Read Ngaju HAKIM 3 Bible Online

HAKIM 3 - Ngaju bible

HAKIM 3

¹Akan mauji kare oloh Israel je dia puji mangkeme parang intu Kanaan, TUHAN manalua pire-pire bangsa melai intu tanah te.

²TUHAN malalus taloh te baya awi Ie handak majar gagenep angkatan Israel te parang, je mambatang ewen je dia puji omba parang.

³Kare bangsa je magon melai intu tanah te iete: bangsa je melai huang lime lewun oloh Pilistin, uras bangsa Kanaan, bangsa Sidon, tuntang bangsa Hewi je melai intu petak habukit Libanon, nampara bara bukit Baal-Hermon sampai akan jalan je manintu Hamat.

⁴Ewen aton intu hete akan jadi batu uji akan bangsa Israel. Tagal te palus ingatawan en bangsa Israel manumon kare parentah TUHAN je jari inenga TUHAN akan tato hiang ewen mahalau Moses.

⁵Jete bukue kare oloh Kanaan, Het, Amori, Peris, Hewi tuntang Yebusi magon tetep melai intu tanah te, belom marak ungkup Israel.

⁶Ungkup Israel kawin campur dengan kare bangsa te, tuntang omba manyembah kare dewan ewen.

⁷Ungkup Israel badosa taharep TUHAN, Hatallan ewen. Ewen kalapean Dengae sampai ewen sombayang akan kare dewa Baal tuntang Asera.

⁸Palus TUHAN sangit dengan ungkup Israel, tuntang manalua ewen impakalah awi raja Kusan-Risataim bara Mesopotamia. Hanya nyelo katahie raja te manguasa ewen.

⁹Limbah te bangsa Israel mangkariak balaku awat dengan TUHAN, palus TUHAN manenga Otniel uka maliwus ewen. (Otniel iete anak bara Kenas, andi Kaleb).

¹⁰Roh TUHAN manguasa Otniel sampai ie jadi pamimpin ungkup Israel. Ie haguet parang, palus TUHAN manenga kamanang akae malawan raja Mesopotamia.

¹¹Palus lewu te tadoh sanai epat puluh nyelo katahie. Limbah te Otniel matei.

¹²Ungkup Israel badosa tinai taharep TUHAN, sampai TUHAN mawi Eglon, raja Moab, labih abas bara Israel.

¹³Raja Eglon hapakat dengan bangsa Amon tuntang Amalek, palus mampakalah oloh Israel, limbah te marabut Yerikho, lewu korma te.

¹⁴Hanya walas nyelo katahie ungkup Israel penda kuasan Eglon.

¹⁵Tapi katika ungkup Israel mangkariak balaku awat dengan TUHAN, ie manenga Ehud uka maliwus ewen. Ehud te ije biti oloh je manyambil; Ie anak Gera bara suku Benyamin, tuntang ie bahut magah akan Raja Eglon pajak je musti imbayar awi ungkup Israel.

¹⁶Sinde katika Ehud manampa ije padang banyihi hasansila je kapanjange tokep satengah meter. Ie manangking padang te intu kahange gantau intu huang bajue,

¹⁷palus haguet magah pajak bara ungkup Israel akan raja Eglon. Raja te paham baseput.

¹⁸Limbah manjulok pajak te, Ehud manyoho kare oloh je meton duit amas te buli.

¹⁹Tapi Ehud kabuat tende metoh sampai intu kare batu je iukir tokep Gilgal, palus ie haluli talih Eglon. Metoh te Eglon aton intu kamar hunjun je kiu-kius intu istanae. Koan Ehud dengan Eglon, “Tuan hai! Aku mimbit barita basilim akan Tuangku!” Palus koan Raja, “Entai helo.” Palus ie marentah kare oloh ayue je tokep ie uka balua tuntang malihi ie dengan Ehud kabuat. Limbah te Ehud manokep raja je kanjerae mondok, palus hamauh, “Aton barita bara Hatalla akan Tuangku!” Mahining auh te raja mendeng.

²¹Balalu Ehud manjawut padange hapan lenge sambil bara kahange hila gantau palus manyodoke handale-dalem akan kanain raja. Uras isin padang te sampai pulange tame akan huang kare enyak intu kanain raja te, sampai tembus akan likut. Ehud manalua padang te intu hete,

²³balalu balua hayak matep tuntang mangunci bauntonggang kamar te,

²⁴balalu haguet. Katika kare oloh ayun raja te dumah tuntang mite kare bauntonggang kamar te ingunci, ewen manyangka raja magon aton intu huang tuntang kanjerae akan likut.

²⁵Limbah ewen tahi mentai tuntang raja hindai kea muap bauntonggang, ewen hengan balalu ewen manduan kunci tuntang muap bauntonggang te. Ampie rajan ewen halelek matei intu laseh.

²⁶Metoh ewen magon tunggu-tunggu, Ehud jari mandari arepe akan Seira mahalau kare batu je iukir.

²⁷Sana sampai intu tanah habukit Epraim, ie mahimon tarompet, mantehau oloh Israel parang. Ewen dumah palus ie manantiring ewen mohon bara tanah habukit te.

²⁸“Omba aku,” Koae dengan ewen, “TUHAN jari mampakalah kare oloh Moab, musoh keton te akan keton.” Palus Ehud mamimpin kare oloh Israel te mohon bara petak habukit. Ewen marabut eka oloh Moab dimpah intu Sungei Yordan. Jaton ije bara musoh te inalua dimpah dengan salamat.

²⁹Huang parang te ewen mampatei kira-kira 10.000 biti tantara Moab je pangkahalape; jaton ije je lapas.

³⁰Andau te Moab kalah malawan Israel, palus lewu te tadoh sanai hanya puluh nyelo katahie.

³¹Kapalan oloh Israel je limbah te iete Samgar anak Anat. Palus ie parang tuntang maliwus oloh Israel. Hapan tongkeh maharak sapi, ie mampatei 600 biti oloh Pilistin.