Read Ngaju PANGARINAH 10 Bible Online

PANGARINAH 10 - Ngaju bible

PANGARINAH 10

¹Palus aku mite ije malekat je paham gagah mohon bara sorga. Ie habungkus baunandau, tuntang ije liu mangalingkar takoloke. Baue mamancar kilau matanandau, tuntang paie sama kilau tihang apui.

²Intu lengee aton ije balon surat korik je hambirang. Paie hila gantaue bahunje intu tasik, paie hila sambil bahunje hunjun petak.

³Palus ie mantehau hai auhe kilau auh kare singa mangaruntong. Limbah malekat te mantehau, maka uju nyaho manimbale hapan auh je guru-guruh.

⁴Sana uju nyaho te mahiau, aku handak manyurate, tapi aku mahining auh bara sorga hamauh, “Keleh ikau milim taloh je insanan awi nyaho te; ela manyurat jete!”

⁵ Palus gitangku malekat je bahunje intu tasik tuntang intu petak te manggatang lenge gantaue akan langit.

⁶Ie sumpah huang aran Hatalla je belom sampai katatahie, je manjapa langit, petak tuntang tasik dengan kakare taloh handiai je aton intu huange. Malekat te hamauh, “Katikae dia tau iundur tinai!

⁷Tapi metoh malekat je kaujue mampahiau tarompete, Hatalla handak malalus rencana Ayue je basilim te, sama kilau je jari imbarita Awie akan kare rewar Ayue, iete kare nabi.”

⁸ Limbah te auh jari ihiningku bara sorga te, hakotak tinai dengangku. Ie hamauh, “Lius, duan balon surat je habirang intu lengen malekat je bahunje intu tasik tuntang hunjun petak te.”

⁹Maka aku lius kea manalih malekat te tuntang balaku uka ie manenga balon surat korik te akangku. Ie hamauh, “Duan tuntang kinan jetoh. Intu huang kanaim jete kareh manjadi bapait, tapi intu nyamam ie manis kilau mado.”

¹⁰Aku manduan balon surat korik te bara lengee palus kumae. Intu nyamangku angate kilau mado, tapi limbah aku manelee, huang kanaingku jete manjadi bapait.

¹¹Limbah te ie manyoho aku, “Naburan sinde tinai barita ain Hatalla tahiu kare bangsa, kare negara, kare bahasa, tuntang kare raja.”