Read Ngaju HAKIM 18 Bible Online

HAKIM 18 - Ngaju bible

HAKIM 18

¹Katika te intu Israel jaton ati raja. Suku Dan magon manggau-nggau eka akan jadi petak danum ewen; awi ewen hindai kea dinon petak hayak kare suku beken intu huang bangsa Israel.

²Awi te ewen mintih lime biti oloh je gagah bara marak hapus jalahan huang suku ewen je melai intu Sora tuntang Estaol. Palus ewen manyoho lime biti oloh te mangalati lewu te. Kare oloh te palus haguet, tuntang sampai intu tanah habukit hong tanah Epraim. Intu hete ewen baramalem intu human Mikha.

³Metoh handak tame huma te ewen mahining oloh tabela Lewi je hakotak, tuntang ewen kasene logate. Ewen manalih ie tuntang misek, “Mbuhen ikau intu hetoh? Eweh je mimbit ikau?”

⁴Oloh tabela te tombah, “Aku intu hetoh awi Mikha. Ie te je mangkat aku jadi imam ayue, tuntang manenga gajih akangku.”

⁵Koan ewen dengae, “Amon kalote dohop isek dengan Hatalla, en pangguet ikei toh kareh aton hasile atawa dia.”

⁶Tombah imam te, “Ela mikeh. TUHAN jari mamberkat pangguet keton toh.”

⁷Limbah te lime biti oloh te haguet akan Lais. Intu hete ewen manantuani oloh lewu. Batantu je cara belom oloh hong lewu Lais te kilau cara pambelom bangsa Sidon. Aloh ewen mangabuat tuntang kejau bara bangsa Sidon, ewen belom tadoh sanai, dia aton musoh, ewen belom sanang jaton bara katapas taloh en-en.

⁸Katika lime biti oloh te haluli manalih kare oloh suku ayue intu Sora tuntang Estaol, ewen ilaku uka manenga laporan.

⁹Ewen palus hamauh, “Ayo itah manyarang Lais. Ikei jari akan hete, tuntang mite tanah te puna bahalap, lombah tuntang jaton bara katapas, saraba aton. Ela melai bewei hong hetoh tuntang dia malalus taloh en-en. Gulong akan hete tuntang marabut lewu te. Keton kareh mite oloh lewu te samasinde dia manyangka handak inyarang. Ikei percaya Hatalla jari manenga lewu toh akan keton.”

¹¹Awi te, 600 biti suku Dan, palus haguet bara Sora tuntang Estaol. Dengan pakakas parang je sukop.

¹²Ewen haguet akan hila barat Kiryat-Yearim intu tanah Yuda balalu mampendeng kemah intu hete. Jete bukue eka te magon inyewut eka kemah Dan.

¹³Bara hete ewen mananjong palus akan tanah habukit intu Epraim sampai akan human Mikha.

¹⁴Lime biti oloh kalati je solake inyoho te hamauh dengan kare kawale, “En keton katawan intu ije bara kamar huma toh aton hampatong je hakalukop perak? Aton kea hampatong beken tuntang epod. Coba nirok taloh je patut ilalus itah.”

¹⁵Palus ewen haguet akan human Mikha, eka oloh tabela Lewi te melai, tuntang misek ampin keadaae.

¹⁶Metoh te jahawen ratus tantara suku Dan, je uras mahapan pakakas parang te, magon aton intu baun lawang.

¹⁷Lime oloh kalati te balalu tame akan huang huma, palus manduan hampatong kayu je ingalukop perak te hayak dengan kare hampatong beken tuntang Epod. Oloh tabela Lewi te metoh mendeng dengan jahawen ratus tantara te intu lawang.

¹⁸Metoh lime oloh kalati te tame akan huang human Mikha tuntang manduan Epod dengan kare hampatong dewa te, oloh tabela Lewi te misek, “Narai toh je iawi keton?”

¹⁹Ewen tombah, “Suni! Ela misek. Ikau omba dengan ikei, kareh ikau jadi imam akan ije suku!”

²⁰Oloh tabela Lewi te sanang dengan auh te. Jadi ie manduan Epod tuntang hampatong dewa te balalu omba dengan ewen.

²¹Palus oloh are te marajur pangguet ewen, inanselo awi anak oloh, meto tuntang ramon ewen.

²²Metoh ewen jari kejau, Mikha mantehau kare oloh hakalilinge balalu haya-hayak manggoang kare oloh suku Dan te. Sana tokep dengan ewen,

²³Mikha dengan kare oloh ayue te mangkariak dengan ewen. Kare oloh suku Dan te tampaliau tuntang misek Mikha, “Narai? Mbuhen dumah dengan kalote kare biti?”

²⁴Mikha tombah, “Keton marabut kare hampatongku tuntang imamku, sampai aku jaton bara taloh en-en tinai, palus keton hamauh, ‘Aton narai?’ ”

²⁵Koan kare oloh suku Dan te, “Labih bahalap suni; ela sampai kare oloh toh sangit tuntang manyarang ikau. Kareh ikau tuntang hapus keluargam matei.”

²⁶Limbah hamauh kalote kare oloh suku Dan te marajur pangguet ewen. Mikha mite ewen te kejau labih kuat bara ie, awi te ie mules palus buli.

²⁷Limbah kare oloh suku Dan te mimbit imam tuntang kare ramo tampan Mikha te hadari, ewen haguet manyarang Lais, lewu je oloh lewue belom tadoh sanai. (Lewu te aton huang ije janah dengan lewu Bet-Rehob). Kare oloh Dan te mampatei uras oloh lewu Lais balalu mangehu lewu te. Jaton ije oloh je mandohop kare oloh Lais te awi eka ewen mangabuat tuntang kejau bara Sidon. Balalu oloh Dan mamangun haluli lewu te palus melai intu hete.

²⁹Aran lewu te ingganti ewen jadi Dan, manumon aran tato hiang ewen, iete Dan, anak Yakob.

³⁰Hampatong dewa je imbit ewen te, palus impendeng ewen intu lewu te balalu mangkat Yonatan, anak Gerson eson Moses jadi imam ewen. Turonan Gerson toh tatap jadi imam suku Dan te sampai wayah ungkup Israel iunda tuntang inganan akan lewu beken.

³¹Hampatong dewa tampan Mikha te tetep intu Lais katahin Kemah TUHAN aton intu Silo.