Simson te abas hindai ingatawan.

¹⁰Koan Delila dengan Simson, “Ikau mananjaro! Ikau baya mureh aku. Ayo, nyarita akangku hapan narai ikau tau imeteng!”

¹¹Tombah Simson, “Amon aku imeteng hapan tali taheta je hindai puji ihapan, aku akan balemo tuntang jadi sama kilau oloh are ih.”

¹²Metoh oloh Pilistin mentai intu kamar je beken, Delila manduan pire-pire tali je taheta, balalu mameteng Simson. Limbah te ie mangkariak! “Simson! Oloh Pilistin dumah!” Tapi Simson manggeto tali te hapan lengee kilau oloh manggeto lawai.

¹³Palus koan Delila dengan Simson, “Ikau mureh aku tinai. Ikau mananjaro. Ayo sanan hapan narai ikau tau injarat!” Simson tombah, “Amon uju juntai balauku injawet intu lawai benang je inantang, limbah te imeteng intu kayu hapa manantang te, aku kareh balemo tuntang jadi sama kilau oloh are ih.”

¹⁴Delila mawi Simson tapatiroh palus ie mandare uju juntai balau Simson intu lawai benang je inantang. Limbah te ie mametenge intu kayu hapa manantang palus mangkariak, “Simson! Oloh Pilistin dumah!” Simson palus misik tuntang manyintak balaue sampai lapas bara pakakas hapan manantang te.

¹⁵Limbah te koan Delila dengae, “Koam, ikau sinta aku tapi ateim kejau bara aku! Jari hantelo ikau mananjaro aku, tuntang sampai toh ikau dia maku mansanan mbuhen ikau kalote kaabasm.”

¹⁶Genep andau Delila harajur ih musok tuntang jua-juan, sampai Simson peda mahininge.

¹⁷Kajariae Simson manyarita rahasiae. “Balauku hindai puji inetek,” koan Simson. “Aku jari inyarah akan Hatalla jadi je ingabeken tantai Akae bewei. Bara katika inakan aku jadi ije biti nasir.[16] Amon balauku inetek, kaabasku akan nihau; aku akan belom tuntang jadi sama kilau oloh are ih.”

¹⁸Delila mangkeme Simson jari mansanan rahasia ateie. Awi te ie mampait kabar toh akan kare oloh kuasa intu Pilistin, “Dumah sinde toh ih tinai. Simson jari manyarita rahasiae akangku.” Ewen palus dumah tuntang mimbit duit akan Delila.

¹⁹Limbah te Delila mamasut Simson sampai tapatiroh intu pangkuae. Palus ie mantehau oloh tuntang manyoho manetek ije juntai balau Simson. Limbah te ie magapehe Simson, awi Simson jari nihau kaabase.

²⁰Ie balalu mangkariak, “Simson! Oloh Pilistin dumah!” Simson misik tuntang manyangka ie tau liwus kilau je jadi-jadi. Ie dia katawan TUHAN jari malihi ie.

²¹Palus kare oloh Pilistin manyingkap ie tuntang mangaruit bawak matae. Ewen mimbit ie akan Gasa tuntang mameteng ie dengan due rantai tambaga, palus manameae akan huang panjara. Intu hete ie inyoho bagawi manggiling.

²²Tapi katahin te kea balaue nampara lembut tinai.

²³Sinde andau kare panguasa Pilistin hapumpong handak pesta tuntang maluput parapah je hai akan Dagon, dewan ewen. Ewen manyanyi, “Dewa itah jari manenga akan itah kamanang malawan Simson musoh itah!”

²⁴Metoh ewen hanja-hanjak, ewen hamauh, “Imbit Simson akan hetoh mangat ie akan tatawen itah!” Ewen manduan Simson bara panjara, tuntang ie jadi akan tantawen ewen. Ewen manyoho ie mendeng helat due jihi je hai. Metoh oloh are te mite Simson, ewen manara Dagon tuntang manyanyi, “Dewan itah jari manenga akan itah kamanang bara musoh je jari marusak lewun itah tuntang mampatei paham are oloh itah!”

²⁶Koan Simson dengan anak hatue je ngagalan ie, “Lapas lengengku, uka aku tau mimbing kare jihi je mandehen huma toh, awi aku handak basinggoh intu hete.”

²⁷Huma hai te seke-serek awi oloh are. Lime oloh kuasa intu Pilistin mahin aton intu hete. Tuntang intu loteng huma te aton lakau 3.000 biti oloh. Ewen uras manonton tuntang manawah Simson.

²⁸Metoh te Simson balakudoa; ie hamauh, “O TUHAN je pangkahai, keleh ikau mingat aku. Keleh tenga kaabas akangku sinde toh ih tinai, O Hatalla, uka dengan gawi toh aku tau mambaleh gawin oloh Pilistin je jari mangaruit bawak matangku.”

²⁹Limbah te Simson mimbing due jihi intu bentok je manyangga huma te. Palus sambil mimbing hapan lenge sambile intu jihi je ije tuntang lenge gantaue intu jihi je beken,

³⁰ie mangkariak, “Nauh aku matei haya-hayak dengan oloh Pilistin toh!” Tuntang dengan salepah kaabase ie manjuju kare jihi te sampai baderep mawi lime oloh kuasa intu Pilistin hayak uras oloh je beken je aton intu hete. Simson matei. Tapi, metoh pampateie te ie jari mampatei oloh labih are bara metoh katahin ie belom.

³¹Limbah te kare paharie dumah hayak uras tondah jalahae uka manduan hantue. Ewen mimbit hantue te buli, tuntang mangubure huang kuburan Manoah, bapae. Kuburan te aton intu helat Sora tuntang Estaol. Simson jari mamimpin oloh Israel due puluh nyelo katahie.