Read Ngaju HAKIM 2 Bible Online

HAKIM 2 - Ngaju bible

HAKIM 2

¹Malekat TUHAN haguet bara Gilgal akan Bokhim tuntang hamauh dengan kare oloh Israel, “Aku jari mampalua keton bara Misir, tuntang mimbit keton akan lewu je jari injanji-Ku dengan tato hiang keton. Jari insanang-Ku kea, ‘Janjing-Ku dengan keton dia akan imbalang awi-Ku.

² Awi te keton dia tau mawi janji dengan oloh tanah toh. Kare Mesbeh ewen musti keton manderepe.’ Tapi keton dia malalus taloh je irentah-Ku te. Malengkan jari malalus taloh je hakalawan haream!

³Awi te, toh hining! Aku dia akan maharak oloh lewu toh amon keton parang dengan ewen. Ewen akan jadi musoh keton tuntang keton kareh buah jarat, sampai keton omba manyembah kare dewan ewen.”

⁴Limbah malekat te jari manyampai barita te, hapus bangsa Israel manangis hai auhe.

⁵Jete bukue eka te inyewut Bokhim. [5] Palus intu eka te ungkup Israel maluput parapah akan TUHAN.

⁶Limbah Yosua malapas kare oloh Israel haguet, ewen palus haguet mangat manguasa tanah je jadi bagin gagenep suku ewen mije-mije.

⁷Katahin Yosua belom, oloh Israel manempo TUHAN. Kalote kea limbah Yosua jari matei ewen magon tetep manempo TUHAN katahin ewen imimpin awi kare oloh je jari mite kabuat kare taloh heran je ilalus TUHAN akan oloh Israel.

⁸Yosua anak Nun — rewar TUHAN te — malihi kalunen hong umur saratus sapuluh nyelo.

⁹ Ie ingubur intu petak ayue kabuat, iete intu Timnat-Serah hong tanah habukit Epraim hila utara Bukit Gaas.

¹⁰Limbah te hapus angkatan te matei kea. Angkatan je manuntut rahian dia kasene TUHAN, awi ewen dia puji sangkum taloh je jari ilalus TUHAN akan bangsa Israel.

¹¹Limbah te oloh Israel mawi dosa taharep TUHAN. Ewen haluli tinai dia manyembah TUHAN, Hatallan tato hiang ewen, iete Hatalla je jari mimbit ewen balua bara Misir. Ewen manampara manyembah Baal tuntang Astoret hayak kare dewa beken je inyembah awi kare bangsa intu hakaliling ewen. Tagal te TUHAN sangit dengan ewen balalu manalua ewen inyarang tuntang irampok awi kare kawan rampok. Ewen sama sinde jaton kaolihe manaharep kare musoh ewen.

¹⁵Sasining ewen haguet parang, TUHAN malawan ewen, sama kilau je jari impingat Awie akan ewen. Palus ewen mandino kajake je paham hai.

¹⁶Kinjap TUHAN ulang-ulang tinai manenga akan ewen pamimpin je manggau jalan maliwus ewen bara kawan rampok.

¹⁷Tapi ewen dia manumon auh kare pamimpin te. Ewen manyembah kare hatalla beken, tuntang dia baketep intu TUHAN. Ewen dia manumon sonto je iawi tato hiang ewen je tuhit dengan kare parentah TUHAN.

¹⁸Amon TUHAN manenga ije pamimpin akan bangsa Israel, TUHAN harajur mandohop pamimpin te. Tuntang katahin pamimpin te magon belom, TUHAN harajur malapas ewen bara kare musoh ewen. Ie masi dengan ewen amon ie mahining ewen manarahing awi ingapehe tuntang ihenyek.

¹⁹Tapi amon kare pamimpin te jari matei bangsa te belom labih papa bara angkatan je helo. Ewen manempo kare hatalla beken tuntang manyembah kare hatalla te. Ewen haluli akan hadat ewen je papa tuntang dia maku mobah ampin hadat ewen.

²⁰Awi te TUHAN paham sangit dengan ungkup Israel, tuntang hamauh, “Aku jari marentah tato hiang bangsa toh uka mimbing janji bara Aku dengan ewen. Tapi bangsa toh manggeto peteng janji te; ewen malanggar parentah-Ku.

²¹Toh Aku dia maku tinai maharak bangsa je kueh bewei je magon aton intu tanah toh katika Yosua matei.

²²Aku jari mahapan kare bangsa te uka mauji bangsa Israel; mangat Aku katawan en ungkup Israel maku manumon kare parentah-Ku kilau tato hiang ewen atawa dia.”

²³Jete bukue TUHAN dia manenga kamanang akan Yosua taharep kare bangsa te. Malengkan TUHAN manalua ewen melai intu lewu te, tuntang dia bajeleng maharak ewen.