Read Ngaju PANGARINAH 12 Bible Online

PANGARINAH 12 - Ngaju bible

PANGARINAH 12

¹Palus taragitan intu langit, ije taloh heran tuntang je luar biasa. Ije biti oloh bawi mangkepan matanandau akan pakaiae, kanjerae mendeng intu hunjun bulan. Intu takoloke aton ije makota iete bara duewalas bintang.

²Oloh bawi te batihi, tuntang awi jari sampai katikae luas, maka ie mangkariak awi paham kapehe.

³ Palus taragitan tinai intu langit ije taloh heran. Aton ije kongan naga bahandang je hai toto tuntang uju takoloke dengan tandoke sapuluh. Genep takoloke mahapan ije makota.

⁴ Hapan ikohe ie mihir sapertelo bara kare bintang intu langit tuntang manjakahe akan hunjun petak. Naga te mendeng intu taharep oloh bawi je handak luas te awie handak manelen anake, sana inakan.

⁵ Palus oloh bawi te manak ije biti anak hatue je kareh marentah salepah bangsa hapan tongkeh sanaman. Tapi anak te irampas bara oloh bawi te, palus iimbit manalih Hatalla tuntang akan hila baun padadusan Aie.

⁶Maka oloh bawi te hadari akan padang pasir, akan eka je jari inatap awi Hatalla akae. Hong eka te ie ihaga 1260 andau katahie.

⁷ Palus hong sorga lembut parang kalahi. Mikhael dengan kare malekat ayue hamok malawan naga te. Tuntang naga te kea, indohop awi kawan malekat ayue, malawan Mikhael.

⁸Tapi naga te kalah. Ie tuntang kare malekat ayue dia inyoho tinai melai huang sorga.

⁹ Naga hai te inganan akan luar! Ie te handipe bakas je bagare setan atawa Roh Papa, je manipu hapus kalunen. Ie inganan akan hunjun petak dengan kare malekat ayue.

¹⁰ Palus aku mahining auh je hai hong sorga hamauh, “Katika toh ie Hatalla manyalamat ungkup Ayue! Katika toh Hatalla mamparahan kuasan Aie kilau Raja! Katika toh Raja Panyalamat je injanji te kea mamparahan kuasan Ayue! Basa ie je jari mandawa kare paharin itah handau hamalem intu taharep Hatalla, jari impalua bara sorga.

¹¹Kare paharin itah jari mampakalah ie hapan dahan Anak Tabiri te, tuntang hapan barita je bujur bara Hatalla je imbarita awi ewen. Ewen pahias manyarah pambelom ewen sampai matei.

¹²Tagal te, keleh sorga tuntang kare taloh handiai awang huange, hanjak rantang! Tapi kalunen tuntang tasik toh calaka, basa setan jari mohon manalih keton marak paham balait, awi ie katawan katikae baya batisa isut ih hindai.”

¹³Katika naga te katawan je ie jari inganan akan petak, ie nampara manggoang oloh bawi je jari luas anak hatue te.

¹⁴ Tapi akan oloh bawi te aton inenga due palapas burong rajawali je hai, mangat ie tarawang akan ekae hong padang pasir, intu hete ie kareh ihaga telo satengah nyelo katahie, uka mahakan bara naga je mado mawi.

¹⁵Maka naga te manyambur are toto danum bara huang nyamae manintu oloh bawi te mangat mampahantung ie.

¹⁶Tapi petak mandohop oloh bawi te; petak mukei nyamae palus manelen danum je balua bara nyaman naga te.

¹⁷Naga te balait toto dengan oloh bawi te, sampai ie mawi oloh beken jalahan ain oloh bawi te kea, iete oloh handiai je mamenda kare parentah Hatalla, tuntang je baketep manenga kasaksian tahiu Yesus tuntang kuasan Aie.

¹⁸Palus naga te mendeng intu saran tasik.[6]