Read Ngaju HAKIM 5 Bible Online

HAKIM 5 - Ngaju bible

HAKIM 5

¹Hong andau te Debora tuntang Barak anak Abinoam palus manyanyi. Kalotoh koae:

²Keleh tara akan TUHAN, awi kakare oloh menteng intu Israel jari bajanji parang tuntang rayat dengan kahiase haguet parang.

³Keleh hining o kare raja tuntang anak raja, aku manyanyi akan Hatallan Israel, iete TUHAN.

⁴Katika Ikau haguet bara Seir, o TUHAN, tuntang tanah Edom ilihi Awim, petak hagerek, kare rumbak langit buap, tuntang kare baunandau manusoh danume.

⁵ Kare bukit hongge intu taharep baun je manguasa Sinai, intu taharep TUHAN, Hatallan Israel.

⁶Intu jaman Samgar, anak Anat, tuntang intu jaman Yael kea, dia aton kawan oloh dagang intu tanah, jaton kea tamuei intu jalan hai.

⁷Kare lewun Israel dia aton oloh melaie, benyem languen sampai ikau dumah, Debora; ikau dumah kilau indu je paham inyinta.

⁸Katika Israel nampara manyembah dewa, lembut parang intu tanah ewen; bara marak epat puluh koyan oloh menteng ain bangsa, ije mahin jaton je mangguna pakakas parange.

⁹Akan kare pangkalima pasukan Israel je dumah hapan kahias atei, aku manyampai angat kahandalem regan jasa ayum. Keleh tara akan TUHAN!

¹⁰O keton je manungkang kalidai baputi, keton je mondok intu hunjun permadani tuntang keton handiai je mananjong, keleh mangabar saritan kamanang toh!

¹¹Intu tokep kare kalin danum tarahining oloh rami manyanyi, manyarita kamanang TUHAN lulang-luli, kamanang ungkup Israel, ungkup TUHAN. Palus ewen babaris manintu lawang lewu

¹²Keleh harikas Debora, tuntang ambo auh nyanyi. Keleh mendeng Barak, imbit kare oloh tahanan!

¹³Kawan oloh mamut je batisa dumah talih pamimpin ewen, ewen dumah, tuntang tatap uka parang kalahi Akae.

¹⁴Ewen mananjong bara Epraim akan janah, manuntut pasukan Benyamin je baris intu hila baun ewen. Bara Mahir palus dumah kare pangkalima, tuntang bara Sebulon harikas kare perwira.

¹⁵Kare kapalan Isaskar dumah hayak dengan Debora, yoh, Isaskar dumah, tuntang Barak omba kea; ewen omba ie mohon janah. Tapi suku Ruben dia olih manukas kahandake awi marak ewen dia aton auh kapakat.

¹⁶Mbuhen ewen melai marak kare tabiri? En mangat mahining sakatik mantehau metoe? Puna suku Ruben dia olih manukas arep awi marak ewen dia aton auh kapakat.

¹⁷Metoh Sebulon tuntang Naptali parang manyangit intu eka parang, suku Dan melai intu kapal, tuntang suku Gad tetep melai intu hila timor Yordan, tinai suku Aser manga-mangat tuntang dia maku tindar bara eka ewen hapus saran pantai.

¹⁹Intu Taanakh, tokep sungei hong Megido, kare raja parang, kare raja Kanaan kalahi, tapi perak jaton je imbit ewen kilau ramo rampasan.

²⁰Kare bintang kea omba parang malawan Sisera, bara eka ewen miar baputar intu langit.

²¹Sungei Kison amok soho sampai mampahantong musoh. Miar, keleh miar hapan kagagah, o hambruangku!

²²Tagal kalias darie maka baralekap auh tatap pain kuda je imbit awi oloh je manungkange.

²³“Keleh manyapa Meros, tuntang oloh ayue je melai hete,” koan malekat TUHAN. “Awi ewen dia dumah mandohop kilau pahlawan je parang akan TUHAN.”

²⁴Bontong Yael, sawan Heber oloh Keni; bara kakare oloh je melai tingkap, ie ih je paling imberkat.

²⁵Sisera balaku danum, tapi ie manenga susu akae, ie manyarongan susu huang mangkok je patut akan kare raja.

²⁶Hapan pasak tuntang tukul sanaman intu lengee Yael mamukul Sisera sampai hancor takoloke.

²⁷Intu pain Yael ie balihang manggeto tahasenge halelek intu petak balalu matei.

²⁸Bara rarajak baun sengok indu Sisera manampayah, tuntang hamauh, “Mbuhen karetae dia duma-dumah? Mbuhen dia aton tarahining auh pain kuda?”

²⁹Je pangkaharati bara kare dayange manombah je jari iniroke kabuat hong ateie:

³⁰“Ewen metoh mambagi-bagi ramo rampasan, akan genep tantara, ije atawa due oloh bawi bujang. Akan Sisera, benang baju je pangkahain rega, akan ratu, salendang sepsimpan ampin sulame.”

³¹Keleh kare musohm, o TUHAN, matei sama kilau Sisera, tapi uras kare sobat Ayum manang kilau matanandau intu langit. Limbah te, tanah te palus tadoh sanai epat oloh nyelo katahie.