Read Ngaju HAKIM 20 Bible Online

HAKIM 20 - Ngaju bible

HAKIM 20

¹Balalu hapus ungkup Israel dumah bara Dan intu utara sampai Berseba intu salatan, tuntang Gilead intu timor, uka manalih pantehau te. Ewen hapumpong tuntang hinje intu Mispa hong taharep TUHAN.

²Samandiaie aton 400.000 tantara bara pasukan je mananjong pai. Kare pamimpin bara genep bangsa Israel dumah kea intu hete.

³Metoh te kare oloh suku Benyamin jari mahining je uras oloh Israel je beken jari hapumpong intu Mispa. Kare oloh Israel te misek dengan oloh Lewi je gundike buah patei te. “Coba sarita akan ikei kilen ampin kapapa te manjadi!” Oloh Lewi te tombah, “Aku dengan gundikku tende intu Gibea hong tanah Benyamin tuntang baramalem intu hete.

⁴

⁵Limbah te kare oloh Gibea dumah hamalem manggau aku. Ewen mangapong huma ekaku baramalem awi handak mampatei aku; tapi limbah te ewen marayap gundiku sampai matei.

⁶Palus aku manduan hantue, balalu maneteke, limbah te mangirime akan due walas suku huang suku itah genep suku ije katetek. Aku mawi taloh te awi kare oloh Gibea te jari malalus taloh je papa tuntang mampahawen marak ungkup Israel.

⁷Uras keton je aton intu hetoh iete oloh Israel. Jadi toh aku balaku tirok keton!”

⁸Kare oloh je hapumpong intu eka te haya-hayak mendeng tuntang hamauh, “Uras ikei jaton akan buli manalih kemah atawa akan huma.

⁹Jetoh kareh ilalus itah: Itah manenong akan manukas kare oloh je patut manyarang Gibea.

¹⁰Sapersapuluh bara kare oloh hatuen Israel manyadia panginan akan ewen je parang. Je beken haguet manyarang Gibea uka mahukum ewen awi kapapa je jari ilalus ewen marak ungkup Israel.”

¹¹Kalote ungkup Israel bulat hinje atei uka manyarang Gibea.

¹²Limbah ungkup Israel manyoho kare oloh akan hapus tanah suku Benyamin uka manyampai barita toh: “Kapapa en je manjadi intu keton?

¹³Sarah kare oloh papa hadate bara Gibea te akan ikei mangat ikei mampatei ewen tuntang tumon te ikei manganan kapapa te bara bentok Israel.” Tapi oloh Benyamin dia paduli auh kare oloh Israel je beken te.

¹⁴Ewen dumah haream bara hapus lewu intu tanah Benyamin te akan Gibea uka mamarang kare oloh Israel je beken.

¹⁵Andau te ewen hapumpong bara kare lewun ewen karee 26.000 tantara. Tinai oloh lewu Gibea kabuat jari mamumpong 700 biti je buah intih. Uras oloh manyambil je apik huang mamanting batu hapan tali panting, harajur tempak.

¹⁶

¹⁷Intu silan Israel je beken jari tapumpong 400.000 tantara je jari ilatih.

¹⁸Tantara ungkup Israel te haguet akan eka sombayang intu Betel. Ewen misek Hatalla, “O TUHAN, suku je kueh bara marak ikei je sola-solake haguet manyarang oloh Benyamin?” TUHAN tombah, “Suku Yuda”

¹⁹Hanjewu jewue ewen haguet tuntang mampendeng kemah tokep lewu Gibea.

²⁰Ewen mandak barisan parang ewen hataharep dengan lewu te palus manyarang.

²¹Palus pasukan parang Benyamin balua manyarang kea tuntang mampatei 22.000 tentara Israel hong andau te kea.

²²Awi kakalah te ungkup Israel haguet akan eka sombayang palus manangis manalih TUHAN intu hete sampai hamalem. Ewen misek, “TUHAN, en patut ikei haguet tinai mamarang kare paharin ikei oloh Benyamin te?” TUHAN tombah, “Yoh, haguet.” Awi te pasukan parang Israel jadi lembut kahanyi tinai, sampai ewen maator haluli pasukan ewen kilau andau je solake.

²³

²⁴Hong kadue tingkate ewen tolak manyarang pasukan parang Benyamin te.

²⁵Tuntang akan kadue tingkat te kea kare oloh Benyamin te balua manyarang. Sinde toh ewen mampatei 18.000 prajurit talatih bara pasukan parang Israel.

²⁶Ungkup Israel haguet tinai akan Betel tuntang manangis intu TUHAN. Intu hete ewen puasa sampai hamalem tuntang maluput parapah kadamai tuntang parapah je ingehu akan TUHAN.

²⁷Wayah te Patin Janjin Hatalla aton intu Betel. Pinehas anak Eleasar, eson Harun bagawi kilau imam. Ungkup Israel balalu misek TUHAN, “TUHAN, en ikei haguet tinai manyarang kare paharin ikei oloh Benyamin te, atawa ikei mampaterai parang toh?” TUHAN tombah, “Sarang ewen! Jewu Aku handak manenga kamanang akan keton.”

²⁸

²⁹Mahining panombah TUHAN te, kare oloh Israel mandak tantaran ewen intu kare eka je basahokan tokep Gibea.

³⁰Intu andau je kateloe ewen manyarang pasukan parang Benyamin dengan susunan pasukan manaharep Gibea kilau je jari ilalus ewen hong andau je jadi-jadi.

³¹Kare oloh Benyamin manyarang kea, tuntang awi goa-goang dengan musoh tepa ewen balua bara lewu. Kilau je jadi-jadi, ewen nampara mampatei kare oloh Israel intu petak rampar hong luar lewu intu jalan je manintu Betel tuntang intu jalan je manintu Gibea. Telo biti oloh Israel matei.

³²Awi te kare oloh Benyamin manaha ewen jari mampakalah kare oloh Israel tinai kilau solake. Tapi tantara Israel jari marancana uka undur mangat mamonga tantara Benyamin te uka balua akan kare jalan hai, kejau bara lewu.

³³Metoh pasukan tantara Israel je pangkatamame undur, tuntang manyadia baris tantarae tinai intu Baal-Tamar, kare oloh ewen je iandak tokep Gibea, bajeleng balua bara kare eka ewen manyahokan intu tanah luar lewu.

³⁴Ewen te kare oloh je pangkatamame bara hapus Israel; karee 10.000 biti. Lembut parang je karas metoh 10.000 biti te manyarang Gibea. Kare oloh Benyamin samasinde dia mangira je ewen dia tahi tinai kalah.

³⁵TUHAN manenga akan oloh Israel kamanang bara oloh Benyamin, sampai huang andau te oloh Israel mampatei 25.100 biti tantara Benyamin.

³⁶Harue oloh Benyamin mangkeme ewen jari kalah. Pasukan je pangkatamame ain Israel tantai ihat jari mandari arepe bara kare oloh Benyamin awi ewen percaya dengan oloh ayun ewen intu kare eka manyahokan tokep Gibea.

³⁷Kare oloh je manyahokan te bajeleng tame manyarang Gibea. Ewen tayap akan hete-hete intu huang lewu tuntang mampatei uras oloh intu hete.

³⁸Tapi ewen jari pakat labih helo iete amon aton asep bakapal mangangkewol kahunjun bara bentok lewu,

³⁹pasukan je pangkatamame capat haluli manyarang musoh. Metoh te kare oloh Benyamin jari mampatei 30 tantara Israel je ewen manyangka ewen jari mampakalah kare oloh Israel tinai kilau solake.

⁴⁰Tapi salenga asep nampara ngangkewol akan hunjun bara bentok lewu Gibea. Kare oloh Benyamin tarewen metoh ewen tampaliau tuntang mite hapus lewun ewen bakehu.

⁴¹Metoh te kea pasukan je pangkatamame ain Israel mules manyarang, sampai tantara Benyamin te kasaburan awi ewen mangkeme ewen akan kalah.

⁴²Jadi ewen hadari bara kare oloh Israel manintu akan tanah padang pasir, tapi ewen dia tau liwus. Ewen takapung helat pasukan Israel tuntang pasukan je metoh te metohe dumah bara hila lewu. Oloh Benyamin mandino kakalah je paham hai.

⁴³Kare oloh Israel mangapong tuntang manggoang ewen palus sampai ije eka intu hila timor Gibea. Sambil manggoang, ewen mampatei

⁴⁴18.000 tantara je puna jari ilatih bara pasukan parang Benyamin.

⁴⁵Tantara Benyamin je beken mules palus hadari mahalau tanah padang pasir manintu bukit batu intu Rimon. Lime koyan biti marak ewen impatei intu benteng jalan. Je beken inggoang tarus, palus sampai akan Gideom.[20] Bara kare oloh te aton 2.000 biti je impatei.

⁴⁶Jadi, tantara Benyamin je matei andau te aton 25.000 biti; uras tantara je menteng mamot.

⁴⁷Tapi bara marak ewen je hadari mahalau kare padang pasir manintu akan kare bukit batu intu Rimon aton 600 biti je liwus. Ewen melai intu Rimon epat bulan katahie.

⁴⁸Limbah te kare oloh Israel haluli tinai balalu manyarang tuntang mampatei uras tisan oloh Benyamin hatue, bawi, anak oloh tuntang meto kea. Uras lewu intu tanah te inusul ewen.