Read Ngaju HAKIM 19 Bible Online

HAKIM 19 - Ngaju bible

HAKIM 19

¹Metoh Israel hindai aton raja, aton ije biti oloh Lewi melai intu eka je kejau bara lewu, hong tanah habukit Epraim. Ie manduan ije biti oloh bawi bara Betlehem Yuda jadi gundike.

²Tapi limbah te oloh bawi te sangit [18] dengae, sampai ie haluli akan human bapae intu Betlehem. Limbah oloh bawi te melai intu hete epat bulan katahie,

³oloh Lewi te haguet manyak ie uka mangatau ie mangat haluli dengae. Ie haguet hayak mimbit dengae ije biti jipen tuntang due kongan kalidai. Sana sampai intu kanih, oloh bawi te mimbit ie akan bapae. Metoh bapa oloh bawi te mite ie, ie manambange dengan kahanjak,

⁴tuntang mamaksa ie uka ela buli. Awi te ie melai katahin telo andau tuntang kuman mihop hayak bamalem intu hete hayak dengan gundike te.

⁵Intu andau je kaepate, ewen misik hanjewu toto palus tata-tatap handak haguet. Tapi bapa oloh bawi te hamauh dengan oloh Lewi te, “Kuman helo mangat kuat; keton tau tolak limbah te.”

⁶Palus oloh Lewi te mondok balalu kuman mihop haya-hayak dengan bapa oloh bawi te. Tapi metoh ie mendeng handak haguet; bapa oloh bawi te mangataue mangat ela haguet. “Nyana-nyanang arep keton ih helo,” koae “tuntang bamalem intu hetoh.” Oloh Lewi te palus melai intu hete ije alem tinai.

⁸Intu andau je kalime, hanjewu toto, metoh ie handak tolak, bapa oloh bawi te hamauh tinai, “Ayo, kuman helo; hanjulo hindai tolak.” Maka ewen due kuman hayak tuntang rangka-rangkah sampai matanandau nampara belep.

⁹Limbah te, metoh oloh Lewi te hayak gundike tuntang jipee handak tolak, bapae te hamauh, “Andau jari tokep hamalem hanjulo tinai kaput. Labih bahalap bamalem ih intu hetoh tuntang sana-sanang. Jewu keton tau misik hanjewu uka tolak tuntang buli.”

¹⁰Tapi oloh Lewi te dia maku bamalem hete tinai. Ie tuntang gundike haguet, haya-hayak dengan jipee tuntang due kalidaie je mahapan lapik pondok. Metoh andau handak hamalem, ewen sampai tokep Yebusi (iete Yerusalem). Palus jipen te hamauh dengan tuae, “Tuan keleh itah tende tuntang bamalem intu lewun oloh Yebusi toh ih.”

¹²Tapi tuae tombah, “Dia! Itah dia kareh tende intu eka je oloh lewue dia oloh Israel. Ayo itah marajur pangguet isut tinai tuntang kareh bamalem intu Gibea atawa Rama.”

¹⁴Awi te ewen mananjong tinai tuntang dia tende intu Yebusi. Matanandau jari belep metoh ewen sampai intu Gibea hong tanah suku Benyamin.

¹⁵Ewen tende intu hete handak bamalem, palus tame intu lewu tuntang haguet mondok intu alun-alun. Tapi jaton oloh je marawei ewen akan humae uka bamalem.

¹⁶Metoh ewen mondok intu lapangan lewu, ije biti oloh bakas je harun buli bara gawie intu tana dumah. Ie sapunae bara tanah habukit Epraim tapi metoh te melai intu Gibea (Oloh lewu je belom intu Gibea iete oloh Benyamin).

¹⁷Metoh oloh bakas te mite oloh Lewi te intu alon-alon, ie misek, “Pahari bara kueh, tuntang handak akan kueh?”

¹⁸Oloh Lewi te tombah, “Ikei harun dumah akan Betlehem hong Yuda. Ikei metoh huang pangguet buli bara huma[19] hong eka je kejau bara lewu intu petak habukit Epraim. Aku asale bara hete. Jaton ije bara oloh lewu toh je maku manarima ikei intu humae uka bamalem.

¹⁹Ikei dia perlu en-en je beken, bahatan ikei sukop. Aton oru tuntang panginan akan kalidai ikei; aton rote tuntang anggor akangku tuntang sawangku dengan jipengku.”

²⁰Palus koan oloh bakas te. “Ela gaer kareh aku mandohop. Dia usah baramalem intu alun-alun toh.”

²¹Limbah te ie mimbit ewen akan humae balalu manenga panginan akan kalidai ewen. Tuntang limbah kare oloh maja te menyau paie, ewen kuman.

²² Metoh ewen sana-sanang salenga huma te ingapong awi kare oloh papa hadate bara lewu te. Ewen manega-negah bauntonggang tuntang hamauh dengan oloh bakas te, “Sarah akan ikei oloh hatue je imbitm akan humam. Ikei handak hinje dengae!”

²³Oloh bakas te balua tuntang hamauh dengan ewen, “Ela, kare pahari! Aku balaku ela mawi taloh je papa tuntang dia patut kilau te, awi ie oloh maja ayungku.

²⁴Kareh aku manenga ih gundike tuntang anak oloh bawi aingku akan keton. Tau ih keton mameda belai keton dengan ewen. Tapi ela mawi en-en je papa dengan oloh maja aingku te!”

²⁵Tapi awi kare oloh papa hadat te tetep mangaras, maka oloh Lewi te manggian gundike te balua akan ewen. Palus ewen marayap oloh bawi te dia tera-terai sampai hanjewu.

²⁶Tokep sawah oloh bawi te haluli, tapi intu bauntonggang eka banae bamalem, ie tujah. Limbah matanandau lembut ie magon aton intu hete.

²⁷Hanjewu te, metoh banae misik tuntang muap bauntonggang handak haguet, ie mite gundike halelek intu baun huma te hayak lengee bahimbing intu bauntonggang.

²⁸“Mendeng,” koae dengae, “Ayo itah haguet.” Tapi oloh bawi te dia tombah awi ie jari matei. Palus ie manggatang oloh bawi te tuntang minae hunjun kalidai, limbah te haguet buli akan humae.

²⁹ Sampai intu huma, ie tame tuntang manduan pisau, limbah te manete-netek hantun gundike te jadi due walas katetek. Limbah te, ie mangirim kare tetek te akan due walas bangsa Israel ije katetek akan genep suku.

³⁰Uras oloh je mite te hamauh, “Hindai puji taloh kilau toh manjadi, bara ungkup Israel balua bara Misir sampai andau toh. Itah dia tau suni. Itah musti barunding akan mamaleh!”