Read Ngaju HAKIM 9 Bible Online

HAKIM 9 - Ngaju bible

HAKIM 9

¹Sinde andau Abimelekh anak Gideon haguet akan lewu Sikhem eka tondah kolan indue, intu hete ie hamauh dengan ewen, koae,

²“Coba isek dengan hapus oloh lewu Sikhem, je kueh labih bahalap: Irentah awi uju puluh anak Gideon atawa awi ije biti bewei? Pingat ewen kea je aku magon aton isi dahan ewen.”

³Palus tondah jalahan indu Abimelekh te haguet talih kare oloh Sikhem manyampai peteh Abimelekh akan ewen. Balalu oloh lewu Sikhem te manukas uka omba Abimelekh; awi tumon ewen ie puna horoi isi daha dengan ewen.

⁴Limbah te ewen manenga akae uju puluh duit perak je induan bara huma sombayang Baal-Berit. Dengan duit te Abimelekh mupah ije kelompok oloh papa hadate omba pakat dengae,

⁵balalu haguet akan eka bapae intu Opra. Intu hete ie mampatei uju puluh biti paharie te intu hunjun ije batu. Tapi Yotam, anak busu ain Gideon dia tamput buah patei awi ie manyahokan.

⁶Hapus oloh lewu Sikhem tuntang Bet-Milo hapumpong, palus haguet manalih pahewan batang kayu alau intu Sikhem. Intu hete ewen mangkat Abimelekh jadi raja.

⁷Limbah Yotam mahining taloh te, ie tolak mendeng intu puncak Bukit Gerisim, palus mangkariak manintu kare oloh are te, “Hining aku, o kare oloh Sikhem, uka Hatalla kea mahining auh keton!

⁸Sinde katika kare batang kayu hapumpong handak mintih raja akan ewen. Ewen hamauh dengan batang saitun, ‘Keleh ikau jadi rajan ikei,’

⁹Tombah batang saitun, ‘Ceh, aku dia maku. Awi amon aku jadi rajan keton, aku balalu terai mahasil undus saitun je hapan akan mahormat kare dewa tuntang olon.’

¹⁰Palus koan kare batang kayu dengan batang ara, ‘Ikau ih jadi rajan ikei.’

¹¹Tapi batang ara tombah, ‘Aku dia maku, awi akan jadi rajan keton aku balalu terai mahasil bua ara je mani-manis.’

¹²Limbah te hamauh kare batang kayu dengan batang anggor, ‘Toh, ikau je jadi rajan ikei.’

¹³Tapi batang anggor tombah, ‘Kueh aku handak terai mahasil anggor je manyanang atei kare dewa tuntang olon, baya awi aku jadi rajan keton!’

¹⁴Awi te uras batang kayu manalih parak duhi, ‘Ikau ih jadi rajan ikei.’

¹⁵Parak duhi te tombah, ‘Amon keton toto-toto handak mawi aku rajan keton, keleh bakalindong intu penda kalindongku. Amon keton dia maku, maka bara kare edangku je baduhi toh kareh balua apui mangehu lepah kare batang seder intu Libanon.’ ”

¹⁶“Toh,” Koan Yotam limbah te, “En awi keton jari mangkat Abimelekh jadi raja, keton jari mawie dengan kahias atei? En keton jari mawi taloh je patut akan Gideon, bapaku, tuntang kola jalahae? En keton jari mambaleh kare kahalap gawin bapaku,

¹⁷je jari parang akan keton? Ingat, ie je manenga pambelome uka maliwus keton bara kuasan oloh Midian.

¹⁸Tapi toh keton mandarhaka dengan keluarga bapaku, kare anake jari impatei keton urase, uju puluh biti gawi sinde intu hunjun ije batu. Abimelekh iete anak bapaku bara jipee. Tapi keton mangkat ie jadi raja Sikhem, baya awi ie magon aton horoi isi dahae dengan keton.

¹⁹Amon gawin keton andau toh dengan bapaku tuntang keluargae te dengan kehias, takan ih sana-sanang dengan Abimelekh; nauhe ie sana-sanang dengan keton.

²⁰Tapi amon dia kalote, keleh bara Abimelekh balua apui je mangehu lepah oloh lewu Sikhem dengan Bet-Milo. Tuntang keleh bara oloh lewu Sikhem dengan Bet-Milo kea balua apui je mangehu lepah Abimelekh.”

²¹Limbah te Yotam te mandari arepe palus melai intu Beer, awi ie mikeh dengan Abimelekh paharie te.

²²Telo nyelo katahie Abimelekh marentah Israel.

²³Palus TUHAN mawi Abimelekh hamusoh dengan kare oloh Sikhem sampai ewen malawan ie.

²⁴Taloh te manjadi mangat tabaleh kapapan Abimelekh tuntang kare oloh Sikhem je mamakat ie uka mampatei uju puluh biti anak Gideon.

²⁵Kare oloh Sikhem te aton mingkes kare oloh je tukang mimpa intu kare puncak bukit mangat manawan Abimelekh. Genep bitin oloh je mahalau hete irampok awi kare oloh je mimpa te. Taloh te insanan akan Abimelekh.

²⁶Katika te Gaal anak Ebed jari dumah haya-hayak dengan kare paharie uka melai intu Sikhem; kare oloh Sikhem percaya dengae.

²⁷Ewen haguet mamutik anggor intu kare kabon anggor; ewen mawi taloh ihop bara anggor tuntang mawi pesta. Ewen kuman mihop intu eka manyembah dewan ewen hayak manyapa tai Abimelekh.

²⁸“Itah toh eweh sampai itah patut sontop akan Abimelekh?” Koan Gaal, “Ie te eweh je katotoe? Diakah ie anak Gideon je dengan Sebul wakile te jadi jipen Hemor, bapa Sikhem, tato itah!”

²⁹“Jaka aku jadi pamimpin kare oloh Sikhem toh, tantu jari lepah kesah Abimelekh te! Aku akan mansanan[8] akae, ‘Ayu miar! Irak tantaran keton tuntang keleh balua parang!’ ”

³⁰Sebul, je manguasa lewu Sikhem sangit metoh mahining auh Gaal te.

³¹Ie mangirim sarohan akan Abimelekh intu Aruma uka manyampai peteh toh, “Gaal anak Ebed haya-hayak dengan kare paharie jari dumah akan Sikhem tuntang mamakat oloh lewue uka malawan ikau.

³²Awi te keleh ikau tuntang kare oloh ayum haguet hamalem manyahokan intu tana.

³³Hanjewu jewu amon matanandau lembut, sarang lewu te nantekas. Amon Gaal tuntang kare oloh ayue balua malawan ikau, jete katikam manyarang ie!”

³⁴Palus Abimelekh dengan hapus oloh ayue haguet metoh hamalem. Ewen hambilang jadi epat pasukan palus haguet manyahokan intu kaliling lewu Sikhem.

³⁵Sana Abimelekh tuntang kare oloh ayue mite Gaal balua tuntang mendeng intu lawang lewu, ewen urase balua bara eka manyahokan.

³⁶Gaal mite ewen, palus hamauh dengan Sebul, “Item! Aton kare oloh mohon kahetoh bara kare tantan bukit!” “Jete dia ie oloh,” tombah Sebul, “jete bara kare kangkalingen intu bukit.”

³⁷Palus koan Gaal tinai, “Toto! Aton oloh mohon bara biring bukit, tuntang ije pasukan metoh manintu akan hetoh bara hila pahewan batang kayu alau!”

³⁸Koan Sebul dengan Gaal, “Nah, intu kueh toh kajohon totokm te? Koam bihin, akan narai itah musti tunduk dengan Abimelekh te? Jetoh ie kare oloh je inawahm te. Ayo miar manyarang ewen!”

³⁹Palus Gaal mimbit balua kare oloh Sikhem tuntang malawan Abimelekh.

⁴⁰Tapi Abimelekh manyarang ie sampai ie hadari. Are oloh matei sampai intu baun lawang lewu.

⁴¹Kajariae Abimelekh haluli akan Aruma tuntang manetep intu hete. Sebul maharak Gaal tuntang kare paharie balua bara Sikhem, sampai ewen dia tau melai intu hete tinai.

⁴²Andau jewue, kare oloh Sikhem nampara malihi lewu, handak akan tana tuntang taloh te insanan akan Abimelekh.

⁴³Palus Abimelekh mamumpong kare oloh ayue tuntang mambagi ewen jadi telo pasukan, palus ewen haguet manyahokan intu kare tana. Metoh ie mite oloh lewu te manintu tana, ie balua bara eka manyahokan balalu mampatei ewen.

⁴⁴Metoh Abimelekh dengan pasukae kaje-kajeng miar manyarang lawang lewu, due pasukae je beken manggoang tuntang mampatei kare oloh je hadari akan kare tana.

⁴⁵Abimelekh parang tarus janda-jandau tuntang manguasa lewu te; oloh lewu impatei palus lewue impalomose limbah te inawore uyah.

⁴⁶Metoh kare oloh je aton huang kota Sikhem mahining tahiu taloh te, ewen tame akan huang rombak intu penda human dewa El-Berit uka bakalindong.

⁴⁷Palus oloh mansanan akan Abimelekh je kare oloh intu kota Sikhem te jari hapumpong intu hete.

⁴⁸Awi te, Abimelekh dengan kare oloh ayue haguet akan Bukit Salmon. Intu hete ie manetek kare edan kayu hapan kapak, palus meton kare edan te intu hunjun bahae, limbah te manyoho kare oloh ayue kea jele-jeleng mawi kilau je jari iawie.

⁴⁹Balalu ewen genep bitie manetek kare edan kayu, palus mananjong omba Abimelekh. Uras edan kayu te inoyok ewen intu tumbang rombak human dewa te balalu manusule, metoh kare oloh Sikhem te magon aton intu huange. Awi te matei oloh Sikhem te, lakau sakoyan biti oloh hatue tuntang oloh bawi.

⁵⁰Limbah te Abimelekh haguet akan Tebes. Ie mangapung lewu te palus manguasae.

⁵¹Intu bentok lewu te aton ije candi je dehen. Balalu hapus oloh lewu te hadari akan hete. Ewen tame akan huang candi te tuntang mangunci bauntonggange, balalu mandai akan hunjun.

⁵²Limbah te maka dumah Abimelekh akan hete balalu manyarang candi te. Metoh ie sampai bauntonggang candi te tuntang handak manusule,

⁵³ ije biti oloh bawi malaboh ije batu galingan akan hunjun takoloke sampai pusit bangkong takoloke te.

⁵⁴Bajeleng Abimelekh mantehau oloh tabela je meton pakakas parange tuntang hamauh, “Nyilak padangm tuntang patei aku. Aku dia maku inahiu oloh je aku impatei awi oloh bawi.” Palus oloh tabela te manyodok ie sampai matei.

⁵⁵Metoh kare oloh Israel mite Abimelekh jari matei, ewen uras buli.

⁵⁶Kalote carae Hatalla mambaleh Abimelekh bara kapapae je ilaluse dengan bapae, metoh ie mampatei uju puluh biti paharie.

⁵⁷Tinai TUHAN mahukum kea kare oloh Sikhem awi kapapan ewen. Taloh te sama toto kilau je jari insanan Yotam anak Gideon tahiu ewen metoh ie manyapa ewen.