Read Ngaju HAKIM 6 Bible Online

HAKIM 6 - Ngaju bible

HAKIM 6

¹Sinde tinai ungkup Israel badosa intu taharep TUHAN, sampai ie manalua bangsa Midian manguasa ewen uju nyelo katahie.

²Oloh Israel kalote kikehe dengan oloh Midian, sampai ewen manyahokan intu huang kare goha tuntang intu kare eka beken je jaton oloh manderohe, intu kare bukit.

³Indahang tinai sining katika oloh Israel manampara malan, oloh Midian palus dumah haya-hayak dengan oloh Amalek tuntang kare oloh beken bara padang pasir manyarang oloh Israel.

⁴Ewen mampendeng kemah intu tanah Israel tuntang marusak lepah taloh imbul intu hete sampai akan tanah intu kaliling Gasa hila salatan. Tinai kea tabiri, sapi tuntang kalidai ain ungkup Israel inamput ewen hadari. Jaton sama sinde taloh je ilihi ewen sampai oloh Israel jaton bara taloh kinan sama sinde.

⁵Kare oloh te dumah-dumaha are bitie dengan meto tuntang kemah ewen je paham are. Ewen tuntang kare ontae dia taraise karee. Ewen dumah marusak tanah te,

⁶ungkup Israel dia tau mawi taloh en-en taharep ewen.

⁷Limbah te ungkup Israel mangkariak balaku TUHAN mawat ewen malawan oloh Midian.

⁸TUHAN manyoho ije biti nabi manalih ewen. Nabi te hamauh, “Kalotoh koan TUHAN, Hatallan Israel: ‘Keton jari iliwus-Ku bara kahajipen intu Misir.

⁹Keton jari inyalamat-Ku bara Misir tuntang bara oloh hong tanah toh je manyarang keton. Ewen jari indari awi-Ku katika keton mamarang ewen, balalu inenga-Ku tanah ain ewen akan keton.

¹⁰Jadi insanang-Ku akan keton je Aku TUHAN, Hatallan keton, tuntang keton dia tau manyembah kare dewa bangsa Amori je lewue ielai keton metoh toh. Tapi keton dia manumon parentah-Ku.’ ”

¹¹Sinde andau malekat TUHAN dumah akan lewu Opra, palus mondok intu penda batang kayu alau, ayun Yoas, ije biti bara oloh jalahan Abieser. Anake je arae Gideon, metoh mihik gandom intu eka mahamis anggor. Ie malalus te sahoka-hokan uka dia gitan awi oloh Midian.

¹²Malekat TUHAN te mamprahan arepe akae tuntang hamauh, “O oloh tabela je gagah! TUHAN mampahayak ikau!”

¹³Tombah Gideon, “Ampun tuan! Amon toto TUHAN mampahayak ikei, mbuhen uras taloh toh buah ikei? Kueh kare taloh heran je puji iawi TUHAN bihin tuntang je inyarita awi tato hiang ikei tahiu kilen ampie TUHAN mampalua ewen bara Misir? Toh TUHAN jari malihi ikei tuntang manalua ikei inguasa awi oloh Midian.”

¹⁴Limbah te TUHAN manenga parentah toh akan Gideon, “Hapan salepah kaabasm keleh lius maliwus oloh Israel bara kuasan oloh Midian. Aku toh je manyoho ikau.”

¹⁵Gideon tombah, “Mbuhen aku, TUHAN? Kueh tau aku maliwus ungkup Israel bara kuasan oloh Midian. Intu huang suku Manase, jalahangku je paling balemo. Tuntang intu huang keluarga ayungku mahin aku je pangkajaton rimae.”

¹⁶“Tantu ikau tau!” Koan TUHAN, “awi Aku kareh mandohop ikau. Kareh oloh Midian tau impahancor awim mangat bewei, kilau ikau baya manaharep ije biti oloh ih.”

¹⁷Tombah Gideon, “Amon aku toto-toto ingilak TUHAN, coba tenga ije tanda je puna TUHAN manenga parentah te akangku.

¹⁸Aku balaku keleh TUHAN mentai hanjulo intu hetoh sampai aku manyarongan panginan akan TUHAN.” “Yoh,” tombah TUHAN, “Aku kareh mentai sampai ikau haluli.”

¹⁹Gideon palus buli mampakasak ije kongan kambing je tabela, tuntang manduan sapuluh kilo tepung, limbah te mawi rote je dia iragi. Limbah te isin meto te iingkese intu huang karanjang, tuntang johoe intu huang ketel. Uras taloh te imbit tuntang inyarongan akan malekat TUHAN je kanjerae mentai intu penda kayu alau te.

²⁰Malekat TUHAN te hamauh, “Andak isin meto toh tuntang rote te intu hunjun batu toh palus nusoh johoe te intu hunjue.” Gideon malalus taloh je irentah akae.

²¹Limbah te malekat TUHAN te manjuju lengee, palus hapan tapakan kayu je imbinge ie manigong isin meto tuntang rote te. Batu te hanyala palus lepah bakehu isin meto tuntang rote te. Limbah te malekat te lilap.

²²Gideon katawan je jari dumah talih ie te malekat TUHAN kabuat. Sambil mikeh Gideon hamauh, “Calaka aku, o TUHAN je pangkahai! Awi aku jari hataharep bau dengan malekat Ayum!”

²³Tapi TUHAN hamauh dengae, “Salamat! Ela mikeh. Ikau dia akan matei.”

²⁴Palus Gideon mamangun ije mesbeh intu hete tuntang manggaree “TUHAN Batang Salamat”. Mesbeh te magon aton intu Opra, iete lewun oloh Abieser.

²⁵Hong alem te TUHAN manenga parentah toh akan Gideon, “Duan sapi hatue ain bapam, iete sapi je pangkahalape[6] umur uju nyelo. Ngarak mesbeh je impendeng bapam akan Baal, palus nderep tihang tamunan Dewi Asera je intu balikat mesbeh te.

²⁶Keleh mampendeng intu hunjun tuyok taloh te ije mesbeh je jari ingarangka dengan bahalap. Limbah te sapi hatue te urase, ingehum bula-bulat jadi parapah akan TUHAN. Keleh mahapan tihang tanda akan Dewi Asera je jari inderepm te jadi pondok apuie.”

²⁷Palus Gideon mintih sapuluh biti jipee balalu haguet mawi taloh je irentah TUHAN akae. Tapi ie paham mikeh dengan keluargae tuntang dengan kare oloh intu lewu te, ie dia bahanyi malalus taloh te handa-handau. Awi te ie malaluse hamalem.

²⁸Metoh oloh lewu te misik hanjewu-jewue, ewen mite mesbeh akan Baal tuntang tihang tanda akan Dewi Asera jari balongkang. Ewen mite kea je intu eka te jari imangun ije mesbeh tuntang jari kea imapui sapi hatue kilau parapah.

²⁹Ewen misek sama arepe, “Gawin eweh toh?” Limbah inantuani, ewen katawan Gideon anak Yoas je mawie.

³⁰Palus ewen hamauh dengan Yoas, “Anakm jari mangarak mesbeh Baal tuntang mampalongkang tihang tanda akan Dewi Asera je intu balikat mesbeh te. Awi te, imbit anakm te balua akan hetoh. Ie musti matei!”

³¹Tapi Yoas tombah akan kare oloh je handak malawan ie, “En keton mamihak Baal tuntang milang ie? Eweh je mamihak ie kareh impatei andau toh! Amon Baal puna Hatalla, nauhe ie kabuat mambela arepe. Awi je ingarak te iete mesbeh ayue.”

³²Awi koan Yoas, “Nauhe Baal kabuat malawan Gideon, awi ie jari mangarak mesbeh ayue,” maka bara katika te oloh manggare Gideon “Yerubaal”.[7]

³³Metoh te uras oloh Midian, Amalek tuntang kare bangsa beken intu padang pasir silan hila timor Yordan jari hapumpong. Ewen dimpah Sungei Yordan, tuntang mampendeng kemah intu Janah Yisreel.

³⁴Tapi Gideon inguasa awi roh TUHAN, sampai ie mahimon tarompet hapa mantehau kare oloh jalahan Abieser uka dumah bagabung dengae.

³⁵Ie kea mangirim sarohan akan suku Aser, Sebulon, Naptali tuntang suku Manase, aloh je intu silan hila timor aloh je intu silan hila barat Sungei Yordan, balaku ewen pakat dengae. Maka ewen uras dumah uka mandohop Gideon.

³⁶Palus Gideon hamauh dengan Hatalla, “TUHAN, Ikau jari mansanan tahiu Ikau je maku mahapan aku uka maliwus ungkup Israel.

³⁷Amon puna kalote, maka intu hunjun petak toh, eka ikei bahut mihik gandom jari iandakku bulun tabiri je jari inggunting. Amon jewu baya bulun tabiri toh bewei je imbisa ambon, tapi petake dia, jete tandae je Ikau jari mahapan aku maliwus ungkup Israel.”

³⁸Palus manjadi kalote: Metoh Gideon misik hanjewu jewue tuntang mahamis bulun tabiri te, ie mandino danum ambon ije mangkok.

³⁹Balalu ie hamauh dengan Hatalla, “TUHAN, ela ah sangit amon aku hamauh sinde tinai. Soho aku mawi ije gawi tinai dengan bulun tabiri toh. Tapi sinde toh keleh bulun tabiri toh je tetep keang, tapi petake bisa.”

⁴⁰Alem te TUHAN mawi taloh je ilaku Gideon te, sampai andau jewue bulun tabiri te ampie keang, tapi petake bisa awi ambon.