Read Ngaju PANGARINAH 1 Bible Online

PANGARINAH 1 - Ngaju bible

PANGARINAH 1

¹Huang surat toh inyurat taloh je ingarinah awi Yesus Kristus tahiu kare perkara je akan manjadi. Hatalla mansanan akan Kristus mangat Ie mamparahan jete akan kare rewar Hatalla taloh je akan bajeleng manjadi. Kristus manyoho malekat Ayue manalih Yohanes, rewar Ayue te, uka mansanan kare perkara te akae.

²Maka Yohanes kea manyarita lepah taloh handiai je gitae te; tuntang hetoh ie mansanan tahiu peteh Hatalla je indehen awi Yesus Kristus mahalau kasaksian ayue.

³Salamat oloh je mambasa tuntang oloh je mahining auh tujum surat toh hayak manumon kare taloh je inyurat intu huange. Basa dia tahi hindai taloh samandiai toh kareh manjadi.

⁴ Pahari handiai je aton intu uju ungkup hong Asia! Aku, Yohanes, maharap Hatalla manenga akan keton berkat tuntang kasanang bara Hatalla iete Ie Je Aton, Je Jari Aton, tuntang Je Harajur Aton — tuntang kea bara uju roh je aton intu taharep padadusan Hatalla,

⁵ tuntang bara Yesus Kristus, saksi je baketep. Ie te je pangkaheloe imbelom haluli bara pampatei tuntang Ie te je mimbing kuasa mahunjun kare rajan kalunen. Yesus sinta itah, tuntang hapan pampatei Aie Ie maliwus itah bara kare dosan itah,

⁶ tuntang manampa itah manjadi ije jalahan kare imam, je manempo Hatalla, Bapa Ayue. Yesus Kristus te je hai tuntang kuasa sampai katatahie. Amen!

⁷ Ite, Ie dumah ingalukup baunandau! Oloh samandiai kareh mite Ie, kalote kea ewen je jari manyodok Ie. Kakare bangsa hong kalunen kareh manangis manatum tagal Ie. Iyoh, auh toh toto haliai! Amen!

⁸ “Aku toh je tamparae tuntang kahapuse,” koan Tuhan Hatalla, Ije Aton, tuntang Je Harajur Aton, Je Paham Kuasae.

⁹Aku toh Yohanes, paharin keton je sama buah kapehe kilau keton, kilau je ingkeme awi gagenep oloh ain Kristus. Itah sabar manyarenan kepehe kilau ungkup Ayue. Aku inganan akan pulau Patmos awiku mambarita peteh bara Hatalla, je indehen awi Yesus mahalau kasaksian Ayue.

¹⁰Hong andau Tuhan, aku inguasa awi Roh Hatalla, palus aku mahining auh je paham hai — kilau auh tarompet — hakotak intu hila likutku.

¹¹Auh te hamauh, “Surat taloh ije gitam, tuntang ngirim surat te akan uju ungkup toh: Epesus, Smirna, Pergamus, Tiatira, Sardis, Piladelpia, tuntang Laodikea.”

¹²Aku tampaliau akan likut uka mite eweh je hakotak dengangku te. Palus aku mite uju tantahan sumbo je inampa bara amas.

¹³ Intu bentok kare pain tantahan sumbo te aton mendeng ije biti oloh je ampie kilau olon. Ie mahapan jubah je kapanjange te sampai paie. Intu usoke ingkepae tutup usok bara amas.

¹⁴ Balaue baputi sama kilau bulun tabiri, malenak kilau kapas. Matae ganda-gandang kilau apui;

¹⁵ pain Aie mamancar kilau pancar tambaga je ininih. Auh Ayue goho-gohop kilau letus danum soho je manangkero bara ngambo.

¹⁶Lengee hila gantaun Aie mimbing uju bintang, tuntang bara nyaman Aie balua ije kabilap padang banyihi hasansila isie. Baun Ayue tarang mamancar kilau matanandau metoh bentok andau.

¹⁷ Katika aku manampayah Ie, aku balongkang mahingkep intu taharep Ie sama kilau oloh matei. Tapi Ie mingkes lenge gantaun Aie intu aku palus hamauh, “Ela mikeh! Aku toh ije tamparae tuntang kahapuse.

¹⁸Aku toh Ie je belom! Aku jari matei, tapi ite, Aku belom palus katatahie. Aku aton kuasa hunjun pampatei, tuntang kuasa mahunjun lewun oloh matei.[1]

¹⁹Tagal te, keleh ikau manyurat kare taloh je gitam, iete kare taloh je aton katika toh, tuntang kare taloh je akan manjadi rahian kareh.

²⁰Toh ie taloh basilim ain uju bintang je gitam intu hila lenge gantaung-Ku, tuntang ain uju tantahan sumbo bara amas te: Uju bintang te kare malekat ain uju ungkup, tuntang uju tantahan sumbo te jete uju ungkup te.”