Read Ngaju HAKIM 21 Bible Online

HAKIM 21 - Ngaju bible

HAKIM 21

¹Katika oloh Israel hapumpong intu Mispa, ewen jari bajanji dengan TUHAN iete jaton ije bara ewen kareh manyoho anak oloh bawie jadi sawan oloh Benyamin.

²Toh ewen haguet akan Betel tuntang mondok pehe atei sampai hamalem intu taharep TUHAN. Ewen manangis tuntang mangkariak,

³“O TUHAN, Hatallan Israel, mbuhen uras toh manjadi? Suku Benyamin, ije bara suku bangsa ikei, bilak lilap!”

⁴Andau jewue hanjewu toto, ungkup Israel mampendeng ije mesbeh intu hete, palus maluput akan TUHAN parapah je ingehu tuntang parapah hapa badamai.

⁵Limbah te ewen manantuani bara marak kare bangsa Israel en aton je dia haguet hapumpong manaharep TUHAN intu Mispa helo bihin. (Metoh te ewen jari sumpah iete oloh je dia manumon pantehau TUHAN akan Mispa ihukum matei).

⁶Ungkup Israel masi dengan kare paharin ewen suku Benyamin; ewen hamauh, “Andau toh Israel nihau ije bara sukue.

⁷Narai je iawi itah mangat oloh Benyamin je tisae toh tau aton sawae, awi itah jari sumpah dengan TUHAN tahiu itah kareh dia manyoho kare anak oloh bawi ain itah jadi sawan oloh Benyamin?”

⁸Ewen manantuani en aton ije baris bara bangsa Israel je dia haguet hapumpong intu Mispa. Ewen katawan bara kare oloh Yabes intu Gilead, ije mahin jaton je haguet akan Mispa.

⁹Awi, metoh iriksa, ampie ije mahin jaton intu hete je bara Yabes.

¹⁰Awi te, kare oloh je hapumpong intu Betel te mangirim 12.000 biti je pangkamentenge bara marak ewen uka mampatei genep oloh intu Yabes, tamput oloh bawi tuntang anak oloh.

¹¹Ewen irentah uka mampatei uras oloh hatue, tuntang uras oloh bawi je dia bujang tinai.

¹²Intu marak kare oloh je melai intu Yabes te, ewen sondau epat ratus oloh bawi je masih bujang. Ewen mimbite akan kemah intu Silo je aton intu tanah Kanaan.

¹³Limbah te hapus ungkup Israel mangirim sarohan, akan kare oloh Benyamin je aton intu kare bukit batu intu Rimon uka mansanan keleh badamai.

¹⁴Awi te kare oloh Benyamin te haluli, palus ungkup Israel manenga akan ewen kare oloh bawi bara Yabes je dia impatei te. Tapi jumlah kare oloh bawi te dia sukop akan kare oloh Benyamin te.

¹⁵Ungkup Israel masi dengan oloh Benyamin, awi TUHAN jari marusak kahinjen kare suku bangsa Israel.

¹⁶Limbah te kare kapala je hapumpong intu Betel te hamauh, “Huang suku Benyamin jaton ije tinai oloh bawi. Tapi kilen ampin itah dengae; itah dia tau manyoho kare anak oloh bawi ain itah kawin dengan ewen, awi itah jari manyapa genep biti bara marak itah je manyoho anak oloh bawie kawin dengan ije biti oloh Benyamin! Jadi en taloh je iawi itah akan ewen je tisae toh mangat ewen tau aton sawae kea? Ela sampai Israel nihau ije bara due walas sukue. Itah manggau jalan mangat suku Benyamin tau aton turonae palus dapit tuntang tetep manguasa hapus tanahe.”

¹⁹“Kalotoh,” koan ewen, “Aton ije carae, iete metoh pesta sining nyelo akan TUHAN intu Silo.” (Intu hila salatan Silo toh aton lewu Betel; hila barate te aton jalan hai Betel akan Sikhem, intu hila utarae aton lewu Lebona).

²⁰Kare kapala hong pumpong intu Betel te hamauh dengan kare oloh Benyamin je tisae te, “Lius keton manyahokan intu kare kabon anggor hong Silo,

²¹tuntang bajaga-jaga intu hete. Kareh amon kare bawin oloh Silo balua handak manari katahin pesta sining nyelo akan TUHAN, keton balalu balua bara kare kabon anggor te. Palus genep biti manyingkap ije oloh bawi bara marak ewen tuntang mimbite hadari akan tanah Benyamin akan sawan keton.

²²Amon bapae atawa paharie je hatue dumah tuntang balaku ie buli, keton[21] tau hamauh, ‘Ikei balaku nauh ewen intu ikei. Ikei dia marabut ewen huang parang. Tuntang awi keton dia manenga ewen akan ikei, keton dia malangkah janji, jadi keton dia sala.’ ”

²³Palus kare oloh Benyamin te mawi taloh je insanan akan ewen. Sining bitin ewen manamput ije oloh bawi bara marak kare oloh bawi je manari intu Silo. Limbah te ewen haluli akan tanah ewen kabuat tuntang mamangun haluli kare lewue palus manetep intu hete.

²⁴Kare oloh Israel je beken te tolak kea. Ewen haluli akan tanah ayun ewen huang tanah ewen kabuat-kabuat, manumon jalahae tuntang kare sukue.

²⁵ Hong jaman te hindai aton raja intu Israel. Genep biti mawi taloh je ingkeme bujur.